މިޞްރުގެ ސުވޭސް ކެނަލްއަށް މިދިޔަ އަހަރު ރެކޯޑް އަދަދަކަށް އާމްދަނީ ލިބިފައިވާކަމަށް ސުވޭސް ކެނަލް އޮތޯރިޓީ (އެސްސީއޭ) އިން ހާމަކޮށްފިއެވެ.
ސުވޭސް ކެނަލް އޮތޯރިޓީ (އެސްސީއޭ) އިން ބުނީ ޖޫންމަހުގެ 30 ވަނަ ދުވަހު ޓެކްސް އަހަރު ނިމިފައިވާއިރު، އެކުންފުންޏަށް 5.84 ބިލިއަން ޑޮލަރުގެ އާމްދަނީއެއް ލިބިފައިވާކަމަށެވެ.
ސުވޭސް ކެނަލް އޮތޯރިޓީ، އެސްސީއޭގެ ވެރިޔާ އޮސާމާ ރާބިއާ ވިދާޅުވި ގޮތުގައި މިދިޔަ އަހަރު ކުރިމަތިލާން ޖެހުނު ކޯވިޑްގެ ބަލިމަޑުކަމާއި، އާގުބޯޓެއް ހުރަސްވެ 6 ދުވަސް ވަންދެން ކެނަލް ބަންދު ކުރަން ޖެހުންފަދަ ދަތިތަކާއި ކުރިމަތިލާން ޖެހުނުނަމަވެސް ރެކޯޑް ޢަދަދެއްގެ އާމްދަނީއެއް ލިބިފައިވާކަމަށެވެ. އަދި މިއީ ކެނަލްގެ ތާރީޚްގައިވެސް އެންމެ ބޮޑު އާމްދަނީއެއް ލިބުނު އަހަރު ކަމަށް އޭނާ ވިދާޅުވިއެވެ. މީގެއިތުރުން ނިމުނު ޓެކްސް އަހަރު ލިބުނު އާމްދަނީ އޭގެ ކުރީ އަހަރާއި އަޅާބަލާއިރު 2 އިންސައްތަ އިތުރުކަމަށްވެސް ރާބިއާ ވިދާޅުވިއެވެ.
ސުއޭސް ކެނަލްއަށް ބޮޑު އާމްދަނީއެއް ލިބުމުގެ މައިގަނޑު ސަބަބަކީ މާކެޓްކުރުމާއި އަގު ކަނޑައެޅުމުގައި ރަނގަޅު އުޞޫލުތަކެއް ގެންގުޅުމުން، ވިޔަފާރީގެ ބައިވެރިންގެ އިތުބާރު ލިބުމުންކަމަށްވެސް ސުއޭސް ކެނަލް އޮތޯރިޓީގެ ވެރިޔާ ވިދާޅުވިއެވެ.
އެސްސީއޭއަށް ރެކޯޑް އަދަދެއްގެ އާމްދަނީއެއް ލިބިފައިވާކަން ހާމަކޮށްފައި މިވަނީ މާރިޗްމަހު ފަހުކޮޅު ސުވޭސް ކެނަލްއަށް ހުރަސްވި ޖަޕާނުގެ އާގުބޯޓު 'އެވަރގިވަން' ހިފަހައްޓާފައި އޮތުމަށްފަހު ދޫކޮށްލިތާ ހަތަރު ދުވަސް ފަހުންނެވެ. މި ބޯޓު ދޫކޮށްލާފައިވަނީ މިޞްރު ސަރުކާރުން ހުށަހަޅާފައިވާގޮތަށް އެބޯޓު ނިސްބަތްވާ ޖަޕާނުގެ ކުންފުނިން މިޞްރު ސަރުކާރަށް ބަދަލުދޭން އެއްބަސްވުމުންނެވެ.
މިދިޔަ މާރިޗް މަހުގެ 23 ވަނަ ދުވަހު ސުވޭސް ކެނަލްގައި ހުރަސްވި ބޯޓު ފުންކުރެވުނީ 6 ދުވަސްފަހުން މާރިޗް 29 ވަނަ ދުވަހުއެވެ. މި މުއްދަތުގެ ތެރޭގައި ބޯޓުފުންކުރުމަށާއި މިކަމުގެ ސަބަބުން އެސްސީއޭއަށް ލިބުނު ބަދުނާމުގެ ގެއްލުމާއި، މީގެއިތުރުން ޢާމްދަނީގެ ގޮތުގައި ލިބުނު ގެއްލުމުގެ ބަދަލުގެގޮތުގައި 916 މިލިއަން ޑޮލަރު ދިނުމަށް އެސްއީއޭއިން މީގެކުރިން އެދިފައި ވީނަމަވެސް ފަހުން މި ޢަދަދު ވަނީ 550 މިލިއަން ޑޮލަރަށް ކުޑަކޮށްފައެވެ.
މިޞްރުން ބުނިގޮތުގައި މިކަމުގެ ސަބަބުން ދުވާލަކަށް 15 މިލިއަން އެމެރިކާ ޑޮލަރުގެ ގެއްލުން ވަނީ ލިބިފައެވެ. މެރިޓައިމް އިންޝުއަރެންސް ކުންފުނިތަކުން ބުނާގޮތުން މިކަމުގެ ސަބަބުން ދުނިޔޭގެ ވިޔަފާރިއަށް ބިލިއަނުން ވަނީ ގެއްލުން ލިބިފައެވެ.
އަހަރުގެ ފުރަތަމަ ހަ މަސްދުވަހު 9763 ބޯޓު ކެނަލް ހުރަސްކޮށްފައިވާއިރު މިއީ މިދިޔަ އަހަރުގެ މި މުއްދަތާއި އަޅާބަލާއިރު މިއީ 2 އިންސައްތައިގެ އިތުރުވުމެކެވެ. އަދި މިދިޔަ އަހަރު ގާތްގަނޑަގަކަށް 10000 ބޯޓު ވަނީ ކެނަލް ހުރަސްކޮށްފައެވެ. އަދި މިއީ އެވަރޭޖްކޮށް ދުވާލަކު 50 ބޯޓެވެ.