ކޯވިޑްގެ ބަލިމަޑުކަމުން މަޑުމަޑުން އަރައިގަނެވެމުން އަންނަ މި ދަނޑިވަޅުގައި ދެކުނު ކޮރެއާގެ އަންނަ އަހަރު މިނިމަމް ވޭޖް ކަނޑައަޅަން ނިންމާފައިވާ ކަމަށް އެ ޤައުމުން ބުނެފިއެވެ. މިނިމަމް ވޭޖް ކޮމިޝަނުން އެއްބަސްވެފައިވަނީ 5.1 އިންސައްތައިގެ ކުރިއެރުމަކާއެކު މަސައްކަތްކުރާ ކޮންމެ ގަޑިއިރަކަށް 8.2 ޑޮލަރު ދިނުމަށެވެ.
މިއިތުރުކުރުމާއެކު 2017 ވަނަ އަހަރު ރައީސް މޫން ޖޭ އިން، ވެރިކަމާއި ހަވާލުވިފަހުން މަސައްކަތް ކުރާ ކޮންމެ ގަޑިއިރަކަށް އިތުރުކޮށްފައިވާ ޖުމްލަ ޢަދަދު 41.6 އިންސައްތައަށް އަރާނެއެވެ.
މަސައްކަތްތެރިންނަށް ރަނގަޅު ގޮތްތައް ފަހިކޮށްދިނުން އެދި މި މަހު ކުރީކޮޅު ވެރިރަށް ސޯލްގައި ގާތްގަޑަކަށް 8000 އެއްހާ މަސައްކަތްތެރިންވަނީ މުޒާހަރާކޮށް އަޑުއުފުލާފައެވެ. މުޒާހަރާގެ ބައިވެރިން އަޑުއުފުލަމުންދިޔައީ މުސާރަ ރަނގަޅު ކޮށްދިނުމަށާއި ޙާދިސާތައް ހިނގުން މަދުކުރުމަށް ފިޔަވަޅުތައް އަޅައިދިނުމަށްކަމަށް ޚަބަރުތައް ބުނެއެވެ.
ކޯވިޑްގެ ބަލިމަޑުކަމުން ކޮންމެވެސް ވަރަކަށް އަރައިގަނެވިފައިވީ ނަމަވެސް ޑެލްޓާ ވޭރިއަންޓުގެ ކޭސްތައް އެ ޤައުމުގައި އަދިވެސް އުޅޭތީ ދެކުނު ކޮރެއާގެ ސަރުކާރުން ވަނީ އެއްވުންތައް މަނާކޮށްފައެވެ.