ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަމާޒުކޮށް ދިން ނުރައްކާތެރި ޓެރަރިސްޓް ހަމަލާއާ ގުޅިގެން ހައްޔަރުކޮށްފައިވާ މީހުންނަށް އަންނަ ހަފްތާގައި ދައުވާކުރަން ފޮނުވުމަށް މަސައްކަތްކުރަމުންދާކަމަށް ސަރުކާރުން ވިދާޅުވެފައިވާކަމަށް، އެމްޑީޕީގެ މެއި 6 ކޮމެޓީން ވިދާޅުވެއްޖެއެވެ.
މެއި 6 ކޮމެޓީއަކީ ރައީސް ނަޝީދަށް އަމާޒުކޮށްދިން ޙަމަލާގެ ތަޙްޤީޤުގެ ކަންކަން ހިނގާނުހިނގާގޮތް ބެލުމަށް ވެރިކަން ކުރާ މައި ޕާޓީ، އެމް.ޑީ.ޕީން އުފައްދާފައިވާ ކޮމެޓީއެކެވެ. އެމް.ޑީ.ޕީން މިރޭ ބޭއްވި އެޕާޓީގެ 179 ވަނަ ޤައުމީ މަޖިލިސް ޖަލްސާގައި މެއި 6 ކޮމެޓީގެ މުޤައްރިރު، ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ޙަސަން އަފީފް ވަނީ މެއި 6 ކޮމެޓީއަށް މިހާތަނަށް އެއްކުރެވިފައިވާ އެންމެ ފަހުގެ މަޢުލޫމާތު ހިއްސާކުރައްވާފައެވެ.
މެމްބަރު އަފީފް ވިދާޅުވީ، ރައީސް ނަޝީދަށް އަމާޒުކޮށް މެއި 6 ގައި ދިން ހަމަލާގެ ތަޙްޤީޤު ކުރިއަށްދާގޮތާގުޅޭ މަޢުލޫމާތު ހޯދުމަށް މިމަހުގެ 5 ވަނަ ދުވަހު ހޯމް މިނިސްޓަރ ޢިމްރާން ޢަބްދުﷲއާއި ކޮމެޓީން ބައްދަލުކުރައްވާފައިވާކަމަށެވެ. މި ބައްދަލުވުމުގައި، ރައީސް ނަޝީދަށް އަމާޒުކޮށް ނުރައްކާތެރި ޙަމަލާއެއް ދޭން އުޅޭކަމުގެ އެއްވެސް މަޢުލޫމާތެއް ފުލުހުންގެ އިންޓެލިޖެންސަށް ދުރާލާ ލިބިފައިނުވާކަމަށާއި، މިހާތަނަށް ބެލި ބެލުމުން ރައީސް ނަޝީދަށް އަމާޒުކޮށްދިން ޙަމަލާގެ ފަހަތުގައި ވަނީ އެންމެ މޯޓިވްވެއްކަމަށް މިނިސްޓަރ ވިދާޅުވެފައިވާކަމަށް އަފީފް ވިދާޅުވިއެވެ. އަދި މިކަމުގައި ޝާމިލުވާކަމަށް މިހާތަނަށް ދެނެގަނެވިފައިވާ މީހުންގެ ތެރޭގައި އާންމުކޮށް ކުށްތަކުގައި އުޅޭ މީހުން ބައިވެރި ނުވާކަމަށާއި، މި މައްސަލައިގައި ހަރަކާތްތެރިވެފައިވަނީ އެންމެ މަތީ ދަރަޖައިގެ ހަރުކަށި ފިކުރުގެ މީހުންކަމަށް ހޯމް މިނިސްޓަރ ވިދާޅުވިކަމަށްވެސް ޢަފީފް ވިދާޅުވިއެވެ.
މި މައްސަލައިގައި ހައްޔަރުކޮށްފައިވާ މީހުންނަށް ދައުވާކުރުމަށް މިމަހުގެ 20ގައި ފޮނުވުމަށް މަސައްކަތްކުރަމުންދާކަމަށްވެސް ހޯމް މިނިސްޓަރާއެކު ބޭއްވެވި ބައްދަލުވުމުގައި މިނިސްޓަރ ވިދާޅުވެފައިވާކަމަށް ޢަފީފް ވިދާޅުވިއެވެ.
"ރައީސް ނަޝީދަށް ޙަމަލާ ދެވުނުއިރު ރާއްޖޭގައި އދ. ގެ އޮފީސް އޮން ޑްރަގްސް އެންޑް ކްރައިމްގެ ދެ މާޙިރުން ތިއްބެވިކަމާއި، އެރެއިން ފެށިގެންވެސް އެބޭފުޅުން މި ކޭސްގައި މަސައްކަތް ކުރަމުން އަންނަކަމަށް މިނިސްޓަރ މިވަނީ ވިދާޅުވެފައި. އަދި މި ޖުލައިމަހުގެ 20 ގައި މިހާރު ހައްޔަރުކޮށްފައިވާ މީހުންނަށް ދައުވާކުރުމަށް މަސައްކަތްކުރަމުން ގެންދަވާކަމަށް މިނިސްޓަރ ވިދާޅުވި" މެމްބަރު ޢަފީފް ވިދާޅުވިއެވެ.
ރައީސް ނަޝީދަށް ހަމަލާދިނުމުގައި އަމަލީގޮތުން ބައިވެރިވި މީހުންނާއި، މިކަން ރާވާ ހިންގުމާއި، ފަންޑުކުރުމުގެ އަޑީގައި ތިބި ބަޔަކު ފުލުހުންގެ ތަޙްޤީޤުން މިހާތަނަށް ދެނެގަނެވިފައިނުވާތީ އެކަމުގެ ކަންބޮޑުވުން މެއި 6 ކޮމެޓީގެ ފަރާތުން ވަނީ ފާޅުކުރައްވާފައެވެ. އަދި މިފަދަ ބޮޑުކަމެއް ހިނގާދިޔައިރު، އެކަމުގެ އިންޓެލިޖެންސް މަޢުލޫމާތު ސަލާމަތީ ބާރުތަކަށް ލިބިފައިނުވާތީ އެކަމުގެ ކަންބޮޑުވުންވެސް ކޮމެޓީން ވަނީ ފާޅުކުރައްވާފައެވެ.
މި މައްސަލައާއި ގުޅިގެން މަޖިލީހުގެ 241 ކޮމެޓީން އެކުލަވާލި ޕާލިމަންޓްރީ އިންކުއަރީގެ ރިޕޯޓުގައި ފާހަގަކޮށްފައިވާ ކަންކަން ދިރާސާކޮށް، ރިޕޯޓުގައި ރިކޮމެންޑޭޝަންތަކުގެ ގޮތުގައި ފާހަގަކޮށްފައިވާ ކަންކަން ދަޢުލަތުގެ ކަމާބެހޭ މުޢައްސަސާތަކުން ތަންފީޒުކުރަމުންދާ މިންވަރު ވަރަށް ގާތުން ބަލަމުންދާނެކަމަށްވެސް އެމް.ޑީ.ޕީގެ ޤައުމީ މަޖިލިސް ޖަލްސާގައި މެއި 6 ކޮމެޓީގެ މުޤައްރިރު ވިދާޅުވިއެވެ.