ކަނޑައަޅާފައިވާ ގައިޑްލައިނާއި ހިލާފުވާ ފަތުރުވެރިކަމުގެ ޙިދުމަތްދޭ ތަންތަނަށް ދޫކޮށްފައިވާ ހުއްދަ ބާތިލް ކުރާނެކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.
ޓޫރިޒަމް މިނިސްޓްރީން މިހާރުވަނީ ގެސްޓު ހައުސްތަކާއި ޓޫރިސްޓް ހޮޓާތަކުން އެޗްޕީއޭ އަދި ޓޫރިޒަމް މިނިސްޓްރީގެ ގައިޑްލައިންތަކަށް އަމަލުކުރަމުންދޭތޯ ބެލުމަށް ޙާއްސަ އިންސްޕެކްޝަނެއް ފަށައިފައެވެ.
ދެކުނު އޭޝިއާގެ ފަތުރުވެރިންނަށް ރާއްޖޭގެ ބޯޑަރުތަށް މިހާރު ހުޅުވާލާފައިވީ ނަމަވެސް ގެސްޓުހައުސްތަކާއި ޓޫރިސްޓު ހޮޓާތައް ދެކުނު އޭޝިއާގެ ފަތުރުވެރިންނަށް ހުޅުވާލުމުގެ ހުއްދަ ސަރުކާރުން ދީފައެއް ނުވެއެވެ. އެހެން ނަމަވެސް ދެކުނު އޭޝިއާގެ ފަތުރުވެރިންނަށް ރާއްޖޭގެ ބޯޑަރު ހުޅުވާލުމާއި އެކު މެދުއިރުމަތީގައި ވަޒީފާ އަދާކުރާ ދެކުނު އޭޝިއާގެ ޤައުމުތަކަށް ނިސްބަތްވާ މީހުން ދަނީ ކަރަންޓީން މުއްދަތެއް ފުރިހަމަ ކުރުމަށް ރާއްޖެއަށް އެތެރެވަމުންނެވެ. މި މީހުން ރާއްޖެއަށް ޓޫރިސްޓް ވިސާގައި އެތެރެވުމަށްފަހު ވަކި މުއްދަތެއް ފުރިހަމަ ކުރުމަށްފަހު އެމީހުން ދާން ބޭނުންވާ ޤައުމަކަށް ދަނީއެވެ.
މިފަދަ މީހުން އާއްމުގޮތެއްގައި ތިބެނީ ގެސްޓުހައުސްތަކުގަ އާއި، ދުވަހު ކުއްޔަށް ދޫކުރާ ތަންތަނުގައެވެ.
ގެސްޓުހައުސްތައް އިންސްޕެކްޓް ކުރުމުގެ ޕްރޮގްރާމާއި ގުޅޭގޮތުން ޕީއެސްއެމް ނިއުސްއާ ވާހަކަދައްކަވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ އައްސަދު ރިޒާ ވިދާޅުވީ އެ މިނިސްޓްރީން މިހާތަނަށް ބެލި ބެލުމުންވެސް ގިނަ އަދަދެއްގެ ގެސްޓުހައުސްތަކުގައި ދެކުނު އޭޝިއާއިން ރާއްޖެއަށް އައިސްފައިވާ މީހުން ބައިތިއްބާފައިވާކަން ފާހަގަކުރެވިފައިވާކަމަށެވެ.
" ވަރަށް ގިނަ ރިޕޯޓްތަށް ލިބުން މާލެއަށްވެސް އެތެރެވި ކަމަށް، މާފުއްޓަށްވެސް އެތެރިވި ކަމަށް، މިހެން ރިޕޯޓްތަށް އައި ތަންތަން އިންސްޕެކްޓްކޮށްފިން، ބައެއް ތަންތަނުން ފާހަގަވި މިހެން ބައިތިއްބާފަ ތިބި ކަމަށް، މިފަދަ ތަންތަނުގެ ހުއްދަ ބާތިލް ކުރާނަން،" އައްސަދު ވިދާޅުވިއެވެ.
އައްސަދު ވިދާޅުވީ ދުވަހު ކުއްޔަށް ދޫކުރާ ތަންތަނުގައިވެސް މިފަދަ މީހުން ޓޫރިސްޓް ވިސާގައި ތިބޭކަން ފާހަގަކުރެވިފައިވާ ކަމަށެވެ. އަދި އެފަދަ ތަންތަން އިންސްޕެކްޓް ކުރުމުގެ މަސައްކަތް ފުލުހުންނާއި ގުޅިގެން ކުރާކަމަށްވެސް އައްސަދު ވިދާޅުވިއެވެ. އައްސަދު ވިދާޅުވީ އެއަރޕޯޓުން ނިކުންނަ މީހުން ދަނީ ކޮންތާކަށްތޯ ބެލުމަށްވެސް ޙާއްސަ އިންތިޒާމްތަކެއް ހަމަޖައްސާފައިވާ ކަމަށެވެ.
" މިނިސްޓްރީގެ ސްޓާފުންވެސް އެބަ ހަރަކާތްތެރިވޭ، އަދި ޓޫރިސްޓް ޕޮލިސްވެސް އެބަ ހަރަކާތެރިވޭ މިގޮތަށް މީހުން މާލެއަށް އެތެރެވޭތޯ ބެލުމަށް،" އައްސަދު ވިދާޅުވިއެވެ.
ޓޫރިޒަމް މިނިސްޓްރީން އިންސްޕެކްޝަނެއް ފަށާފައިވާއިރު، ސައްހަ ނޫން ހޮޓެލް ބުކިންގ ލިޔެކިޔުން ހިފައިގެން ރާއްޖޭގެ ބޯޑަރުން އެތެރެވާން އުޅުނު 248 މީހަކު ވަނީ ދާދިފަހުން ހުއްޓުވާފައިވާ ކަމަށެވެ.
ދެކުނު އޭޝިއާގައި ކޯވިޑްގެ ބަލިމަޑުކަން ހަލުވިކަމާއެކު ފެތުރެމުންދިޔުމާއި ގުޅިގެން ދެކުނު އޭޝިއާގެ ފަތުރުވެރިންނަށް ރާއްޖެއިން ޓޫރިސްޓް ވިސާ ދިނުން ހުއްޓާލާފައިވަނީ މިދިޔަ މޭއި މަހުގެ 13 ވަނަ ދުވަހުއެވެ. އޭގެ ގާތްގަނޑަކަށް 2 މަސް ދުވަސްފަހުން ދެކުނު އޭޝިއާގެ ޤައުމުތަކުގެ ފަތުރުވެރިންނަށް ރާއްޖެއިން ޓޫރިސްޓް ވިސާ ދޫކުރަން ފެށީ މި މަހުގެ 15ވަނަ ދުވަހުއެވެ. އަދި މިމަހުގެ 30ވަނަ ދުވަހު ގެސްޓުހައުސްތައް ދެކުނު އޭޝިއާގެ ފަތުރުވެރިންނަށް ހުޅުވާލެވޭނެ ކަމަށް ސަރުކާރުން މީގެކުރިންވަނީ ވިދާޅުވެފައެވެ.