އިރުމަތީ ޔޫރަޕުގެ އިތުރު އެއަރލައިންތަކުން ރާއްޖެއަށް ދަތުރުތައް ފެށުމާއި ގުޅޭގޮތުން މަޝްވަރާކޮށްފި

ރަޝިއާ އާއި އިރުމަތީ ޔޫރަޕުގެ އިތުރު އެއަރލައިންތަކުން ރާއްޖެއަށް ދަތުރުތައް ފެށުމާއި ގުޅޭގޮތުން މަޝްވަރާކޮށްފިއެވެ.

ޓޫރިޒަމް މިނިސްޓަރ ޑރ. އަބްދުﷲ މަޢުސޫމް ބައިވެރިވެވަޑައިގެންނެވި މި ބައްދަލުވުން ކުރިއަށް ގެންގޮސްފައިވަނީ ރަޝިއާގައި ޓުއަރ އޮޕަރޭޓަރުގެ ޚިދުމަތްދޭ ދިވެހި ކުންފުންޏެއް ކަމަށްވާ ރިސޯޓްލައިފް ހޮލިޑޭސް އާއި ރެޑްވިންގްސް އެއަރލައިންސް ގުޅިގެންނެވެ. ރަޝިއާގެ މޮސްކޯގައި ކުރިއަށް ދިޔަ މި ބައްދަލުވުމުގައި ޓޫރިޒަމް މިނިސްޓަރ ޢަބްދުﷲ މައުސޫމްވަނީ ރާއްޖޭގެ ފަތުރުވެރިކަމާ ގުޅުންހުރި މައުލޫމާތު ރެޑްވިންގްސް އެއަރލައިން އޮޕްރޭޓުކުރާ ޒިއާޓުއަރސް އާއި މޮސްކޯގެ ޒުކޮވުސްކީ އިންޓަރނޭޝަނަލް އެއަރޕޯރޓުގެ ސީއީއޯ ތޯމަސް ވައިސްވިލާއާ ހިއްސާކޮށްފައެވެ.

އެ ބައްދަލުވުމަށްފަހު ޒިއާޓުއަރސް އާއި ރިސޯޓު ލައިފް ހޮލިޑޭސް އާއި ދެމެދު އެކަމާއި ގުޅޭގޮތުން އެމްއޯޔޫއެއްގައި ވަނީ ސޮއިކޮށްފައެވެ. ރިސޯރޓު ލައިފުގެ ފަރާތުން އެމްއޯޔޫގައި ސޮއިކުރެއްވީ ސީއީއޯ މުޙައްމަދު ޝާޒް ވަލީދެވެ. ޒިއާޓުއަރސްގެ ފަރާތުން ސޮއިކުރެއްވީ އެކުންފުނީގެ ސީއީއޯ އެވެ.

މީގެ އިތުރުން މިމަހުގެ 22 ވަނަދުވަހު ރިސޯޓްލައިފް އާއި ނޯރޑުވިންޑްސް އެއަރލައިންއާއެކު ބޭއްވި މަޝްވަރާތަކުގައިވެސް ޓޫިޒަމް މިނިސްޓަރ ބައިވެރިވެ ވަޑައިގެން ރާއްޖެއަށް ދަތުރުފެށުމަށް އެއަރލައިންތަކަށް ހުރި ފުރުސަތުތަކާއި ގުޅޭގޮތުން ވަނީ ވާހަކަފުޅުދައްކަވާފައެވެ. އަދި ވަކިން ޚާއްސަކޮށް ގަން އިންޓަރނޭޝަނަލް އެއަރޕޯރޓަށް ދަތުރުތައްފެށުމަކީ ސަރުކާރުން ވަރަށްބޮޑަށް އެދޭކަމެއްކަމުގައި މިނިސްޓަރވަނީ ވިދާޅުވެފައެވެ. މި މަޝްވަރާތަކުގައި ވިލާ ހޮޓެލްސްގެ ސީއީއޯ އިބްރާހިމް ސިޔާދު ޤާސިމް އާއި، ވިލާ ހޮޓެލްސްގެ ބިޒްނަސް ޑިވޮލްޕްމަންޓް ޑިރެކްޓަރ މުރާދު ހަސަން ވެސް ބައިވެރިވެފައިވެއެވެ.

ރިސޯރޓް ލައިފް ހޮލިޑޭސްގެ ދައުވަތަކަށް ޓޫރިޒަމް މިނިސްޓަރ މަޢުސޫމް ކުރައްވާ މިދަތުރުފުޅުގައި މޮސްކޯގައި ހުންނަ ރިސޯރޓު ލައިފް ހޮލިޑޭސްގެ އޮފީހަށް މިނިސްޓަރ ޒިޔާރަތްކުރައްވާ އެއޮފީސް ބައްލަވާލެއްވިއެވެ. އަދި ރާއްޖޭގެ ފަތުރުވެރިކަން ކުރިއެރުވަމަށް ސީއީއޯ ވަލީދު ކުރައްވާ މިންނެތް މަސައްކަތް ފާހަގަކުރައްވާ، ވަލީދުއަށާއި ވަލީދުގެ ޓީމަށް ވަނީ ޝުކުރު އަދާކުރައްވާފައެވެ.
މިދަތުރުގައި ޓޫރިޒަމް މިނިސްޓްރީގެ އެގްޒެކެޓިވް ޑިރެކްޓަރ ޠައްޔިބް ޝަހީމްވެސް ބައިވެރިވެ ވަޑައިގަންނަވައެވެ.

ރަޝިއާއަކީ މިހާރު ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ ޤައުމެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން އަހަރުގެ މިހާތަނަށް އެޤައުމުން ރާއްޖެއަށް 139955 ފަތުރުވެރިން ޒިޔާރަތްކޮށްފައިވާއިރު، މިއީ ރާއްޖެއަަށް ޒިޔާރަތްކޮށްފައިވާ މުޅި ޖުމްލަ ފަތުރުވެރިންގެ 23.8 އިންސައްތައެވެ.