މިއަހަރުގެ ދެވަނަ ކުއާޓަރުގައި އެމްޓީސީސީން 86 މަޝްރޫއެއްގެ މަސައްކަތް ކުރިއެއް ގޮސްފައިވާ ކަމަށް އެކުންފުނިން ހާމަކޮށްފިއެވެ.
އެމްޓީސީސީން އާއްމުކޮށްފައިވާ މިއަހަރުގެ ދެވަނަ ކުއާޓަރުގެ މާލީ ރިޕޯޓުގައިވާގޮތުން މި 86 މަޝްރޫޢުގެ ތެރޭގައި ބަނދަރު ހެދުމުގެ 41 މަޝްރޫޢަކާއި، ބިން ހިއްކުމުގެ 15 މަޝްރޫޢަކާއި، ގޮނޑުދޮށް ހިމާޔަތްކުރުމުގެ 11 މަޝްރޫއަކާއި، މަގު ހެދުމުގެ 10 މަޝްރޫޢަކާއި، އެއަރޕޯޓް ތަރައްޤީކުރުމުގެ 2 މަޝްރޫއެއް ހިމެނެއެވެ.
އެމްޓީސީސީންވަނީ 2 މަޝްރޫޢެއްގެ މަސައްކަތް މިއަހަރުގެ 2ވަނަ ކުއަރޓަރުގެ ތެރޭގައި ކާމިޔާބުކަމާއެކު ނިންމާލާފައެވެ. އެ 2 މަޝްރޫޢުއަކީ، ގދ. ތިނަދޫ ރީޖަނަލް ޕޯޓް ތަރައްޤީކުރުމުގެ މަޝްރޫޢާއި ސ.މީދޫ ބަނދަރު ތަރައްޤީކުރުމުގެ މަޝްރޫއެވެ.
މީގެއިތުރުން ދެވަނަ ކުއާޓަރުގެ ތެރޭގައިވަނީ އާ 10 މަޝްރޫޢެއްގެ މަސައްކަތް ފަށާފައެވެ. އަދި އައު 9 މަޝްރޫއެއް ވަނީ އެމްޓީސީސީއާ ހަވާލުކުރެވިފައެވެ.
މާލީގޮތުން އެމްޓީސީސީއަށް މިއަހަރުގެ ދެވަނަ ކުއާޓަރަކީ ކާމިޔާބު ކުއާޓަރެކެވެ. ތަފާސް ހިސާބުތައް ދައްކާގޮތުން މިއަހަރުގެ ދެވަނަ ކުއާޓަރުގައި އެމްޓީސީސީއަށް 423.3 މިލިއަން ރުފިޔާގެ އާމްދަނީއެއް ވަނީ ލިބިފައެވެ. މިއީ މިއަހަރުގެ ފުރަތަމަ ކުއާޓަރުގައި އެމްޓީސީސީއަށް އާމްދަނީގެ ގޮތުގައި ލިބުނު އަދަދާއި އަޅާ ބަލާއިރު، 0.07 އިންސައްތަ އިތުރު އަދަދެކެވެ.