ނިއުޔޯކް ސިޓީގެ ވިޔަފާރިތަކުގެ މުވައްޒަފުންނާއި ކަސްޓަމަރުންވެސް ވެކްސިން ޖެހުން މަޖުބޫރު!
ނިއުޔޯކް ސިޓީގެ ރެސްޓޯރެންޓްތަކާއި، ޖިމްތަކާއި، އެހެނިގެން އިންޑޯރ ވިޔަފާރިތައް ހިންގާ ފަޜާތްތަކަށް ޚިދުމަތްދެވޭނީ މުވައްޒަފުންނާއި ޚިދުމަތްހޯދާ ފަރާތްތައް ކޯވިޑްގެ ވެކްސިން ފުރިހަމަކުރުމުންކަމަށް އެސީޓީގެ ކަމާއިބެހޭ ފަރާތްތަކުން ނިންމައިފިއެވެ.
ރެސްޓޯރެންޓްތަކުގެ އިތުރުން ޖިމްތަކާއި އިންޑޯރ އެހެނިހެން ވިޔަފާރިތަކަށްވެސް މި އުޞޫލު ކަނޑައެޅީ ކޯވިޑްގެ އައު ވޭރިއަންޓް ކަމަށްވާ ޑެލްޓާ ވޭރިއަންޓް އެ ސީޓީގައާއި އެމެރިކާގެ އެކި ކަންކޮޅުތަކުގައި ފެތުރެމުންދާތީ، ވެކްސިން ޖެހުނަށް ބާރު އެޅުމުގެ ގޮތުންނެވެ.
ނިއުޔޯކް ސިޓީގެ މޭޔަރ ބިލް ޑެ ބްލަސިއޯ ވިދާޅުވީ ވިޔަފާރިތަކުގެ މުވައްޒަފުންނާއި ކަސްޓަމަރުން ވެކްސިން ޖެހުމަށް ބާރު އެޅުމަށް އެކުލަވާލި ސިޔާސަތުގެ ސަބަބުން، ކޯވިޑްޖެހޭ މީހުންގެ އަދަދު ދަށްކުރެވޭނެކަމަށެވެ. މި އުސޫލުގެ ދަށުން ރެސްޓޯރަންޓަކުން ޚިދުމަތް ހޯދާ ފަރާތްތަކާއި އިންޑޯރ ހަރަކާތްތަކުގައި ބައިވެރިވާ މީހުން ވެކްސިން ފުރިހަމަކޮށްފައިވާކަން ޔަޤީންކޮށްދޭންޖެހެއެވެ.
މިއުސޫލުތަކަށް މިމަހު އަމަލުކުރަން ފެށިނަމަވެސް، މި އުސޫލު ފުރިހަމައަށް ތަންފީޒުކުރަން ފަށާނީ އަންނަމަހުން ފެށިގެންކަމަށް ނިއުޔޯކް ސިޓީގެ ކަމާއިބެހޭ ފަރާތްތަކުން ބުނެއެވެ. އެމެރިކާގެ ބޮޑެތި އެހެން ސިޓީތަކުގައި މާސްކުއެޅުން އަލުން މަޖުބޫރުކޮށްފައި އޮތްނަމަވެސް ނިއުޔޯކް ސިޓީގެ މޭޔަރ މިކަމާއި ދެކޮޅުހައްދަވައެވެ.
ނިއުޔޯކް ސިޓީގައި އުޅޭ މީހުންގެ ތެރެއިން 60 އިންސައްތަ މީހުން ވެކްސިންގެ އެއް ޑޯޒް ޖަހާފައިވާއިރު، ފަގީރު ސަރަޙައްދުތަކުގައި ވެކްސިން ޖެހި އާބާދީ ވަރަށް ކުޑައެވެ.
ނިއުޔޯކް ސިޓީގައި އަޅާފައިވާ ފިޔަވަޅުތަކާއި އެއްގޮތް ފިޔަވަޅުތަކެއް، އަންނަމަހު ފްރާންސްގައިވެސް ތަންފީޒުކުރުމަށް ދަނީ ތައްޔާރުވަމުންނެވެ.
ނިއުޔޯކް ސިޓީގެ އިތުރުން މަޝްހޫރު ނެޓްފްލިކްސްއިންވެސް ވަނީ އެމީހުންގެ ފިލްމުތަކުގެ ކާސްޓުންނާއި ކްރޫއިން ވެކްސިން ޖަހަން މަޖުބޫރުކޮށްފައެވެ. މީގެއިތުރުން ގޫގުލްގެ މުވައްޒަފުންނާއި، އެހެން ބައެއް ބޮޑެތި ކުންފުނިތަކުގެ މުވައްޒަފުން އޮފީހަށް ނިކުތުމުގެ ކުރިން ވެކްސިން ޖެހުމަށްވެސް އެކުންފުނިން ވަނީ މުވައްޒަފުންނަށް އަންގާފައެވެ.