އިޤްތިޞާދީ ގޮތުން އާރާސްތުވަމުން އަންނަ އެމެރިކާގެ ވަޒީފާ ބާޒާރަށް އަނެއްކާވެސް ވަޒީފާތައް އިތުރުކޮށްފިއެވެ. މިއާއެކު ވަޒީފާނެތް މީހުންގެ ނިސްބަތްވެސް އެމެރިކާގައި ވަނީ ދަށްވެފައެވެ.
އެމެރިކާގެ ޑިޕާޓްމަންޓް އޮފް ލޭބަރއިން ހާމަކޮށްފައިވާ ގޮތުގައި މިދިޔަ މަހު އެމެރިކާއިންވަނީ އެޤައުމުގެ ވަޒީފާގެ ބާޒާރަށް 943،000 ވަޒީފާ އިތުރުކޮށްފައެވެ. އެގޮތުން ފަތުރުވެރިކަމާއި ޚިދުމަތްދިނުމުގެ ސިނާޢަތަށް 380،000 ވަޒީފާ އިތުރުކޮށްފައިވާއިރު ތަޢުލީމީ ދާއިރާއަށް ވަނީ 221،000 ވަޒީފާ އިތުރުކޮށްފައެވެ. އަދި އުފެއްދުންތެރިކަމަށް 27،000 ވަޒީފާ އިތުރުކޮށްފައިވެއެވެ.
މިއާއިއެކު އެޤައުމުގައި ވަޒީފާނެތް މީހުންގެ ނިސްބަތް ވަނީ 5.4 އިންސައްތައަށް ދަށްވެފައެވެ. އެމެރިކާގައި ވަޒީފާނެތް މީހުންގެ ޢަދަދަށްބަލާއިރު މިދިޔަ މަހު އެޢަދަދު ވަނީ 8.7 މިލިއަން މީހުންނަށް ދަށްވެފައެވެ. މެއި މަހުގެ ހިސާބުތަކަށް ބަލާއިރު ވަޒީފާގެ ބާޒާރުގައި 9.2 މިލިއަން ހުސް ވަޒީފާ އޮތެވެ. ނަމަވެސް މި ވަޒީފާތަކުގެ ބޭނުން އެއްވެސް ބަޔަކު ނުކުރާތީ މިކަމާމެދު ގިނަ ބަޔަކު ދިޔައީ ބަހުސް ކުރަމުންނެވެ.
މިކަމުގެ ސަބަބެއް ކަމަށް ކަމާގުޅޭ މާހިރުން ލަފާކުރަނީ ބައެއް މަސައްކަތްތެރިން ވަޒީފާއިން އަވަހަށް ރިޓަޔަރކުރަން ބޭނުންވުމާއި، ވަޒީފާއަށް ދިއުމުން ކުދިން ބަލަހައްޓާނެ ގޮތެއް ނެތުމާއި، ކޮރޯނާ ވައިރަސް ޖެހިދާނެކަމުގެ ބިރަށްވެސް ބައެއް މީހުން ވަޒީފާތަކަށް ދާން ބޭނުންނުވުމެވެ. މިކަމުގެ ސަބަބުން ވަޒީފާތަކަށް މީހުން އިތުރަށް ޝައުޤުވެރިކުރުވުމަށް ބޯނަސް ނުވަތަ މުސާރައިގެ ކުރިއެރުން ދިނުމަށް ވިޔަފާރިތަކަށް ވަނީ މަޖްބޫރުވެފައެވެ. މިއާއެކު އަމިއްލަ ކުންފުނިތަކުގައި މަސަކަތްކުރާ ކޮންމެ ގަޑިއިރަކަށް 30.54 އެމެރިކާ ޑޮލަރު ޖުލައި މަހުވަނީ އިތުރުވެފައެވެ. މަސައްކަތަށް މާބޮޑު ހުނަރެއް ބޭނުންނުވާ އަދި މަދުން ޢާމްދަނީ ލިބޭ ވަޒީފާތަކުގެ ގަޑިއިރަކަށް ލިބޭ މުސާރަވެސް މިދިޔަ މަހު ވަނީ 25.83 އެމެރިކާ ޑޮލަރަށް އިތުރުވެފައެވެ.
އެމެރިކާއިން އެ ޤައުމުގެ ވަޒީފާގެ ބާޒާރަށް މިދިޔަ ޖޫންމަހުވެސް ވަނީ އިތުރު 850،000 ވަޒީފާ އިތުރުކޮށްފައެވެ.
ނަމަވެސް ކޯވިޑް ވައިރަހުގެ އައު ޑެލްޓާ ވޭރިއަންޓް އެމެރިކާގައި ހަލުއިކަމާއިއެކު ފެތުރެމުންދިއުމުގެ ސަބަބުން މިކަމުގެ އަސަރު އަންނަމަހު ވަޒީފާގެ ބާޒާރަށްވެސް ކުރާނެކަމަށް އެމެރިކާގެ އިޤްޠިޞާދީ މާހިރުން ދެކިލައްވައެވެ.