ތެލުގެ އަގުމަތިވުމާއި ތެލަށްއޮތް ޑިމާންޑްވެސް އުފުލިގެންދިއުމާއެކު ސަޢުދީ ޢަރަބިއާގެ ތެޔޮ އުފައްދާ ކުންފުނި އަރަމްކޯއަށް އަހަރުގެ ދެވަނަ ކުއާޓަރުގައި ފައިދާވެއްޖެއެވެ.
ދެވަނަ ކުއާޓަރުގައި ކުންފުންޏަށް ފައިދާވެފައިވާއިރު ކޯވިޑްގެ ބަލިމަޑުކަމުން ރައްކާތެރިވުމަށް އަޅާފައިވާ ފިޔަވަޅުތަކަށް ލުއިދީ، ވެކްސިންދޭ މިންވަރު އިތުރުވުމާއި މުހިންމު ބާޒާރުތަކުގައި އިޤްޠިޞާދީ ހަރަކާތްތައް ފެށުމަކީވެސް ކުންފުންޏަށް ފައިދާވި ސަބަބުތަކުގެ ތެރޭގައި ހިމެނޭ ކަންކަންކަމަށް އަރަމްކޯއިން ބުނެއެވެ.
މިއަހަރުގެ ޖޫން މަހުގެ ނިޔަލަށް އަރަމްކޯއަށް ވަނީ 25.46 ބިލިއަން އެމެރިކާ ޑޮލަރު ފައިދާގެ ގޮތުގައި ލިބިފައެވެ. މާހިރުން ލަފާކޮށްފައިވަނީ ކުންފުންޏަށް ފައިދާގެ ގޮތުގައި ލިބޭނީ 23.2 ބިލިއަން އެމެރިކާ ޑޮލަރުކަމަށެވެ.
މިއާއެކު އަހަރުގެ ފުރަތަމަ 6 މަސްދުވަހު ފައިދާގެ ގޮތުގައި ކުންފުންޏަށް ވަނީ 47.2 ބިލިއަން އެމެރިކާ ޑޮލަރު ލިބިފައެވެ. އަދި މިދިޔަ އަހަރުގެ މި މުއްދަތުގައި އަރަމްކޯއަށް ފައިދާގެގޮތުގައި ލިބިފައިވަނީ 23.2 ބިލިއަން އެމެރިކާ ޑޮލަރެވެ.
އަރަމްކޯއިން ނެރުނު ބަޔާނެއްގައި ކުންފުނީގެ ރައީސް އަދި ޗީފް އެކްޒެކްޓިވް އޮފިސަރ އަމީން ނަސީރު ވިދާޅުވީ ދެވަނަ ކުއާޓަރުގައި ކުންފުންޏަށް ލިބުނު ފައިދާއާއެކު އަހަރުގެ ފަހު ބައިގައި އަހަރުގެ ފަހުބަޔަށް ދާއިރު ކުންފުނި ވަރުގަދަކުރަން ފަސޭހަވެގެންދާނެކަމަށެވެ. މީގެއިތުރުން ދުވާލަކަށް 99 މިލިއަން ފީފާގެ ތެޔޮ މި އަހަރު ނިމޭއިރު ބޭނުންވާނެކަމަށާއި އަންނަ އަހަރު މިޢަދަދު 100 މިލިއަނަށް އަރާނެކަމަށްވެސް ސީއީއޯ ވިދާޅުވިއެވެ. އަދި އަރަމްކޯއިން މިހާރުވެސް ދަނީ ކުންފުނިން ބާޒާރަށް ނެރޭ ތެލުގެ މިންވަރު ދުވާލަކަށް 13 މިލިއަން ފީފާއަށް އިތުރުކުރުމަށް މަސައްކަތްކުރަމުން ކަމަށްވެސް އަރަމްކޯގެ ބަޔާނުގައި ސީއީއޯ ވަނީ ވިދާޅުވެފައެވެ.
ކޯވިޑްގެ ބަލިމަޑުކަމުގެ ސަބަބުން އޮގަނައިޒޭޝަން އޮފް ދަ ޕެޓްރޯލިއަމް އެކްސްޕޯޓިންގ ކަންޓްރީޒް (އޯޕެކް) އިންވަނީ ބާޒާރަށް ނެރޭ ތެލުގެ މިންވަރު ދަށްކޮށްފައެވެ. މިއާއެކު ތެލުގެ އަގު ދުވަހުން ދުވަހަށް ދިޔައީ އުފުލެމުންނެވެ. ނަމަވެސް ތެލާއި ބެހޭގޮތުން ރިޕޯޓްކޮށްފައިވާ އެންމެފަހުގެ ޚަބަރުތައް ބުނާގޮތުން މިއަހަރުގެ އޯގަސްޓްމަހުން ފެށިގެން ޑިސެމްބަރުމަހުގެ ނިޔަލަށް ދުވާލަކަށް 400000 ފީފާގެ ތެޔޮ ބާޒާރަށް ނެރުމަށް އޯޕެކް ޤައުމުތަކުން ވަނީ ނިންމާފައެވެ.