ކޮމްޕިއުޓަރ ޗިޕް ލިބުން ދަތިވުމާއެކު ޓޮޔޯޓޯގެ އުފެއްދުންތައް މަދުކުރަން ނިންމައިފި
ދުނިޔޭގެ ބާޒާރުގައި ކޮމްޕިއުޓަރ ޗިޕް ލިބުން ދަތިވުމާއިއެކު ޖަޕާނުގެ ކާރު އުފައްދާ ކުންފުނި ޓޮޔޯޓޯގެ އުފެއްދުންތައް 40 އިންސައްތައަށް މަދުކުރަން ނިންމައިފިއެވެ.
ޚަބަރުތައް ބުނާގޮތުން އަންނަ ސެޕްޓެމްބަރު މަހުން ފެށިގެން ޓޮޔާޓޯގެ އުފެއްދުންތައް މަދުކުރަން ނިންމާފައިވާއިރު މީގެކުރިން ކުންފުނިން ވަނީ ސެޕްޓެމްބަރުމަހު 900000 ކާރު އުފެއްދުމަށް ނިންމާފައެވެ. ނަމަވެސް މި ޢަދަދު މިހާރު ވަނީ 540000 އަށް މަދުކޮށްފައެވެ. އަދި ޖަޕާނުގެ ކާރުޚާނާތަކުގެ އުފެއްދުންތައްވެސް މިމަހު މަދުކުރަން ވަނީ ނިންމާފައެވެ.
ޗިޕް ލިބުން ދަތިވުމުގެ އިތުރުން އޭޝިއާގައި މިހާރު ފެތުރެމުންދާ ކޯވިޑްގެ ބަލިމަޑުކަމަކީވެސް ކުންފުނީގެ އުފެއްދުންތައް މަދުކުރަން ނިންމި އެއް ސަބަބެވެ. ޓޮޔޯޓޯގެ އިތުރުން ދުނިޔޭގެ ދެވަނައަށް އެންމެ ގިނައިން ކާރު އުފައްދާ ކުންފުނި ވޯކްސްވާގަންއިންވެސް އެކުންފުނީގެ އުފެއްދުން މަދުކުރަން ޖެހިދާނެކަމަށް ވަނީ ބުނެފައެވެ. އެ ކުންފުނިން ވަނީ މީގެކުރިންވެސް މިއަހަރު ކުރީކޮޅު ކުންފުނީގެ އުފެއްދުންތައް މަދުކޮށްފައެވެ.
ޓޮޔޯޓޯގެ އެހެން ވާދަވެރިންކަމުގައިވާ ޖެނެރަލް މޮޓޯސް، ފޯޑް، ނިސާން، ޑޭމްލަރ، ބީއެމްޑަބްލިޔު އަދި ރޭނޯއިންވެސް ވަނީ ޗިޕް ލިބުން ދަތިވުމާއިއެކު ކުންފުނިތަކުގެ އުފެއްދުންތައް މަދުކޮށްފައެވެ.
ނަމަވެސް ޓޮޔޯޓޯއިން ގިނަ ޢަދަދަކަށް ޗިޕް ރައްކާކޮށްފައި ހުރުމުގެ ސަބަބުން މިހާތަނަށް އައިއިރު އެ ކުންފުނީގެ އުފެއްދުންތައް މަދުކޮށްފައެއް ނުވެއެވެ،
ދުނިޔޭގެ ބާޒާރުން ޗިޕް ލިބުން ދަތިވުމުގެ ސަބަބުން ގިނަ ވިޔަފާރިތަކަށް ވަނީ އަސަރުކޮށްފައިވާއިރު ކޮމްޕިއުޓަރ ޗިޕް ލިބުމުގައި ދަތިތަކެއް އުޅެނީ އިލެކްޓްރޯނިކް ސާމާނުތަކަށް އޮތް ޑިމާންޑާއި އެއްވަރަށް ކޮމްޕިއުޓަރ ޗިޕް އުފެއްދުމަށް ކޯވިޑްގެ ސަބަބުން ދަތިތަކެއް ކުރިމަތިވެގެންކަމަށް ޚަބަރުތައް ބުނެއެވެ.