މޯލްޑިވްސް އިސްލާމިކް ބޭންކް، އެމްއައިބީގެ ފައިނޭންސިންގ ފެސިލިޓީ، "އުޖާލާ ދިރިއުޅުން'އަށް ބައިނަލްއަގްވާމީ އެވޯޑެއް ލިބިއްޖެއެވެ.
އެމްއައިބީއަށް ލިބިފައިވަނީ އިސްލާމިކް ފައިނޭންސްގެ އެންމެ އީޖާދީ ޕްރޮޑަކްޓްގެ އެވޯޑެވެ. މި އެވޯޑް އެމްއައިބީން ހާސިލްކުރީ 55 ގައުމެއްގެ އިސްލާމިކް ބޭންކުތަކާއި ވާދަކޮށްގެނެވެ.
އެމްއައިބީއާ މި އެވޯޑް ހަވާލްކޮށްފައިވަނީ އުޒްބަކިސްތާނުގެ ޓަޝްކްނެޓްގައި ބޭއްވި އައިއެސްޑީބޭގެ 46 ވަނަ އަހަރީ ބައްދަލުވުމުގައެވެ.
އެމްއައިބީއަށް މި އެވޯޑު ލިބުނީ އުޖާލާ ދިރިއުޅުން ފެސިލިޓީއަށް ގެނައި އިޖާދީ ބަދަލުތަކުގެ ސަބަބުން ކަމަށް އެ ބޭންކުން ހާމަކުރެއެވެ. އެގޮތުން އެމްއައިބީން ވަނީ މިއަހަރުގެ މާރޗުމަހުގެތެރޭގައި އުޖާލާ ދިރިއުޅުން ފެސިލިޓީއަށް ގިނަ ބަދަލުތަކެއް ގެނެސްފައެވެ.
ފެސިލިޓީއަށް ގެނެސްފައިވާ ބައެއް ބަދަލުތަކުގެތެރޭގައި ބޭންކުން ކަސްޓަމަރަށް 6 މަސްދުވަހު ބޭނުންކުރެވޭ ލިމިޓެއް ދިނުމާއި، ކޯޓޭޝަން ލާ ދުވަހު މުދާ ދޫކުރުމާއި، ބޭންކުގެ އެޖެންޓެއްގެ ހައިސިއްޔަތުން މުދާ ހަވާލުވުމުގެ ބާރު ކަސްޓަމަރަށް ލިބިގެން ދިޔުން ހިމެނެއެވެ.
އެމްއައިބީން ވަނީ ހިޔާ ފްލެޓް ލިބުނު ފަރާތްތަކަށް އުޖާލާ ދިރިއުޅުމުގެ ދަށުން ފަރުނީޗަރާއި، ގެއަށް ބޭނުންވާ އެހެން ސާމާނާއި، ޓައިލްސް، ސިމެންތި، ކުލަ ފަދަ ސާމާނުވެސް ލިބޭނެ އިންތިޒާމް ހަމަޖައްސާފައެވެ. އަދި ހިޔާ ފްލެޓް ނިންމުމުގެ މަސައްކަތް ކުރާ ކުންފުނިތަށް ބޭންކުގައި ރަޖިސްޓާރ ކޮށްދިނުމަށް ޙާއްސަ މަސައްކަތްތަކެއް އެމްއައިބީން ދަނީ ކުރަމުންނެވެ.
އެމްއައިބީގައި ބޭނުންކުރާ ހުރިހާ ޕްރޮޑަކްޓްތަކަކީވެސް ޝަރިއާ ހުއްދަ ކުރާ އުސޫލުން ރާއްޖޭގެ މާހައުލާއި ގުޅޭނެގޮތަށް ބައްޓަން ކުރެވިފައިވާ ޕްރޮޑަކްޓްތަކެކެވެ.