ރާއްޖޭގައި ޑިޖިޓަލް ބޭންކެއް އޮޕަރޭޓްކުރުމުގެ ލައިސަންސަށް އެދި އެސްޓީއޯއިން ހުށަހަޅައިފިއެވެ. ލައިސަންސަށް އެދޭ ފޯމް އެސްޓީއޯގެ ފަރާތުން އެމްއެމްއޭއަށް ހުށަހެޅުއްވީ އެކުންފުނީގެ މެނޭޖިންގ ޑިރެކްޓަރ ހުސެއިން އަމްރުއެވެ.
ލައިސަންސަށް އެދި ހުށަހެޅުމަށްފަހު މީޑިއާ އާއި ވާހަކަދައްކަވަމުން މެނޭޖިންގ ޑިރެކްޓަރ ހުސެއިން އަމްރު ވިދާޅުވީ ކުރިއަށް އޮތް ތިން މަސް ދުވަސްތެރޭ ލައިސަންސް ލިބޭނެ ކަމަށް ލަފާ ކުރެވޭ ކަމަށެވެ. އަދި އެއަށްފަހު އެސްޓީއޯގެ ދަށުން ޑިޖިޓަލް ބޭންކިންއަށް ޚާއްސަ ސަބްސިޑަރީ ކުންފުންޏެއް ރަޖިސްޓްރީ ކުރުމުގެ މަސައްކަތް ފެށިގެންދާނެކަމަށެވެ. އަދި އަންނަ އަހަރުތެރޭ މި ބޭންކުގެ ޚިދުމަތްތައް ފެށޭނެ ކަމަށް ލަފާކުރެވޭ ކަމަށްވެސް އަމްރު ވިދާޅުވިއެވެ.
" ވަރަށް ރަނގަޅު ޓީމެއް ބޭނުންވޭ މިވަރުގެ ބޭންކެއް ހިންގުމަށް، އެންމެ ޓޮޕް ލެވަލްއަށްވެސް، ބޭރުގެ ފަރާތްތައްވެސް އެބަ ހޯދަން، ލައިސަންސް ލިބުނީމަ އެމީހުންނަށްވެސް ދޭން ޖެހޭ ވަގުތުކޮޅެއް އެކޮޅުގައި ރިޒައިންކޮށްފައި މިކޮޅަށް އަންނަން، އަންނަ އަހަރުތެރޭ މި ބޭންކުގެ ޚިދުމަށް ފެށިގެންދާނެ ކަމަށް،" އަމްރު ވިދާޅުވިއެވެ.
އަމްރުވަނީ މިބޭންކު އޮޕަރޭޓްކުރާނެ ގޮތުގެ ތަފްސީލްވެސް ދެއްވާފައެވެ. އެގޮތުން މި ބޭންކުގެ ހުރިހާ ޚިދުމަތެއްވެސް ކުރިއަށްދާނީ ޑިޖިޓަލްކޮށް ކަމަށް އަމްރު ވިދާޅުވިއެވެ.
" މި ބޭންކުގައި 5 މިނެޓްތެރޭ އަމިއްލައަށް އެކައުންޓު ހުޅުވާލެވޭނެ، 60 ސިކުންތުތެރޭ ލޯނަށް އެޕްލައިކޮށްފައި، ލޯން ބޭންކު އެކައުންޓަށް ޖަމާވާނެ، މީގަ އެންމެ ބޮޑު ކަމަކީ އަމިއްލައަށް ފައިނޭންސް މެނޭޖްކުރެވުން، ބޭންކަކަށް ދާން ނުޖެހި ހުރިހާ ކަމެއްވެސް އަމިއްލައަށް ކުރެވުން،" އަމްރު ވިދާޅުވިއެވެ.
ދުނިޔޭގައިވެސް ޑިޖިޓަލް ބޭންކިންގ ދާއިރާއަކީ ކުރިއަރަމުން އަންނަ ދާއިރާއެއް ކަމަށާއި، ކުރީ ސަފުގައި ރާއްޖެއިން މިކަންކޮށްފި ނަމަ ދުނިޔޭގެ ފެންވަރުގައިވެސް ރަނގަޅު ބޭންކަކަށް މި ބޭންކު ވެގެންދާނެ ކަމަށް ޤަބޫލްކުރެވޭ ކަމަށް އަމްރު ވިދާޅުވިއެވެ. އަމްރު ވިދާޅުވީ ބޭންކެއް ފެށުމަށް ބޭނުންވާ ކެޕިޓަލްވެސް އެ ކުންފުނީގައި އެބަހުރި ކަމަށެވެ.
އެސްޓީއޯއިން މިހާރުވެސް ވިޔަފާރީގެ ގިނަ ދާއިރާތަކެއްގައި ދަނީ ހަރަކާތްތެރިވަމުންނެވެ. އޭގެތެރޭގައި ކާބޯތަކެތި ވިއްކުމުގެ ވިޔަފާރިއާއި، ގޭތެރެއަށް ބޭނުންވާ ސާމާނާއި، ޕެޓްރޯލް އަދި ޑީސަލްވެސް އެސްޓީއޯއިން ދަނީ ވިއްކަމުންނެވެ.