ރާއްޖެއަކީ އެންމެ މަގްބޫލު އަދި ރައްކާތެރި މަންޒިލްގެ ގޮތުގައި އިޝްތިހާރުކުރުމަށް އިޓަލީގެ މަޝްހޫރު ޓްރެވެލް އޭޖެންސީއެއްކަމުގައިވާ "އީޒީ މާކެޓް"އާ ގުޅިގެން ވިޒިޓް މޯލްޑިވްސްއިން ކެމްޕެއިނެއް ފަށައިފިއެވެ.
ސެޕްޓެމްބަރުމަހުން ފެށިގެން އެއް މަސްދުވަހުގެ މުއްދަތަކަށް ކުރިއަށްދާ މި ކެމްޕެއިންގައި ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި ހިދުމަތް ލިބިގަންނަ ފަރާތްތަކުގެ މެދުގައި އެންމެ މަގްބޫލް އަދި ރައްކާތެރި މަންޒިލްގެ ގޮތުގައި ރާއްޖެ އިޝްތިހާރުކުރުމަށް ތަފާތު ހަރަކާތްތައް ކުރިއަށްގެންދިޔުމަށް ރާވާފައިވާކަމަށް ވިޒިޓް މޯލްޑިވްސްއިން މައުލޫމާތުދެއެވެ.
ފަތުރުވެރިން އަދި ފަތުރުވެރިކަމުގެ ދާއިރާގައި ހަރަކާތްތަރިވާ ފަރާތްތަކަށް އަމާޒުކޮށް އަމާޒުކޮށް ހިންގާ މި ކެންޕެއިންގެ ތެރެއިން އީޒީ މާކެޓްގެ ވެބްސައިޓްތަކާއި، ސޯޝަލް މީޑީއާ އަދި އީމެއިލް މާކެޓިންގެ ޒަރިއްޔާއިން ރާއްޖެ އިޝްތިހާރުކުރުމުގެ އެކި ހަރަކާތްތައް ކުރިއަށް ގެންދާނެއެވެ.
މީގެ އިތުރުން ގުދުރަތީގޮތުން ރާއްޖޭގެ ރަށްތައް އުފެދިފައިވަނީ ވަކިވަކި ރަށްތަކެއްގެ ގޮތުގައިކަމަށްވާތީ، އެކަމުގެ ސަބަބުން ފަތުރުވެރިންނަށް ލިބޭ ރައްކާތެރިކަމާއި ރާއްޖެއިން އިޓަލީ ފަތުރުވެރިންނަށް ލިބެން ހުންނަ ތަފާތު ތަޖުރިބާތައް މިކެންޕެއިންގެ ތެރެއިން އިޝްތިހާރުކުރާނެއެވެ. އަދި ރާއްޖޭގެ ރިޒޯޓު، ހޮޓަލް، ގެސްޓްހައުސް އަދި ލިވްއަބޯޑުގައި އެޅިފައިވާ ރައްކާތެރިކަމުގެ ފިޔަވަޅުތަކާއި، މަންޒިލްގެ އެންމެ ފަހުގެ މައުލޫމާތު މިކެންޕެއިންގެ ތެރެއިން އިޓަލީ މާކެޓަށް އަންގައިދޭނެ ކަމަށް ވިޒިޓް މޯލްޑިވްސްއިން ހާމަކުރެއެވެ.
20 އަހަރުދުވަހުގެ ތަޖުރިބާއާއެކު، އީޒީ މާކެޓަކީ އިޓަލީގައި އެންމެ ކުރިއަރާފައިވާ އެއް ޓްރެވަލް އެޖެންސީއެވެ. ފަތުރުވެރިކަމުގެ ދާއިރާގެ ގިނަ ހިއްސާދާރުންނާއި ގުޅުން ބަދަހި އެ ކުންފުންޏާ ގުޅިގެން ހިންގޭ މި ކެމްޕޭންގެ ސަބަބުން އިޓަލީއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމަށް ވިޒިޓް މޯލްޑިވްސްއިން ލަފާކުރެއެވެ.
އިޓަލީއަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ 10 ޤައުމުގެތެރޭގައި ހިމެނޭ ޤައުމެކެވެ.