އޭވިއޭޝަން ސިނާޢަތުގައި އުޅޭ މުވައްޒަފުންނަށް އިނާޔަތްތައްދޭ މުއްދަތު ސިންގަޕޫރުން އިތުރުކޮށްފި
އޭވިއޭޝަން ކުންފުނިތަކަށާއި މުވައްޒަފުންނަށް އެހީތެރިވުމުގެގޮތުން ސިންގަޕޫރުގެ އޭވިއޭޝަން ސިނާޢަތުގައި އުޅޭ މުވައްޒަފުންނަށް ސަރުކާރުންދެމުންދާ އިނާޔަތްތައް ދިނުން އިތުރު 6 މަސްދުވަސްވަންދެން ދޭނެކަމުގައި ސިންގަޕޫރުގެ ސިވިލްއޭވިއޭޝަން އޮތޯރިޓީ (ސީއޭއޭއެސް)އިން ބުނެފިއެވެ.
މިކަމާއިގުޅިގެން ސީއޭއޭއެސް އިން ނެރުނު ބަޔާނެއްގައި ބުނެފައިވާގޮތުގައި މިގޮތަށް ނިންމާފައިވަނީ ކުންފުނިތައް އަލުން އާރާސްތުކުރުމަށް ދެމެހެއްޓުމުގެގޮތުންނެވެ.
އަދި މި އަހަރުގެ އޮކްޓޫބަރުން ޑިސެމްބަރު މަހަށް ސިންގަޕޫރުގެ ކުންފުނިތަކަށް ދޭ 46000 އެމެރިކާ ޑޮލަރުގެ 30 އިންސައްތަ އެހީ ޝަރުޠު ހަމަވާ ކުންފުނިތަކަށް ލިބޭނެއެވެ. އަދި އަންނަ އަހަރުގެ ޖެނުއަރީ އިން މާޗް އަށް ލިބޭނީ 4600 އެމެރިކާ ޑޮލަރުގެ 10 އިންސައްތައެވެ.
މިއާއިއެކު ސަރުކާރުންދޭ މި އެހީގެ ސަބަބުން އޭވިއޭޝަންޞިނާޢަތުގެ 100 އަށްވުރެ ގިނަ ކުންފުންޏަށް ފައިދާވެގެންދާނެއެވެ. އަދި މިކަމަށް ގާތްގަޑަކަށް 130 މިލިއަން އެމެރިކާ ޑޮލަރު ސިންގަޕޫރު ސަރުކާރުން ހޭދަކުރާނެއެވެ.
ސަރުކާރުގެ ބަޖެޓްގައި މި އެހީ ހިމަނާފައިވަނީ ވަންއޭވިއޭޝަން ސަޕޯޓްގެގޮތުގައި އޭވިއޭޝަން ޞިނާޢަތުގެ ކުންފުނިތަކަށް އެހީތެރިވެ އޭވިއޭޝަންގެ މައި މަރުކަޒެއްގެގޮތުގައި ސިންގަޕޫރު ހެދުމުގެ މަޤްޞަދުގައިކަމަށްވެސް ސީއޭއޭއެސް އިން ބުނެއެވެ. މުސާރައިގެ އެހީގެ އިތުރުން އޭވިއޭޝަން ސެކްޓަރުގެ ކުންފުނިތަކަށް އެންހޭންސްޑް ޓްރެއިނިންގް ސަޕޯޓް ޕެކޭޖްގެ ދަށުން ތަމްރީންތައްވެސް ލިބިގެންދާނެއެވެ.
ކޯވިޑްގެ ބަލިމަޑުކަމުގެ ސަބަބުން އެންމެބޮޑަށް އަސަރޮކޮށްފައިވާ އެއް ޞނާޢަތަކީ އޭވިއޭޝަން ޞިނާޢަތްކަމަށާއި އަދި މި ސެކްޓަރުން ގިނަ ޢަދަދެއްގެ މުވައްޒަފުންވެސްވަނީ މަދުކުރަންޖެހިފައިވާކަމަށް ސީއޭއޭއެސްއިން ބުނެއެވެ.
ސިންގަޕޫރު ސަރުކާރުންދޭ މި އެހީއާއިގުޅިގެން ސީއޭއޭއެސްގެ ޑިރެކްޓަރ ޖެނެރަލް މިސްޓަރ ހޭން ޖުއާން ވިދާޅުވީ މި އެހީގެ ސަބަބުން އޭވިއޭޝަން ކުންފުނިތަކަށް ދިމާވެފައިވާ ދަތިތަކުން އަރަގަނެވި އަލުން އާރާސްތުވުމަށް ފަސޭހަވެގެންދާނެއެވެ.