2022 ވަނަ އަހަރަށް ލަފާކުރާ ބަޖެޓް އިންޑޮނޭޝިޔާގެ ޤާނޫނުހަދާ މަޖިލީހުގެ ބަޖެޓް ކޮމެޓީން އަންގާރަ ދުވަހު ފާސްކޮށްފިއެވެ.
އިންޑޮނޭޝިޔާއަށް އަންނަ އަހަރަށް 190.40 ބިލިއަން އެމެރިކާ ޑޮލަރުގެ ބަޖެޓެއް ފާސްކުރުމަށް މަޖިލީހުގެ ބަޖެޓް ކޮމިޓީޏް ފާސްކޮށްފައިވާއިރު ބަޖެޓްގެ މަޤްޞަދަކީ އިޤްޠިޞާދީގޮތުން އަންނަ އަހަރު އެ ޤައުމު އާރާސްތުކޮށް ޖީޑީޕީ 5.2 އިންސައްތައަށް އިތުރުކުރުން ކަމުގައި ބަޖެޓް ކޮމެޓީގެ ޗެއަރމަން ސަޢީދު ޢަބްދުﷲ ވިދާޅުވިއެވެ.
ޚަރަދުވާނެކަމަށް ލަފާކޮށް ރައީސް ޖޯކޯ ހުށަހަޅުއްވާފައިވާ 2714 ޓްރިލިއަން އިންޑޮނޭޝިޔާ ރުޕިއާއަކީ އޯގަސްޓްމަހު ހުށަހަޅުއްވާފައިވާ 2708.7 ޓްރިލިއަން ރުޕިއާއަށްވުރެ ބޮޑު ޢަދަދެކެވެ. އަންނަ އަހަރަށް ދަޢުލަތަށް ލިބޭނެކަމަށް ލަފާކޮށްފައިވާ ޢާމްދަނީއަކީ 1846 ޓްރިލިއަން އިންޑޮނޭޝިޔާ ރުޕިއާ ކަމުގައިވެސް ބަޖެޓް ކޮމެޓީއިން ވަނީ ފާސްކޮށްފައެވެ.
މީގެއިތުރުން ބަޖެޓް ދަރަނީގެގޮތުގައި ފާސްކޮށްފައިވާ 4.85 އިންސައްތައަކީވެސް މިއަހަރު ލަފާކޮށްފައިވާ 5.2 އިންސައްތައަށްވުރެ ދަށް ޢަދަދެކެވެ. އަދި ރައީސް ޖޯކޯ ގެ ބަޖެޓް ޕްރޮޕޯސަލްގައިވާގޮތުން 2023 ވަނަ އަހަރު އަންނަންވާއިރަށް ބަޖެޓް ދަރަނި 3 އިންސައްތައަށް ކުޑަކުރުމަށް މަސައްކަތްކުރާނެކަމަށް ވަނީ ވިދާޅުވެފައެވެ.
ބަޖެޓް ކޮމެޓީން ބަޖެޓް ފާސްވެފައިވީ ކަމުގައިވިޔަސް މުޅި ޤާނޫނުހަދާ މަޖިލީހުން އަދި ބަޖެޓް ފާސްކުރަންޖެހެއެވެ. އާއްމު ގޮތެއްގައި ބަޖެޓް ކޮމިޓީގެ ރިޕޯޓް މަޖިލީހުގެ ތަޅުމުން ފާސްވާން އުނދަގޫތަކެއް ކުރިމައްޗެއް ނުވާނެއެވެ.
އިންޑޮނޭޝިއާގެ މާލީ ވަޒީރު ސްރީ މުލްޔާނީ އިންދްރާވަތީ ވިދާޅުވިގޮތުގައި އިންޑޮނޭޝިއާގެ އިޤްޠިޞާދު އާރާސްތުކޮށް ބަޖެޓް ޙާލަތު ރަނގަޅުކުރުމަށް އަންނަ އަހަރަކީ އިންޑޮނޭޝިއާއަށް ވަރަށް މުހިންމު އަހަރެކެވެ.
ދެކުނު އިރުމަތީ އޭޝީއާގެ އެންމެ ބޮޑު އިޤްޠިޞާދެއް އޮންނަ އިންޑޮނޭޝިއާގެ އިޤްޠިޞާދު ވަނީ މި އަހަރުގެ ދެވަނަ ކުއާޓަރުގައި ހީނަރުކަމުން އަރައިގަނެފައެވެ.