ބައިނަލްއަޤުވާމީ ބައެއް ދަތުރުތައް ފަށަން ރާވާފައި އޮތް މުއްދަތަށްވުރެ އަވަހަށް ދަތުރުތައް ފަށާނެކަމަށް އޮސްޓްރޭލިއާގެ ކުއަންޓަސް އެއަރލައިންއިން ބުނެފިއެވެ.
ކުއަންޓަސްއިން މިހެން ބުނެފައިމިވަނީ އޮސްޓްރޭލިއާގައި ވެކްސިން ފުރިހަމަކޮށްފައިވާ ފަރާތްތަކަށް އެ ޤައުމުން އެތެރެވުމާއި ބޭރުންވުން އަންނަ ނޮވެމްބަރުމަހުން ފެށިގެން ހުއްދަކުރާނެކަމަށް އެ ޤައުމުގެ ސަރުކާރުން ބުނުމާއި ގުޅިގެންނެވެ.
ކުއަންޓަސްގެ ބައިނަލްއަޤުވާމީ ދަތުރުތައް ހަމަޖެހިފައިވާ ގޮތުން އޮސްޓްރޭލިއާގެ ސިޑްނީން ލަންޑަންއަށް ކޮންމެ ހަފްތާއަކު 3 ފަހަރު ދަތުރުކުރާނެއެވެ. އަދި ސިޑްނީން ލޮސް އެންޖަލިސްއަށްވެސް ކޮންމެ ހަފްތާއަކު 3 ދަތުރު ކްވަންޓަސްއިން ދަތުރުކުރާނެއެވެ.
މި ދަތުރުތައް ފަށަން ހަމަޖެހިފައިވަނީ އަންނަ ނޮވެމްބަރުމަހު 14 ވަނަ ދުވަހުން ފެށިގެންނެވެ. އަދި ދަތުރުތަކަށް އޮންނަ ޑިމާންޑް އުފުލޭނަމަ ފްލައިޓްތައް އިތުރުކުރާނެކަމަށްވެސް އެ އެއަރލައިނުން ބުނެއެވެ.
މީގެއިތުރުން އޮސްޓްރޭލިއާއަށް ދަތުރުކުރާ ހުރިހާ ފަރާތްތަކުންވެސް 7 ދުވަހުގެ މުއްދަތަށް ގޭގައި އެކަހެރިވެ ތިބެންޖެހެއެވެ.
ކުއަންޓަސްގެ ދަތުރުތައް އަލުން ފަށަން ތައްޔާރުވެފައިވާއިރު ބައިނަލްއަޤުވާމީ ބައެއް ފްލައިޓްތައް މިހާރުވެސް ޑިސެމްބަރުމަހަށް ވަނީ ބުކްކޮށްފައެވެ. އަދި ލޮސް އެންޖަލިސް އަދި ލަންޑަންގެ ދަތުރުތަކަށް ޑިމާންޑް އުފުލެމުންދާކަމަށްވެސް ކުއަންޓަސްއިން ބުނެއެވެ.