ސަޢުދީ އަރަބިއްޔާގެ ޖަޒާން ސީޓީގައި ހުންނަ ކިންގް ޢަބްދުﷲ އެއަރޕޯޓަށް ދިން ބޮމުގެ ޙަމަލާ ދިވެހި ސަރުކާރުން ކުށްވެރިކޮށްފިއެވެ.
ޔަމަނުގެ ހޫތީ ހަނގުރާމަވެރިންތަކެއް ގޮވާ ޒާތުގެ ޑްރޯން ބޭނުންކޮށްގެން މިމަހުގެ 8 ވަނަ ދުވަހު ކިންގް ޢަބްދުﷲ އެއަރޕޯޓަށް ދިން ބޮމުގެ ޙަމަލާގައި 10 މީހަކު ޒަޙަމްވެފައިވާކަމަށް ސަޢުދީގެ މީޑިއާތަކުން ރިޕޯޓްކޮށްފައިވެއެވެ.
މި ޙަމަލާ ކުށްވެރިކުރައްވާ ދިވެހި ސަރުކާރުން ނެރުނު ބަޔާނުގައި އެއަރޕޯޓްތައް ފަދަ އާއްމު ޚިދުމަތްތައް ފޯރުކޮށްދޭ ތަންތަނަށް ގަސްތުގައިދޭ މިފަދަ ޙަމަލާތަކަކީ އެއްވެސް ޙާލެއްގައި ބަލައިގަނެވޭނެ ކަމެއްނޫންކަމަށާއި، އެއީ ބައިނަލްއަޤްވާމީ ޤާނޫނުތަކާއި އުޞޫލުތަކާވެސް ކަނޑައެޅިގެން ޚިލާފު ކަމެއްކަމަށް ވިދާޅުވެފައިވެއެވެ.
"Gov't of Maldives strongly condemns the hostile attack on King Abdullah Airport in Jazan, Saudi Arabia with the use of bomb-laden drone on 8 October"
— Ministry of Foreign Affairs ?? (@MoFAmv) October 10, 2021
? Statement by the Government of #Maldives on the hostile attack on King Abdullah Airport | https://t.co/lq66OWmdvF pic.twitter.com/MoXTJ5Cx3C
މިކަން ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކުރާ ކަމަށާއި، ޓެރެރިޒަމަށް ހިތްވަރުދޭ މިބާވަތުގެ ފިނޑި ޢަމަލުތަކަށް ރާއްޖޭން ހިތްވަރު ނުދޭކަމަށްވެސް ދިވެހި ސަރުކާރުން ނެރުނު ބަޔާނުގައި ވިދާޅުވެފައިވެއެވެ.
މިފަދަ ހަމަލާތަކަކީ އެތައް ބައެއްގެ ފުރާނަ ނުރައްކަލަ ހުށަހެޅި، ސަރަޙައްދުގެ ސުލްޙަ މަސަލަސްކަން ގެއްލޭނެފަދަ ނުރައްކާތެރި ހަމަލާތަކެއްކަން ފާހަގަކުރައްވާ، މިފަދަ ކަންކަމުންވެސް ޓެރަރިޒަމާ ދެކޮޅަށް މަސައްކަތްކުރުމުގެ މުހިއްމުކަން ހާމަވާކަމަށް ދިވެހި ސަރުކާރުން ވިދާޅުވެއެވެ. އަދި މިފަދަ ކަންކަމަށް އަވަސް ހައްލުތަކެއް ހޯދާ، ސުލްހަ މަސަލަސްކަމާއި އަމަންއަމާންކަން ޤާއިމުކުރުމަށް މުހިއްމު ފިޔަވަޅުތަކެއް އަޅަންޖެހޭކަން ބަޔާނުގައި ވަނީ ފާހަގަކުރައްވާފައެވެ.