ޓްރީ ޓޮޕް ހޮސްޕިޓަލުން އަންހެނުންނާއި ކުޑަކުދިންނަށް ޚާއްސަ ޞިއްޙީ ޚިދުމަތް ފޯރުކޮށްދޭ ސެންޓަރެއް ހުޅުވައިފިއެވެ. މި ސެންޓަރު ރަސްމީކޮށް ހުޅުވައިދެއްވީ، ޓްރީ ޓޮޕް ހެލްތުގެ މެނޭޖިންގ ޑިރެކްޓަރ އަޙްމަދު ނަޒީރެވެ.
ޓްރީ ޓޮޕް ހޮސްޕިޓަލުގެ އޮބްސްޓެޓްރިކްސް، ޕީޑިއެޓްރިކްސް އަދި ގައިނަކޮލޮޖީ ޑިޕާޓްމަންޓްތަކުގެ ފަރާތުން ތަޢާރަފުކުރި އަންހެނުންނާއި ކުޑަކުދިންނަށް ޚާއްސަ ޞިއްޙީ ޚިދުމަތް ފޯރުކޮށްދޭ ސެންޓަރު ހުޅުވާފައިވަނީ ހޮސްޕިޓަލުގެ 3 ވަނަ ފަންގިފިލާގައެވެ.
މި ސެންޓަރު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ޓްރީ ޓޮޕް ހެލްތުގެ މެނޭޖިންގ ޑިރެކްޓަރ އަޙްމަދު ނަޒީރު ވިދާޅުވީ، ޓްރީ ޓޮޕް ހޮސްޕިޓަލް މެނޭޖްކުރުމުގައި ހިއްސާވާ 4 ކުންފުންޏަކީވެސް ފަތުރުވެރިކަމުގައި ހަރަކާތްތެރިވާ ކުންފުނިތަކަކަށްވީ ނަމަވެސް، މިހޮސްޕިޓަލް ވުޖޫދުވުމުގެ އެންމެ މުހިއްމު ބޭނުމަކަށްވީ ރާއްޖޭގެ ޞިއްޙީ ދާއިރާ ކުރިއެރުވުންކަމަށެވެ. އަދި ހޮސްޕިޓަލް ހިންގަން ފެށުމާއެކު މިވީ ކުރު މުއްދަތުގެ ތެރޭގައިވެސް، ތަފާތުތަކެއް މި ދާއިރާއިން ގެނެވިފައިވާކަމަށް ޤަބޫލުކުރައްވާކަމަށް ނަޒީރު ވިދާޅުވިއެވެ.
ކުޑަކުދިންނާއި، އަންހެނުންގެ ބަލިތަކަކީވެސް ވަރަށް ގިނަ ބަޔަކު ޚިދުމަތް ހޯދާ ދާއިރާއެއްކަމުން، މި ދާއިރާއަށް ޚާއްސަ ސެންޓަރެއް ޤާއިމުވެގެން ދިއުމަކީ ހޮސްޕިޓަލުގެ ޚިދުމަތްތަކަށްވެސް ލިބުނު އިތުރު ފުރިހަމަކަމަކާއި، ކުރިއެރުމެއްކަމަށްވެސް ނަޒީރު ވިދާޅުވިއެވެ.
"އަޅުގަނޑުމެންގެ އުއްމީދަކީ މި ސެންޓަރު މެދުވެރިކޮށް ފެންވަރު ރަނގަޅު ޚިދުމަތެއް އާއްމުންނަށް ފޯރުކޮށްދެވުން. މިއީ ހޮސްޕިޓަލުގެ ކުރިއެރުމަށްވެސް އެޅުނު މުހިއްމު ފިޔަވަޅެއް" ނަޒީރު ވިދާޅުވިއެވެ.
އަންހެނުންނާއި ކުޑަކުދިންގެ ޞިއްޙަތާބެހޭ ސެންޓަރުގައި ޑޮކްޓަރަށް ދެއްކުމަށް 13 ކޮންސަލްޓޭޝަން ރޫމާއި، ޚިދުމަތައް ޚާއްސަ ވައިޓަލްސް ބަލާ ކޮޓަރިއަކާއި، ބޭބީ ނާސަރީ، ބްރެސްޓް ފީޑިން އަދި ބޭބީ ޗޭންޖިންގް ކޮޓަރިއެއްގެ އިތުރުން އަލްޓްރާސައުންޑު ޚިދުމަތްދޭ ކޮޓަރި، އަދި ފޮޓޯތެރަޕީ ޔުނިޓެއް ހިމެނެއެވެ. މިފަދަ ސެންޓަރެއް ހުޅުވުމުގެ އެންމެ ބޮޑު ބޭނުމަކީ އެއްތަނަކުން ފަސޭހަކަމާއިއެކު ހުރިހާ ޚިދުމަތެއް ފޯރުކޮށްދިނުން ކަމަށް ޓްރީ ޓޮޕް ހޮސްޕިޓަލުން ބުނެއެވެ.
ޓްރީ ޓޮޕް ހޮސްޕިޓަލުން އަލަށް ހުޅުވި މި ސެންޓަރުގެ ޚިދުމަތް ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 8 އިން ރޭގަނޑު 8 އަކަށް ލިބޭނެއެވެ. މި ސެންޓަރުން ކުރިމަގުގައި އިންޓަރ ޔުޓެރިން އިންސެމިނޭޝަން، އައި.ޔޫ.އައި އަދި އިންވީޓްރޯ ފާޓިލައިޒޭޝަން، އައި.ވީ.އެފްގެ ޚިދުމަތްތައްވެސް ތަޢާރަފްކުރުމަކީ އަމާޒެއްކަމަށް އެ ހޮސްޕިޓަލުން ބުނެއެވެ.
އަންހެނުންނާއި ކުޑަކުދިންނަށް ހާއްސަ ސިއްހީ ސެންޓަރުގެ ހިދުމަތް ފުޅާކޮށްފައިވާއިރު ޓްރީ ޓޮޕް ހޮސްޕިޓަލުގެ އޮބްސްޓެޓްރިކްސް، ޕީޑިއެޓްރިކްސް އަދި ގައިނަކޮލޮޖީގެ ޚިދުމަތްތަކަށް އާއްމުންގެ ފަރާތުން ބޮޑު ތަރުހީބެއް ލިބެމުން އަންނަކަން ޓްރީ ޓޮޕް ހޮސްޕިޓަލުން ފާހަގަކުރެއެވެ.