ރާއްޖޭގައި މަސައްކަތްކުރާ ބިދޭސީންނަށް އަމާޒުކޮށް ޤާނޫނީ ގޮތުން ހޭލުންތެރިކުރުވުމަށާއި، ޤާނޫނީ އެހީތެރިކަން ފޯރުކޮށްދިނުމުގެ މަޤުޞަދުގައި ޕަބްލިކް އިންޓްރެސްޓް ލޯ ސެންޓަރ (ޕީ.އައި.އެލް.ސީ) އިން "މައިގްރަންޓްސް މެޓަރ"ގެ ނަމުގައި ކެމްޕެއިނެއް އިފްތިތާޙްކޮށްފިއެވެ.
މި ކެމްޕެއިންގައި ސޯޝަލް މީޑިއާ މެދުވެރިކޮށް، ބިދޭސީންގެ އިތުރުން އާންމުންނަށް މަޢުލޫމާތު ފޯރުކޮށްދެވޭނެކަމަށް ޕަބްލިކް އިންޓްރެސްޓް ލޯ ސެންޓަރ ބުނެއެވެ.
މިކެމްޕެއިންގެ އެގޮތުން ބިދޭސީންނަށް އަމާޒުކޮށް ފޯރުކޮށްދެވޭ މައުލޫމާތުތައް އެމީހުންނަށް ފަހުމްވާނެ ގޮތަށް، ގިނަ އަދަދެއްގެ ބިދޭސީން ނިސްބަތްވާ ތިން ގައުމެއްގެ މާދަރީ ބަހުންނާއި އިނގިރޭސި ބަހުން މައުލޫމާތު ހިއްސާކޮށް، ސޯޝަލް މީޑިއާގައި އާންމުކުރަމުންދާނެކަމަށް ޕީ.އައި.އެލް.ސީ ބުނެއެވެ. އެއް އަހަރު ދުވަހަށް ކުރިއަށްގެންދާ މިކެމްޕޭނުގައި ބިދޭސީންނަށް ލިބެންޖެހޭ އަސާސީ ހައްޤުތަކާއި، ދިރިއުޅުމުގައި އަދި މަސައްކަތުގައި ދިމާވާ ގޮންޖެހުންތައް، ހިއުމަން ޓްރެފިކިންގ އަދި ލޭބަރ ވަޔަލޭޝަންސްއާ ގުޅޭ މައުލޫމާތު ހިއްސާކުރުމަށް ޚާއްސަ އިސްކަމެއްދޭނެކަމަށްވެސް އެ ފަރާތުން މަޢުލޫމާތުދެއެވެ.
ހަމައެއާއެކު، މިކެމްޕޭނުގެ ދަށުން ހިލޭސާބަހަށް ޤާނޫނީ އެހީތެރިކަން ފޯރުކޮށްދިނުމަށް ލީގަލް އެއިޑް ކޭމްޕްތަކެއް ރާއްޖޭގެ 5 ރަށެއްގައި ހިންގުމަށް ތައްޔާރުވަމުންދާކަމަށްވެސް އެ ލޯ ސެންޓަރުން ބުނެފައިވެއެވެ.
މި ކެމްޕޭނަކީ އޭޝިޔާ ފައުންޑޭޝަންގެ ސްމޯލް ގްރާންޓްސް ޕްރޮޖެކްޓްގެ ދަށުން ޕަބްލިކް އިންޓަރެސް ލޯ ސެންޓަރުން ކުރިއަށްގެންދާ "ލޭބަރ މައިގްރޭޝަން އިން މޯލްޑިވްސް ޕްރޮޖެކްޓް" ގެ ދަށުން ހިންގާ ކެމްޕޭނެކެވެ. މި ޕްރޮޖެކްޓްގެ ދަށުން ރާއްޖޭގައި މަސައްކަތްކުރާ ދެކުނު އޭޝިޔާގެ މަސައްކަތްތެރިން، ޚާއްސަކޮށް ބަންގްލަދޭޝްގެ މަސައްކަތްތެރިންނަށް ދިމާވާ އެކިއެކި ގޮންޖެހުންތަކާއި އެކަމާއި ގުޅޭ ހައްލުތައް ފާހަގަކޮށް، އެކްޝަން ޕްލޭނެއް ތައްޔާރުކުރުމަށް ރޭވިފައިވެއެވެ.
މީގެ އިތުރުން ފާހަގަކުރެވޭ މައިގަނޑު ކަންތައްތައް ރިކޮމެންޑޭޝަންތަކެއްގެ ސިފައިގައި ސަރުކާރަށް ފޯރުކޮށްދިނުމަށްވެސް ވަނީ ނިންމާފައެވެ. އެގޮތުން ސަރުކާރުގެ ކަމާއި ގުޅޭ މުއައްސަސާތަކާއި ގުޅިގެން، އެފަރާތްތަކުން ފޯރުކޮށްދޭ މައުލޫމާތުތަކާއި ދިމާވާ ގޮންޖެހުންތަކަށް އަލިއެޅުވުމަށްފަހު، ބިދޭސީ މަސައްކަތްތެރިންނާއި ގުޅުންހުރި ކަންކަން ހައްލުކުރުމަށްޓަކައި ކުރެވެމުންދާ މަސައްކަތަށް އެހީއެއްގެ ގޮތުގައި މިޕްރޮޖެކްޓުގެ ފަރާތުން އެއްކުރެވޭ މައުލޫމާތު ވެގެންދިޔުމަކީ އަމާޒެއްކަމަށްވެސް ޕީ.އައި.އެލް.ސީ ބުނެފައިވެއެވެ.