ވައިފުޅި އަޅައިގެން ފީނުމުގެ ތެރޭގައި ޑައިވިން ޑިކޮމްޕްރެޝަން ސިކްނެސް، (ޑީކޯ)ވާ މީހުންނަށް ފަރުވާ ދޭ ޑިކޮމްޕްރެޝަން ޗެމްބަރެއް ކަނޑިންމަ މޯލްޑިވްސް ރިސޯޓުގައި ބަހައްޓައިފިއެވެ.
ދ. އަތޮޅުގައި ހިންގާ ކަނޑިންމަ މޯލްޑިވްސް ރިސޯޓުގައި ޤާއިމްކޮށްފައިވާ ޑިކޮމްޕްރެޝަން ޗެމްބަރ ރަސްމީކޮށް ހުޅުއްވައިދެއްވީ ދ. ކުޑަހުވަދޫ ކައުންސިލްގެ ރައީސް އިބްރާޙިމް ފިކުރީއެވެ.
ފީނަން އުޅުމުގެ ތެރެއިން މަސްވެރިންގެ އިތުރުން ފަތުރުވެރިންވެސް ޑީކޯވެފައިވާއިރު، ދޭން ޖެހޭ އަވަސް ފަރުވާ ނުދެވުމުގެ ސަބަބުން މިހާތަނަށް ބައެއް ފަރާތްތަކުގެ ފުރާނަ ވަނީ ގެއްލިފަ އެވެ.
ޒަމާނީ ވަސީލަތްތަކާއެކު ތަރައްޤީކޮށް ކަނޑިންމަ ރިސޯޓުގެ ކްލިނިކުގައި ބަހައްޓާފައިވާ މި ޗެމްބަރ އަކީ ރާއްޖޭގައި މިވަގުތު އޮޕަރޭޝަންގައި ހުރި 4 ވަނަ ޑިކޮމްޕްރެޝަން ޗެމްބަރެވެ.
ޑިކޮމްޕްރެޝަން ޗެމްބަރ ހުޅުވުމުގެ ރަސްމިއްޔާތުގައި ވާހަކަދައްކަވަމުން ކުޑަހުވަދޫ ކައުންސިލްގެ ރައީސް އިބްރާޙިމް ފިކުރީ ވިދާޅުވީ މިއީ މާލެއިން ދެކުނުގައި މިހާރު އޮޕަރޭޓްކުރާ ހަމައެކަނި ޑިކޮމްޕްރެޝަން ޗެމްބަރކަމަށްވުމުން، އެތަނުން ގިނަ ބަޔަކަށް ޚިދުމަތް ލިބިގެންދާނެ ކަމަށް ޤަބޫލްކުރައްވާ ކަމަށެވެ.
" ދިވެހި ރައްޔިތުންނަށާއި ފަތުރުވެރިންނަށް، ލިބިގެންދާ ވަރަށް ބޮޑު ޚިދުމަތެއް މިއީ، އަދި ޑީކޯވާ މީހުން ދުރު ސަރަޙައްދުތަކަށް އުފުލުމަށް އެކުރަންޖެހޭ ދިގު ދަތުރުތަކަށްވެސް ލުުޔެއް ލިބިގެންދާނެ މިތަނާއެކު،" އިބްރާޙީމް ވިދާޅުވިއެވެ.
ކަނޑިންމަ ރިސޯޓުގައި ޑިކޮމްޕްރެޝަން ޗެމްބަރެއް ހުޅުވުމުގެ ހަފްލާގައި ދ. ހޮސްޕިޓަލްގެ އޮފިޝަލެއް ކަމަށްވާ، އައިޝަތު މުނީރު ވިދާޅުވީ އެ ހޮސްޕިޓަލަށް ޑީކޯވެގެން އަންނަ ފަރާތްތަކުގެ އަދަދު އިތުރުވަމުންދާއިރު، އެފަދަ ފަރާތްތަކަށް ދޭން ޖެހޭ ފަރުވާ ހޯދުމަށް އެހެން ހިސާބުތަަކަށް ފޮނުވާލަން ޖެހޭ ކަމަށެވެ.
" ރިސޯޓުތައްވެސް އިތުރުވަމުންދާއިރު، ޑީކޯވެގެން ޕޭޝަންޓުން އާދޭ، މީގެކުރިން ޖެހެނީ ކިތަންމެ ކަނޑު ގަދަޔަސް ޕޭޝަންޓު ރިފަރ ކުރަން، ހޮސްޕިޓަލާއި މިހާ ކައިރިން ޗެމްބަރއެއް ހުޅުވިގެން ދިޔުމަކީ މުޅި ކޮމިއުނިޓީއަށް ލިބިގެންދިޔަ ވަރަށް ބޮޑު ފަސޭހައެއް،" އައިޝަތު ވިދާޅުވިއެވެ.
ޑީކޯވުމަށް މެދުވެރިވަނީ ފީނަން ގޮސް އުޅުމުގެތެރޭ، މާ އަވަހަށް މައްޗަށް އެރުމުންނެވެ. މީގެ ސަބަބުން އޮކްސިޖަން ދައުރު ވުމުގައި މައްސަލަތައް ދިމާވެ ހަށިގަނޑުގައި ގޭސް ބޮކިތަކެއް އުފެދެއެވެ. މި ގޭސް ބޮކިތަކުގެ ސަބަބުން ސްޓްރޯކު ޖެހުމާއި ގޭސް އެމްބޮލިޒަމް ފަދަ ކަންކަން ދިމާވެއެވެ. ޑީކޯވާ ބަލިމީހާގެ ނޭވާލުން ރަނގަޅުކޮށް އޭނާގެ ނޭވާ ހޮޅީގައި އުފެދޭ ގޭސް ބޮކިތައް ނައްތައިލުމަށް ޑީކޮމްޕްރެޝަން ޗެމްބަރުން އެހީދެވެއެވެ.
ކަނޑިންމަ ރިސޯޓުގައި ހުޅުވާފައިވާ ޑިކޮމްޕްރެޝަން ޗެމްބަރުން ދ. އަތޮޅާއި އެ އަތޮޅާއި ކައިރި އަތޮޅުތަކުން ޑީކޯވާ ފަރާތްތަކަށް ފަރުވާ ލިބޭނެ ކަމަށް ކަނޑިންމަ ރިސޯޓުން ހާމަކުރެއެވެ. ކަނޑިންމަ ރިސޯޓުގައި ބަހައްޓާފައިވާ ޑިކޮމްޕްރެޝަން ޗެމްބަރު އޮޕަރޭޓު ކުރާނީ މިކަމުގެ ތަޖުރިބާ ހުރި ފަރާތެއްކަމަށްވާ އަލީ ޒުބައިރެވެ.
ޒުބެއިރުވަނީ މި ޚިދުމަތް ކުރިއަށްގެންދާ ގޮތުގެ ތަފްސީލް ދެއްވާފައެެވެ.
"ޓްރީޓްމަންޓުގައި ފުރަތަމަ ބޭނުންކުރަނީ ޔޫ.އެސް. ނޭވީ ޓޭބަލް 6، ދެން ޑޮކްޓަރު ބަލާފަ ޑިސައިޑު ކުރާނީ، ދެވަަނަ ޓްރީޓުމަންޓަކަށް. ބޭނުންކުރަނީ ޔޫ.އެސް. ނޭވީ ޓޭބަލް 5، އެވެސް ޑޮކްޓަރު ނިންމާނީ، ޓްރީޓްމަންޓު ކުރިއަށް ގޮސްދާނެ 6 ގަޑިއިރަށްވެސް،" ޒުބައިރު ވިދާޅުވިއެވެ.
މި ޗެމްބަރގެ ޚިދުމަތް ހޯދާ ފަރާތްތަކަށް ފައިސާ ދެއްކުމުގައި އިންޝުއަރެންސު ބޭނުން ކުރެވޭނެއެވެ. އަދި އެންސްޕާއިންވެސް މި ޚިދުމަތަށް ފައިސާދެއްކޭނެއެވެ.