އޮމިކްރޯންގެ ސަބަބުން ދުނިޔޭގެ އިޤްތިޞާދަށް ނޭދެވޭ އަސަރުކުރާނެކަމަށް އައިއެމްއެފުން ލަފާކޮށްފި
އޮމިކްރޯން ފެތުރެން ފެށުމުގެ ސަބަބުން އިޤްތިޞާދީ ދުވެލި އަނެއްކާވެސް ދަށަށް ދާނެކަމަށް އިންޓަރނޭޝަނަލް މޮނިޓަރީ ފަންޑު އައިއެމްއެފުން ލަފާކޮށްފިއެވެ.
އައިއެމްއެފުން އެންމެ ފަހުން އެކުލަވާލި ދިރާސާ ރިޕޯޓުގައި އަންދާޒާކޮށްފައިވަނީ މި އަހަރު ދުނިޔޭގެ އިޤްތިޞާދަށް 5.9 އިންސައްތައިގެ ކުރިއެރުމެއް ލިބޭނެކަމަށެވެ. އަދި 2022 ވަނަ އަހަރު 4.9 އިންސައްތައިގެ ކުރިއެރުމެއް ލިބޭނެކަމަށް ލަފާކޮށްފައިވެއެވެ. ނަމަވެސް ކޯވިޑްގެ ޑެލްޓާ ވޭރިއެންޓު ފެތުރެންފެށުމާއެކު އެމެރިކާ ފަދަ ފުޅާ އިޤްތިޞާދުތައް ކުއްލިއަކަށް ދަށަށް ގޮސްފައިވާ ކަމަށާއި، މިހާރު ފެތުރެމުންދާ އޮމިކްރޯން ވޭރިއެންޓުގެ ސަބަބުން ފާއިތުވި އޮކްޓޯބަރުގައި ލަފާކޮށްފައިވާ މިންވަރަށްވުރެވެސް އިތުރަށް އިޤްތިޞާދު ދަށަށް ދާނެކަމަށް ބެލެވޭކަމަށް އައިއެމްއެފުން ހާމަކުރެއެވެ.
ނޫސްވެރިންނަށް މަޢުލޫމާތުދެއްވަމުން އައިއެމްއެފްގެ ޗީފް ކްރިސްޓަލީނާ ޖޯޖީވާ ވިދާޅުވީ ދުނިޔޭގެ އެކި ކަންކޮޅުތަކަށް ހަމަހަމަ ކަމާއެކު މުދަލާއި ޚިދުމަތް ފޯރުކޮށްދެވެމުންނުދާތީއާއި ކޯވިޑްގެ ވެކްސިން ދުނިޔޭގެ ހުރިހާ ހިސާބުތަކަށް އެއްހަމައެއްގައި ލިބެމުންނުދާތީ، އިޤްތިޞާދީ އަނދަވަޅުން އަރައިގަތުމަށް ބައެއް ޤައުމުތައް އަދިވެސް ނުކުޅެދިފައިވާ ކަމަށެވެ. އަދި ތަރައްޤީވެފައިވާ ޤައުމުތަކުން މުދަލަށް އޮތް ޑިމާންޑު ބޮޑުވަމުންދާއިރު ބައެއް ކަހަލަ މުދާ އުފައްދާ މިންވަރު ދަށްވެފައިވުމުގެ ސަބަބުން ޖުމުލަގޮތެއްގައި މުދަލުގެ އަގު އުފުލެމުން ދާކަމަށެވެ.
ކޯވިޑް-19އާ ގުޅިގެން ދުނިޔޭގެ އިޤްތިޞާދަށް އަންނަމުންދާ ބަދަލުތައް ދިރާސާކުރުމަށްފަހު، މުދަލުގެ އަގު އެއްވަރެއްގައި ހިފެހެއްޓިގެން ދާނެކަމަށް މީގެ ދެމަސްކުރިން އައިއެމްއެފުން ވަނީ ބުނެފައެވެ. ނަމަވެސް ފަހުގެ ހިސާބުތަކަށް ބަލާއިރު އިންފްލޭޝަން މަތިވެ، މުދަލުގެ އަގު ކަނޑައެޅުމުގައި ގިނަ ގޮންޖެހުންތައް ކުރިމަތިވެފައިވާކަން ފާހަގަކުރެވޭކަމަށް ޖޯޖީވާ ވިދާޅުވިއެވެ.
އޮމިކްރޯން މިހާތަނަށް 38 ޤައުމަކަށް ފެތުރިފައިވާކަމަށް ދުނިޔޭގެ ސިއްޙަތު ޖަމުޢިއްޔާއިން ހާމަކުރެއެވެ. މި ވޭރިއެންޓާއި ބެހޭގޮތުން އެނގެންހުރީ މަދު މަޢުލޫމާތެއްކަމުން ޤައުމުތަކުން ދަނީ ރައްކާތެރިކަމުގެ ފިޔަވަޅު އަޅަމުންނެވެ. އެގޮތުން ޔޫރަޕުގެ ބައެއް ޤައުމުތަކަށާއި ދެކުނު އެފްރިކާގެ ޤައުމުތަކަށް ވައިގެމަގުން ކުރާ ދަތުރުތައް މެދުކަނޑާލާފައި ވާއިރު، ބައެއް ޤައުމުތަކުގެ ބޯޑަރުވެސް ވަނީ ބަންދުކޮށްފައެވެ. އޮމިކްރޯނުން ރައްކާތެރިވުމުގެ ފިޔަވަޅެއްގެ ގޮތުން ރާއްޖެއިންވެސް ވަނީ އެފްރިކާ ބައްރުގެ 7 ޤައުމަކުން މީހުން ރާއްޖެއަށް އެތެރެވުން މަނާކޮށްފައެވެ.