އޮންލައިން ވިޔަފާރި ހިންގުމުގައި ޤަވާޢިދާ ޚިލާފުވެފައިވާތީ، އެމެޒޯން ކުންފުނި، ރިކޯޑު ޢަދަދަކުން ޖޫރިމަނާކޮށްފިއެވެ.
އިޓަލީގެ ވިޔަފާރި ޤާނޫނުތައް ތަންފީޒުކުރަމުންދާ އެންޓި ޓްރަސްޓް އޮތޯރިޓީއިން ހާމަކުރިގޮތުގައި އޮންލައިން ވިޔަފާރި މާކެޓުގައި އިތުރު ކުރިއެރުންތައް ހޯދުމުގެގޮތުން ޤަވާޢިދާއި ޚިލާފަށް ބައެއް ކަންކަން ކޮށްފައިވާތީ، އެ އޮތޯރިޓީއިން ވަނީ އެމެޒޯން ކުންފުނި، 1.28 ބިލިއަން އެމެރިކާ ޑޮލަރުން ޖޫރިމަނާކޮށްފައެވެ.
އިޓަލީގެ ވިޔަފާރިތައް މޮނިޓަރކުރަމުންދާ އިދާރާއިން ހާމަކޮށްފައިވާގޮތުން އެމެޒޯން އިން ވަނީ އިޓަލީގެ މާރުކޭޓުން އެކުންފުންޏަށް ލިބޭ ފައިދާ އިތުރުކުރުމަށްޓަކައި، ވިޔަފާރިވެރިންނަށް، ސިދާ އެކުންފުނީގެ ލޮޖިސްޓިކްސް ޚިދުމަތްތައް ޚިޔާރުކުރުމަށް ބާރުއަޅާފައެވެ. އެގޮތުން "ފުލްފިލްމަންޓް ބައި އެމެޒޯން"ގެ ނަމުގައި ހިންގާ އެކުންފުނީގެ ލޮޖިސްޓިކްސް ޚިދުމަތް ޚިޔާރުކުރާ ވިޔަފާރިވެރިންނަށް، "ޕްރައިމް ލޭބަލް" ފަދަ ޚާއްޞަ ޢިނާޔަތްތައް ލިބޭގޮތަށް ހަމަޖައްސައި، އެކުންފުނީގެ ލޮޖިސްޓިކްސް ބޭނުންނުކުރާ ފަރާތްތަކަށް މި ޢިނާޔަތްތައް ނުލިބޭގޮތަށް ވަނީ ހަމަޖައްސާފައެވެ.
ޕްރައިމް ލޭބަލްގެ ސަބަބުން އެމެޒޯންގެ ލޯޔަލްޓީ ޕްރޮގްރާމުގައި ހިމެނޭ ބޮޑު ޢަދަދުތަކުން ވިޔަފާރިކުރާ 7 މިލިއަނަށްވުރެ ގިނަ ކަސްޓަމަރުންނަށް ތަކެތި ވިއްކުމަށް ފަސޭހަވެގެންދެއެވެ. ނަމަވެސް އެމެޒޯންގެ ލޮޖިސްޓިކްސް ޚިދުމަތް ޚިޔާރު ނުކުރާ އަމިއްލަ ވިޔަފާރިވެރިންނަށް "ޕްރައިމް ލޭބަލް" މެދުވެރިކޮށް މުދާ ވިއްކުމުގެ ހަމަހަމަ ފުރުޞަތު ނުދޭކަން ފާހަގަކުރެވިފައިވާތީ، މިއީ މުދާ ވިއްކާ ފަރާތްތަކުގެ ޙައްޤުތައް ރައްކާތެރިކުމުގެ ޤާނޫނާ ޚިލާފަށް ކޮށްފައިވާ ކަމެއް ކަމަށް އެންޓި ޓްރަސްޓް އޮތޯރިޓީއިން ހާމަކުރެއެވެ.
ޔޫރަޕުގެ ވިޔަފާރި ރެގިއުލޭޓުކުރާ ކޮމިޝަނުން ހާމަކުރިގޮތުގައި މި މައްސަލަ ބެލުން އިންސާފުވެރި ކުރުމުގެ ގޮތުން ޔޫރަޕިއަން ކޮމްޕެޓިޝަން ނެޓްވޯކް އާއެކު އެކޮމިޝަނުންވަނީ ގާތުން މަސައްކަތްކޮށްފައެވެ. މި ނެޓްވޯކުން ބަލަމުންދާ މައްސަލަތަކުގެ ތެރޭގައި 2019ވަނަ އަހަރު އެމެޒޯންގެ މިނިވަން ވިޔަފާރިވެރިންގެ ސިއްރު މަޢުލޫމާތު، ޔޫރަޕުގެ ވިޔަފާރި ޤަވާޢިދުތަކާއި ޚީލާފަށް ބޭނުންކޮށްފައިވާ މައްސަލައެއްވެސް ހިމެނެއެވެ.
މި ޖޫރިމަނާއަކީ އެމެރިކާގެ ޓެކް ކުންފުންޏަކަށް ޔޫރަޕުން މިހާތަނަށް ކަނޑައެޅި އެންމެ ބޮޑު ޖޫރިމަނާ ކަމަށް ވާއިރު، މި ނިންމުން ބަލައިނުގަންނަކަމަށް އެމެޒޯންއިން ވަނީ ބުނެފައެވެ. އެކުންފުނިން ބުނިގޮތުގައި "ފުލްފިލްމަންޓް ބައި އެމޭޒަން" އިޚްތިޔާރު ކުރުމާއި ނުކުރުމުގެ ފުރިހަމަ ބާރު ވިޔަފާރިވެރިންނަށް ލިބިދީފައި އޮވެއެވެ. އަދި އެމީހުން ކުންފުނީގެ ލޮޖިސްޓިކްސް ޚިދުމަތް ހޯދުމަށް ނިންމަނީ މާކެޓުގެ ވާދަވެރިކަމަށް ބަލާއިރު އަގުހެޔޮވެފައި ފަސޭހަވީމައި ކަމަށެވެ.
ފަހަކަށްއައިސް އޮންލައިން ވިޔަފާރީގައި ޚިދުމަތްހޯދާ ފަރާތްތަކުގެ މުހިންމު މަޢުލޫމާތު ލީކުކުރުމާއި، ސައްޙަނޫން މަޢުލޫމާތު ފެތުރުމުގެ މައްސަލަތައް ގިނަވެފައިވާތީ، ދުނިޔޭގެ ބޮޑެތި ޓެކް ކުންފުނިތައް ގާތުން މޮނިޓަރކުރަން ޖެހިފައިވާކަމަށް ޔޫރަޕުގެ ވިޔަފާރި ރެގިއުލޭޓަރުން ހާމަކުރެއެވެ.