އުރީދޫ ކަލަންޑަރުން އޮގްމެންޓެޑް ރިއަލިޓީ މެދުވެރިކޮށް ރާއްޖޭގެ ރީތި ދިރުންތައް ދިރުވާލަދެނީ

ރާއްޖޭގެ ރީތި ދިރުންތައް ދައްކުވައިދޭ ގޮތައް ތައްޔާރުކޮށްފައިވާ ޑެސްކް ކަލަންޑަރު އުރީދޫ މޯލްޑިވްސްއިން އިފްތިތާހުކޮށްފިއެވެ. މި ކަލަންޑަރުގައި އީޖާދީ އޮގްމެންޓެޑް ރިއަލިޓީ ޚިދުމަތް މެދުވެރިކޮށް ރާއްޖޭގެ ރީތި ދިރުންތައް ދައްކުވައިދެއެވެ.

އުރީދޫ މޯލްޑިވްސްގެ މިކަލަންޑަރު އިފްތިތާޙް ކުރީ ޓޫރިޒަމް މިނިސްޓަރު އަބްދުالله މައުސޫމް އާއި އުރީދޫ މޯލްޑިވްސްގެ މެނޭޖިން ޑިރެކްޓަރު އަދި ސީއީއޯ ނަޖީބް ޚާންގެ ހާޒިރުގައި އެ ކުންފުނީގެ ހެޑް އޮފީހުގައި ބޭއްވި ހާއްސަ ރަސްމިއްޔާތެއްގައެވެ.

މި ކަލަންޑަރުގައި ކޮންމެ މަހެއްގައި ރާއްޖޭގައި އާއްމުކޮށް ފެންނަ ތަފާތު ދިރުންތަކެއް ކުރު ތައާރަފަކާއެކު ދައްކުވައިދެއެވެ. ކަލަންޑަރު ބޭނުންކުރާ ފަރާތްތަކަށް އެ މަހަކަށް ޚާއްސަކޮށްފައިވާ ސަފްހާއިން ފެންނަ ސްނެޕްޗެޓް ކޯޑް ސްކޭންކޮށް، ކަލަންޑަރުން ފެންނަ ރާއްޖޭގެ ފޮޓޯ، އޮގްމެންޓެޑް ރިއަލިޓީ، އޭއާރް މެދުވެރިކޮށް ދިރުންލިބިގެންދާނެ ކަމަށް އުރީދޫން މައުލޫމާތުދެއެވެ.

މިކަލަންޑަރުގައި ކޮންމެ މަހަކަށް އޮރިގާމީ ހެދުމަށް ސްޓެޕް ބައި ސްޓެޕް އިރުޝާދު ދޭ ވީޑިއޯ ވެސް އުރީދޫ މޯލްޑިވްސްގެ ވެބްސައިޓުން ފެންނަން ހުންނާނެއެވެ. އެގޮތުން އޮރިގާމީ ކަރުދާހުގައިވާ ކިއުއާރު ކޯޑު ސްކޭން ކޮށްލުމުން އިރުޝާދު ދޭ ވީޑިއޯ ހުޅުވޭނެކަމަށްވެސް އުރީދޫން މައުލޫމާތުދެއެވެ.

މަގޭ ރާއްޖެ - ކަލަންޑަރު ފަރުމާކޮށްފައިވަނީ ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމުގެ މުނާސަބަތާވެސް ގުޅުވާލައިގެންނެވެ.

މި ހަފްލާގައި ވާހަކަދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މަޢުސޫމް ވަނީ ކަލަންޑަރުގެ ތަފާތުކަން ފާހަގަކޮށްފައެވެ.
"ކޮމިއުނިކޭޝަން އާއި ޓޫރިޒަމަކީ މީހުން ގުޅުވައިދިނުމުގައި އިސް ރޯލެއް އަދާކުރާ ދެ ދާއިރާ. 2022 ވަނަ އަހަރުގެ ފަތުރުވެރިކަން އަލުން ދިރުވުމުގަ އާއި އަދި ޓޫރިޒަމްގެ ރަންޔޫބިލް ފާހަގަކުރުމަށް އުރީދޫން އިސްނަންގަވާ ވެދެއްވާ އެހީތެރިކަމާއި އެއްބާރުލެއްވުމަށް ފަށްފަށުން ޝުކުރު އަދާކުރަަން." މިނިސްޓަރ މައުސޫމް ވިދާޅުވިއެވެ.

މި ހަފްލާގައި އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ޗީފް ކޮމަރޝަލް އޮފިސަރ، ނަޖީބް ޚާން ވިދާޅުވީ ރާއްޖޭގެ ފަތުރުވެރިކަން ކުރިއަރުވައި އިޝްތިހާރުކުުރުމުގައި ކަމާއި ގުޅޭ ވުޒާރާތަކާއި ގުޅިގެން މަސައްކަތްކުރަމުންދާނެ ކަމަށެވެ.

" އުރީދޫ އަކީ އަބަދުވެސް ރާއްޖޭގެ ތަރައްގީ އަށް ކުރެވޭ މަސައްކަތުގައާއި ކާމިޔާބީތަކުގައި ބައިވެރިވާނެ ކުންފުންޏެއް ގޮތުގައި ދެމި އޮންނާނެކަމުގެ ޔަގީންކަން އެންމެހައިބޭފުޅުންނަށް އަރުވަން. މުޅި އުރީދޫ މޯލްޑިވްސް ޓީމުގެ ނަމުގައި، އެންމެހާ ފަރާތްތަކަށް 2022 ވަނަ އަހަރުގެ ތަހުނިޔާ އެންމެހައި ފަރާތްތަކަށް ދަންނަވަން." އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ޗީފް ކޮމަރޝަލް އޮފިސަރ، ނަޖީބް ޚާން ވިދާޅުވިއެވެ.

އަންނަ އަހަރު ފަތުރުވެރިކަމުގެ ރަންޔޫބީލް ފާހަގަކުރުމަށް މުޅި ރާއްޖެ ތައްޔާރުވަމުންދާއިރު، އުރީދޫ މޯލްޑިވްސްގެ 2022 ވަނަ އަހަރުގެ ކަލަންޑަރު - މަގޭ ރާއްޖެ ޑިޒައިން ކުރެވިފައިވަނީ މި ހަފްލާއާއި ގުޅުވާލާ ރާއްޖޭގެ ރީތިކަމާއި ތަފާތު ދިރުންތައް ކުރިއެރުވުމަށެވެ. ރާއްޖޭގެ މި ނާޒުކު ދިރުންތަކުން ލިބިދޭ އިގްތިސާދީ އަދި އިކޮލޮޖިކަލް މަންފާ ރާއްޖެއަށް ޒިޔާރަތްކުރާ ފަތުރުވެރިންނަށާއި އަންނަން އޮތް ޖީލުތަކަށްވެސް ފޯރުކޮށްދިނުމަށް ރާއްޖޭގެ ނާޒުކު މާހައުލު ހިމާޔަތްކުރުމަށް މުޖުތަމައުތައް އިތުރަށް ހޭލުންތެރިކޮށް ދެމެހެއްޓެނިވި އާދަތައް އެކަށައެޅުމަކީ މުހިންމުކަމެއްކަމުގައިވެސް އެ ކުފުންނިންވަނީ ފާހަގަކުރެއެވެ.