ސަރުކާރުން ކުރަމުންދާ މަސައްކަތްތަކާއެކު ރާއްޖޭގެ އިޤްތިސާދަށް އިންޤިލާބީ ބަދަލުތަކެއް އަންނާނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލް ވިދާޅުވެއްޖެއެވެ.
ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓް މުޙައްމަދު ރާޝިދުގެ ކެމްޕެއިން އިފްތިތާހު ކުރުމަށް ރޭ ކޮމަންޑޫގައި ބޭއްވި ޖަލްސާގައި ވާހަކަފުޅު ދައްކަވަމުން އިކޮނޮމިކް މިނިސްޓަރ ފައްޔާޟް އިސްމާޢީލް ވިދާޅުވީ، ދިވެހި ރާއްޖޭގެ މަސައްކަތްތެރިންގެ ހައްޤުގައާއި ވިޔަފާރިވެރިންގެ ހައްޤުގައި މި ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ކުރިއަށް އޮތްތާނގައި ޑޮލަރުގެ އަގު ހެޔޮވާނެކަމަށް މިނިސްޓަރ ވިދާޅުވިއެވެ. އަދި ކޯވިޑްގެ މި ދަތި އުނދަގޫ ދުވަސްތަކުގައިވެސް ރައްޔިތުންނަށް މިކަމުގެ ސަބަބުން ލިބޭ ގެއްލުންތައް ކުޑަކުރުމަށް ސަރުކާރުން މަސައްކަތްކުރާނޭކަމަށް ފައްޔާޟް ވިދާޅުވިއެވެ.
" ކޯވިޑްގެ މި ވަބާގެ ތެރެއިން ވަރަށް ބޮޑެތި ގޮންޖެހުންތަށް އެބަހުރި، ދުނިޔޭގަ މުދަލުގެ އަގު ދަނީ ބޮޑުވަމުން، އަޅުގަނޑުމެންނަށްވެސް އޭގެ އަސަރު ކުރާނެ، ރާއްޖެއަކީ ހުރިހާ އެއްޗެއް އެތެރެކުރާ ޤައުމަކަށްވާތީ، މި ސަރުކާރުން މިކަމުގައި ރައްޔިތުންނަށް ވީހާވެސް ލުއި ގޮތްތަށް ހޯދައިދިނުމަށް މަސައްކަތްކުރާނަން،" މިނިސްޓަރ ފައްޔާޟް ވިދާޅުވިއެވެ.
މިނިސްޓަރ ވާހަކަފުޅުގައި ވަނީ މިނިމަން ވޭޖްގެ ސަބަބުން މުވައްޒަފުންގެ މުސާރައަށް ލިބޭނެ ކުރިއެރުންތައްވެސް ފާހަގަކޮށްފައެވެ. އެގޮތުން ފަތުރުވެރިކަމުގެ ދާއިރާގައި މަސައްކަތްކުރާ 13000 ދިވެހި މުވައްޒަފުންނަށް މިހާރު މުސާރައިގެ ކުރިއެރުން ލިބިގެންގޮސްފައިވާކަމަށް މިނިސްޓަރ ވިދާޅުވިއެވެ.
"ޓޫރިޒަމް އިންޑަސްޓްރީގައި މަސައްކަތްކުރާ 13000 ދިވެހި މުވައްޒަފުންނަށް 358 މިލިއަން ރުފިޔާ އަހަރަކު މިހާރު ލިބޭނެ އިތުރަށް، ސަރުކާރުގައި މަސައްކަތްކުރާ 15000އަށްވުރެ ގިނަ ދިވެހި ރައްޔިތުންނަށް 600 އަށްވުރެ ގިނަ މިލިއަން ރުފިޔާ ކޮންމެ އަހަރަކު މިހާރު ލިބޭނެ،" މިނިސްޓަރ ފައްޔާޟް ވިދާޅުވިއެވެ.
މިނިސްޓަރ ފައްޔާޟް ވިދާޅުވީ ރާއްޖޭގެ އިޤްތިސާދަށް އިންޤިލާބީ ބަދަލުތަކެއް ގެނައުމުގެ ޤާބިލްކަން މި ސަރުކާރުގައި އެބަހުރި ކަމަށެވެ. އަދި ކުރިއަށް އޮތްތާގައި އެބަދަލުތައް ފެނިގެންދާނެ ކަމަށް ،މިނިސްޓަރ ވިދާޅުވިއެވެ.