ދެކުނު އެފްރިކާގައި ކޯވިޑާދެކޮޅަށް ކުރަމުންދާ މަސައްކަތްތަކަށް ވޯލްޑް ބޭންކުން 750 މިލިއަން ޑޮލަރުގެ ލޯނެއް ދީފިއެވެ.
ކުޑަ އިންޓަރެސްޓް ރޭޓެއްގައި ދީފައިވާ މި ލޯންގެ އެހީގައި ސައުތު އެފްރިކާގައި އިޖުތިމާއީގޮތުންނާއި ސިއްހީގޮތުން ކުރިމަތިވެފައިވާ ދަތިތަކުން އަރައިގަތުމަށް އެހީތެރިވެދޭނެ ކަމަށް ސައުތު އެފްރިކާގެ ޓްރެޜަރީ ޑިރެކްޓަރ ޖެނެރަލް ވިދާޅުވިއެވެ. ކޯވިޑާއި އެކު މާލީގޮތުން ގިނަ ގޮންޖެހުންތަކެއް ކުރިމަތިވުމާއި ގުޅިގެން ސައުތު އެފްރިކާއިން މި ލޯނަށް އެދިފައިވަނީ މީގެ 2 އަހަރުވަރު ކުރިންނެވެ.
ކޯވިޑުގެ ބަލީގައި ސައުތު އެފްރިކާގައިވަނީ 94000 މީހުން މަރުވެފައެވެ. މިއީއެކު ސައުތު އެފްރިކާ ވެފައިވަނީ އެ ސަރަޙައްދުގައި، ކޯވިޑު ޖެހިގެން އެންމެ ގިނަ އަދަދަަކަށް މީހުން މަރުވި ޤައުމަށެވެ.
ބަލި ފެތުރޭ މިންވަރު ކޮންޓްރޯލް ކުރުމަށް އެޤައުމުގެ ސަރުކާރުން ގިނަ ފިޔަވަރުތަކެއް އަޅަން މަޖުބޫރުވިއެވެ. އެހެން ނަމަވެސް މި ފިޔަވަޅުތަކާއި އެކު، އިޤްތިސާދީގޮތުން އެޤައުމަށްވަނީ ބޮޑެތި ގެއްލުންތަކާއި ކުރިމަތިލާން ޖެހިފައެވެ. އެގޮތުން ގިނަ ބައެއްގެ ވަޒީފާތައް ގެއްލި، ދުނިޔޭގެވެސް އެންމެ ގިނަ އަދަދަކަށް ވަޒީފާ ނެތް މީހުން ތިބި ޤައުމަށް ސައުތު އެފްރިކާވަނީ ވެފައެވެ.
އާއްމުންނަށް އެހީވުމަށް ސަރުކާރުން ކުރާ ޙަރަދުތަށް އިތުރުކުރުމަށް އެޤައުމުގެ ޖަމިއްޔާތުންދަނީ ގޮވާލަމުންނެވެ. އަދި މިހާރު މި ލިބުނު ލޯނާއި އެކު ޤައުމުގެ އިޤްތިސާދު އާރާސްތުކުރުމަށް އެހީތެރިވެދޭނެ ކަމަށް ސައުތު އެފްރިކާގެ ސަރުކާރުން ހާމަކުރެއެވެ.