އިނގިރޭސިވިލާތަށާއި ސްކޮޓްލޭންޑަށް އެތެރެވާ މީހުންގެ ތެރެއިން ވެކްސިން ފުރިހަމަކޮށްފައިވާ ފަރާތްތައް ކޯވިޑު ޓެސްޓުގެ ނަތީޖާ ހުށަހަޅަން ނުޖެހޭގޮތަށް ހަދަން ނިންމައިފިއެވެ.
މި ނިންމުމަށް އަމަލު ކުރަން ހަމަޖެހިފައިވަނީ ފެބްރުއަރީމަހުގެ 11 ވަނަ ދުވަހުން ފެށިގެންނެވެ.
އިނގިރޭސިވިލާތުގެ ސަރުކާރުން ވަނީ ވެކްސިން ފުރިހަމަނުކުރާ ފަރާތްތަކަށްވެސް ލުއިތަކެއް ދޭން ނިންމާފައެވެ. އެގޮތުން ޤައުމަށް އެތެރެވުމަށްފަހު އަމިއްލައަށް އެކަހެރިވުމާއި 8 ވަނަ ދުވަހު ޓެސްޓު ހަދަން ނުޖެހޭނެއެވެ. އެހެން ނަމަވެސް ވެކްސިން ނުޖަހާ ފަރާތްތަކުން އެ ޤައުމަށް އެތެރެވާއިރު، ކޯވިޑު ނަތީޖާ ހުށަހަޅަން ޖެހެއެވެ. އަދި އެތެރެވުމަށްފަހު 2 ދުވަސްވުމަށްފަހުވެސް ޓެސްޓު ހަދަން ޖެހެއެވެ.
ޔޫކޭ ޓްރާންސްޕޯޓް ސެކްރެޓަރީ ވިދާޅުވީ އެޤައުމަށް އެތެރެވާ ހުރިހާ ފަރާތްތަކުންވެސް ޕެސެންޖަރ ލޮކޭޓަރ ފޯމް ފުރިހަމަ ކުރަން ޖެހޭނެކަމަށެވެ. މި ފޯމުވެސް ވަނީ ފަސޭހަކޮށްދީފައެވެ.
އިނގިރޭސިވިލާތުން ލުއި ދޭން ނިންމާފައިވަނީ ސްކޫލް ބަންދާއިވެސް ދިމާކޮށެވެ. އެހެންކަމުން އާއިލާތަކުން ޗުއްޓީއަށް ދަތުރުކުރުމުގައި ފަސޭހަވެ ޙަރަދުތައްވެސް ކުޑަވެގެންދާނެކަމަށް އިނގިރޭސި ސަރުކާރުން ޤަބޫލްކުރެއެވެ. އަދި ދަތުރުފަތުރުގެ ނިޒާމަށްވެސް މި ނިންމުމާއެކު ބޫސްޓެއް އަންނާނެ ކަމަށް ވަނީ ލަފާކުރެވިފައެވެ.
ސަރުކާރުގެ މި ނިންމުމަށް ދަތުރުފަތުރާއި ފަތުރުވެރިކަމުގެ ސިނާއަތުންވަނީ މަރުޙަބާ ކިޔާފައެވެ. މި ދެ ސިނާއަތަކީ ކޯވިޑާއި ގުޅިގެން އެންމެ ބޮޑަށް އަސަރުކޮށްފައިވާ ސިނާއަތެވެ.