ޔޫއެސް އެއިޑްގެ ކްލައިމެޓް ޗޭންޖް އެޑެޕްޓޭޝަން ޕްރޮޖެކްޓް މޯލްޑިވްސް އިފްތިތާހްކޮށްފިއެވެ. މިއީ ޔޫއެސް އެއިޑުގެ 10.5 މިލިއަން ޑޮލަރުގެ ހިލޭ އެހީގެ ދަށުން ކުރިއަށްގެންދާ ޕްރޮގްރާމެކެވެ.
މި ޕްރޮޖެކްޓު އިފްތިތާހްކޮށް ދެއްވައި ވާހަކަފުޅު ދައްކަވަމުން މިނިސްޓަރ އޮފް އެންވަޔަރަމެންޓް، ކްލައިމެންޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވީ ދިވެހިރާއްޖެފަދަ ކުދި ޖަޒީރާ ރަށްތަކެއްގެ މައްޗަށް އެކުލެވޭ ޤައުމުތަކަކީ ދުނިޔޭގެ މޫސުމަށް އަންނަ ބަދަލުތަކާއި ގުޅިގެން އެންމެ ފުރަތަމައަށް އަދި އެންމެ ބޮޑަށް ނޭދެވޭ އަސަރުތަކެއް ކުރާނެ ގައުމުތައް ކަމަށެވެ.
މިނިސްޓަރ ޝައުނާ ވިދާޅުވީ، މި ޕްރޮޖެކްޓަކީ ޒުވާނުންގެ ކިބައިގައި ހުރި ހުނަރާއި ގާބިލިއްޔަތު ކަމާއި އުފެއްދުންތެރިކަމުގެ އިތުރުން މޫސުމީ ބަދަލުތަކުގެ ސަބަބުން ކުރިމަތިވާ ނޭދެވޭ އަސަރުތައް މަދުކުރުމަށް ފަހި ވިސްނުމާއި އިތުރު ހިޔާލުތައް ހިއްސާކުރުމަށް ލިބިގެންދާ އިތުރު ފުރުސަތަކަށް ވެގެންދާނެކަމަށް އުންމީދުކުރައްވާ ކަމަށެވެ.
"ދިވެހިރާއްޖެ ފަދަ މޫސުމަށް އަންނަ ބަދަލުތަކަށް ނާޒުކު ގައުމެއްގައި އެކި ދާއިރާތަށް ޝާމިލްވާނެހެން، ގުޅިލާމެހިފައިވާ ގޮތެއްގައި މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމަކީ މުހިއްމުކަމެއް. މުޖުތަމައުގެ ވިލުންވެރިކަމާއި މޫސުމަށް އަންނަ ބަދަލުތަކަށް ހޭނުމަށް ސަރުކާރާއި، ބައިނަލްއަގްވާމީ ފަރާތްތަކުންކުރާ މި މުހިއްމު މަސައްކަތަށް އަމިއްލަ ވިޔަފާރީގެ ދާއިރާއިން އެއްބާރުލުންދޭންޖެހޭ" މިނިސްޓަރ ޝައުނާ ވިދާޅުވިއެވެ.
ޔޫއެސް އެއިޑްގެ ކްލައިމެޓް ޗޭންޖް އެޑެޕްޓޭޝަން ޕްރޮޖެކްޓް ދިވެހިރާއްޖޭގައި ކުރިއަށްގެންދިއުމަށް ބޭނުންވާ ފުރިހަމަ އެއްބާރުލުން މިނިސްޓްރީ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީގެ ފަރާތުން ލިބޭނެކަމުގެ ޔަޤީންކަންވެސް މިނިސްޓަރ ދެއްވިއެވެ.
މި ޕްރޮޖެކްޓްގެ މުހިއްމުކަމުގެ މައްޗަށް އަލިއަޅުއްވާލައްވާ ވާހަކަފުޅު ދައްކަވަމުން މިނިސްޓަރ ވިދާޅުވީ، ދިވެހިރާއްޖެ މޫސުމީ ބަދަލުތަކާއި ކުރިމަތިލާއިރު، މި ޕްރޮޖެކްޓަކީ އެކަމުގެ ސަބަބުން ކުރާ ނޭދެވޭ އަސަރުތައް މަދުކުރުމަށް ލިބޭ އަގުހުރި ފައިދާކުރުވަނިވި ޕްރޮޖެކްޓެއް ކަމާއިމެދު އެއްވެސް ޝައްކެއް ނެތް ކަމަށެވެ.
ކްލައިމެޓް ޗޭންޖް އެޑެޕްޓޭޝަން ޕްރޮޖެކްޓަކީ ސަރުކާރުގެ ސްޓްރެޓެޖިކް އެކްޝަން ޕްލޭންގައި އެކުލެވޭ ވިލުންވެރި މުޖުތަމައުތަކެއް ބިނާކުރުމުގެ ސިޔާސަތަށް އެއްބާރުލުންދީ، މޫސުމަށް އަންނަ ބަދަލުތަކަށް ހޭނުމަށް ހުރި ފުރުސަތުތަކާއި ކުރާ މަސައްކަތްތައް ހަރުދަނާކޮށް، މިހާރާއި މުސްތަގުބަލުގައި ދިމާވެދާނޭ ނާޒުކު ހާލަތްތަކުން ރައްކާތެރިވެފައިވާ އަދި މޫސުމީ ބަދަލުތަކަށް ވިލުންވެރިވެފައިވާ މުޖުތަމައުތަކެއް ބިނާކުރުމަށް އެހީވެދޭނެ ޕްރޮގްރާމެކެވެ.
މި ޕްރޮޖެކްޓްގެ ތެރެއިން މޫސުމީ ބަދަލުތަކާހުރެ ކުރިމަތިވާ ހުރަސްތަކަށް ހުރި އީޖާދީ ހައްލުތައް ފާހަގަކޮށް، މޫސުމަށް އަންނަ ބަދަލުތަކަށް ހޭނުމަށް ކުރަންހުރި މަސައްކަތްތަކުގައި އަމިއްލަ ފަރާތްތަކުގެ ބައިވެރިވުން ހިމެނުމަށް ޔޫ.އެސް.އޭ.އައި.ޑީއިން އެހީތެރިވެދޭނެއެވެ.
ލޯކަލް ޕާޓްނަރުންގެ އެހީގައި މޫސުމަށް އަންނަ ބަދަލުތަކާއި ގުޅިގެން ކުރިމަތިވާ ހިރާސްތަކަށް އިޖާބަދިނުމަށް ގަވަރނަންސް ހަރުދަނާކުރުމާއި، މޫސުމަށް އަންނަ ބަދަލުތަކާއި ގުޅިގެން ކުރިމަތިވާ ނާޒުކުކަން ކުޑަކުރުމަށް ކަންކަން ނިންމުމަށް ރަނގަޅު ފެންވަރުގެ މައުލޫމާތު ފޯރުކޮށްދިނުމަށް މިޕްރޮޖެކްޓުން އެހީތެރިވާނެއެވެ. މޫސުމަށް އަންނަ ބަދަލުތަކަށް ހޭނުމަށް މިޕްރޮޖެކްޓްގެ ދަށުން ސަމާލުކަންދޭނެ ދާއިރާތަކަކީ މިބަދަލުތަކުން އަސަރުކުރުން ގާތް ދާއިރާތަށް ކަމުގައިވާ މަސްވެރިކަމާއި ދަނޑުވެރިކަމާއި ފަތުރުވެރިކަމެވެ.