ދިވެހިރާއްޖެއިން މެލޭޝިޔާއަށް ކަނޑައަޅާފައި ހުންނަވާ ސަފީރު ވިސާމް އަލީ، އެ މަޤާމުން އިސްތިއުފާ ދެއްވައިފިއެވެ. ވިސާމް އިސްތިއުފާދެއްވިކަން ފޮރިން މިނިސްޓްރީން ވަނީ ކަށަވަރުކޮށްދެއްވާފައެވެ. އެހެންނަމަވެސް އިސްތިފާދެއްވި ސަބަބެއް ސާފެއް ނުވެއެވެ.
ވިސާމް އަލީ އިސްތިއުފާދެއްވުމުން ފޮރިން މިނިސްޓަރ ޢަބްދުﷲ ޝާހިދު ކުރެއްވި ޓުވީޓުގައި ވަނީ މެލޭޝިއާގެ ސަފީރުކަމުގައި ހުންނަވާ ވިސާމް ކޮށްދެއްވި ޚިދުމަތްތަކަށް ޝުކުރުއަދާކުރައްވާފައެވެ. އަދި އެކަމަނާއަށް ކާމިޔާބީއަށް އެދިވަޑައިގަންނަވާކަމަށް ވިދާޅުވެފައިވެއެވެ.
Thankyou High Commissioner @visamali for your valuable service to the country, during your tenure as High Commissioner to Malaysia.
— Abdulla Shahid (@abdulla_shahid) April 5, 2022
I am grateful for your counsel and your friendship. Wish you the best in all future endeavours. pic.twitter.com/jyYLYMIEfn
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މެލޭޝިއާއަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމަށް، ހެންވޭރު އާޒާދެވާދީ ވިސާމް ޢަލީ ޢައްޔަން ކުރައްވާފައިވަނީ 26 މާރިޗު 2019 ގައެވެ.
ވިސާމް އަލީ އަކީ 17 ވަނަ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރުކަން ކުރައްވާފައިވާ ބޭފުޅެކެވެ. އެކަމަނާ ވަނީ އޮސްޓްރޭލިއާގެ މުރްޑޮކް ޔުނިވަރސިޓީން ބެޗްލާސް އޮފް ކޮމާސް އަދި ހަމަ އެ ޤައުމުގެ ޔުނިވަރސިޓީ އޮފް އެޑިލެއިޑުން މާސްޓަރ އޮފް ބިޒްނަސް އެޑްމިނިސްޓްރޭޝަން ހާޞިލުކުރައްވާފައެވެ.