ސައުދީ ޢަރަބިއްޔާއިން ރާއްޖެއަށް ހަދިޔާކުރާ ކަދުރު ލިބޭނެކަމަށް ލަފާކުރެވެނީ ރަމަޟާންމަހުގެ ފަހު ދިހައެއްގައި ކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
ސައުދީ އަރަބިއްޔާއިން މިއަހަރު ރާއްޖެއަށް 50 ޓަނުގެ ކަދުރު ހަދިޔާކުރުމަށް ވަނީ ހަމަޖެހިފައެވެ. އިސްލާމިކް މިނިސްޓްރީން ވިދާޅުވީ، މިފަހަރު ރާއްޖެއަށް ކަދުރު ލިބުން ލަސްވީ ކަދުރު މޫސުން ލަސްވުމުންކަމަށެވެ. އަދި ސައުދީން ހަދިޔާކުރާ 50 ޓަނުގެ ކަދުރު ލިބޭނެކަމަށް ލަފާކުރެވެނީ ރަމަޟާންމަހުގެ ފަހު 10 އެއްގައި ކަމަށެވެ.
ކަދުރުތައް ރާއްޖެއަށް ލިބުމުން، އާއްމުންނަށް ބެހުމުގެ މަސައްކަތް ކުރިއަށްގެންދެވޭނެކަމަށް އިސްލާމިކް މިނިސްޓްރީން ވަނީ ވިދާޅުވެފައެވެ. ރަމަޟާންމަހާ ދިމާކޮށް ކޮންމެ އަހަރަކުވެސް ރާއްޖެއަށް ކަދުރު ހަދިޔާކުރުމަކީ ސައުދީ ސަރުކާރުން ޢާންމުކޮށް ކުރަމުން އަންނަ ކަމެކެވެ. އެގޮތުން މިދިޔަ އަހަރު ސައުދީން ވަނީ 25 ޓަނުގެ ކަދުރު ރާއްޖެއަށް ހަދިޔާކޮށްފައެވެ.
މިއަހަރު ރާއްޖެއަށް 50 ޓަނުގެ ކަދުރު ހަދިޔާކުރުމަށް ހަމަޖެހިފައިވާއިރު، ސައުދީ ރަސްގެފާނު ދެއްވާ ޚާއްސަ އިފްތާރު ޕެކޭޖުގެ 200 ޕެކޭޖު ސައުދީން ވަނީ މިމަހުގެ 6ވަނަ ދުވަހު ރާއްޖެއަށް ހަދިޔާކޮށްފައެވެ. އަދި މިދިޔަމަހު ވަނީ ރާއްޖެއަށް 3000 މުސްޙަފުވެސް ހަދިޔާކޮށްފިއެވެ. މީގެތެރޭގައި އާއްމުކޮށް ހުންނަ ސައިޒުގެ އަކުރު ކުދި މުސްޙަފާއި، އަކުރު ބޮޑެތި މުސްޙަފު ހިމެނެއެވެ.
ސައުދީ އަރަބިއްޔާއަކީ ރާއްޖެއަށް އެކި ގޮތްގޮތުން ގިނަ އެހީތަކެއް ފޯރުކޮށްދޭ ޤައުމެކެވެ. ވަކިން ޚާއްސަކޮށް ރާއްޖޭގައި އިސްލާމްދީން ކުރިއަރުވާ، ދީނީ ރޮނގުން މީހުން ބިނާކުރުމަށް ސައުދީ ސަރުކާރުން އަންނަނީ ގިނަ އެހީތަކެއް ފޯރުކޮށްދެމުންނެވެ.