އެންމެ ފަހުގެ ދިވެހި ލީގު ޗެމްޕިއަން ނިއުރޭޑިއަންޓް އާސިޒަނާ ކުރިމަތިލާއިރު ޓީމު ފެންނަނީ މިދިޔަ އަހަރަށްވުރެ ތަންކޮޅެއް އާދައިގެ ގޮތަކަށެވެ. ޓިމުގައި ތިބި އެންމެ ސީނިއަރ ކުޅުންތެރިންގެ ތެރެއިން ބައެއް ކުޅުންތެރިން ވަނީ ޓީމް ދޫކޮށްލާފައެވެ. ޓީމުގެ ކެޕްޓަން އަސްއަދު އަލީ ވަނީ ކްލަބް ދޫކޮށް މާޒިޔާއާ ގުޅިފައެވެ. ޑިފެންޑަރ ޝާފިއު އަހުމަދު ވަނީ ވެލެންސިޔާއާ ގުޅިފައެވެ. އޭގެ އިތުރުން ކުރިޔަށް ކުޅޭ އަލީ ފާސިރާއި، ފަހަތަށް ކުޅޭ އަޙުމަދު އަބްދުﷲ ވަނީ ޓީސީއަށް ބަދަލުވެފައެވެ.ނިއުރޭޑިއަންޓުން މުޙިންމު ކުޅުންތެރިންތަކެއް ދިއުމުން އެތަން ފޫބެއްދުމަށް ތަޖުރިބާކާރު ބައެއް ކުޅުންތެރިންނާއެކު ޒުވާން ގިނަ ކުޅުންތެރިންތަކެއް ވަނީ ގެނެސްފައެވެ. އެގޮތުން ތަޖުރިބާކާރު މިޑްފީލްޑަރ އަޙުމަދު ނިޔާޒްގެ އިތުރުން ދެ ޑިފެންޑަރުންކަމަށްވާ ފަރުހާދު އިސްމާއިލްއާއި، އަބްދުﷲ ހަނީފް ވަނީ ނިއުރޭޑިއަންޓާއި ގުޅިފައެވެ. މީގެ އިތުރުންވެސް އަރަމުން އަންނަ އުންމީދީ ބައެއް ކުޅުންތެރިން ނިއުރޭޑިއަންޓާ ގުޅިފައިވެއެވެ. އޭގެތެރޭގައި ހަސަން ސާއިފް، ޝާދިން، މުސްލިހު، ފާރޫޤް ފަދަ ކުޅުންތެރިން ހިމެނެއެވެ.ނިއުރޭޑިއަންޓްގެ ކުރީގެ މެނޭޖްމަންޓްގެ ދައުރު ހަމަވުމަށްފަހު އާ އިންތިޙާބެއް އަދި ނުބޭއްވެއެވެ. އިންތިޚާބު އޮންނާނީ މިމަހުގެ 28 ވަނަ ދުވަހުއެވެ.ޓީމު ހިންގުމަށް ވަގުތީ ކޮމެޓީއެއް މިހާރު ވަނީ އެކުލަވާލާފައެވެ. ޓީމް ހިންގުމުގައި އިސްކޮށް ހަރަކާތްތެރިވާ އެއް ފަރާތްކަމަށްވާ އެޓީމްގެ ކުރީގެ ކުޅުންތެރިޔާ އަދި ޖެނެރަލް ސެކެޓްރީ އަހުމަދު ނިޔާޒު ބުނީ މިވަގުތު އެންމެ ބޮޑު އިސްކަމެއްދޭ އެއްކަމަކީ ޓީމް ހަމަޔަކަށް އެޅުވުންކަމަށެވެ. އެގޮތުން ބޮޑު ހަމަޖެހުމެއް ލިބިގެންދާނީ އިންތިޙާބު ބޭއްވި، އިންތިޙާބުން ހޮވޭ ފަރާތްތަކުން ކްލަބާ ހަވާލުވުމުންކަމަށް ނިޔާޒު ބުންޏެވެ.ނިޔާޒު ބުނީ ވަގުތީ ހިންގާ ކޮމެޓީން ޓީމާއި ހަވާލުވިއިރު ތިބި ކުޅުންތެރިންގެ އިތުރުން އިތުރު ކުޅުންތެރިންތަކެއް ޓީމަށް ގެނެސް ޓީމުގެ ޕްރެކްޓިސް ވީ އެންމެ އަވަހަކަށް ފެށޭތޯ ބެލިކަމަށެވެ.. ޓީމުގައި މިވަގުތު އެވްރެޖް ޓީމަކަށްވުރެ ރަނގަޅު ޓީމެއް އެބައޮތްކަމަށް ނިޔާޒު ގަބޫލްކުރެއެވެ. ރާއްޖޭގެ އެންމެ ސަޕޯޓަރުން ގިނަ އެއް ކްލަބުގެ ގޮތުގައި ފާހަގަކުރެވޭ ނިއުރޭޑިއަންޓުން ދަނީ ބޭރުން ރަނގަޅު ކުޅުންތެރިންތަކަކާއި ކޯޗެއް ގެނައުމަށް މަސައްކަތްކުރަމުންނެވެ. އެގޮތުން މިހާރު ތިން ކޯޗަކު ޝޯޓްލިސްޓް ކުރެވިފައިވާއިރު ތިން ކޯޗުންވެސް ތިބި ޕޮޒިޓިވްކޮށްކަމަށް ނިޔާޒު މަޢުލޫމާތުދިނެވެ.ނިއުރޭޑިއަންޓަށް މިވަގުތު މުހިންމީ ރާއްޖޭގައި ކޯޗްކޮށްދިނުމުގެ ތަޖުރިބާހުރި ކޯޗެއްކަމަށް އޭނާ ގަބޫލްކުރެއެވެ. ނިއުރޭޑިއަންޓުން ޔަގީންކޮށްނުދިންކަމުގައިވީނަމަވެސް އެ ޓީމަށް ގެންނާނީ ސްޓޮއިކޮފްކަމަށް މަޢުލޫމާތުލިބިފައިވެއެވެ. މިދިޔަ އަހަރު މަހިބަދޫއަށް އިރުޝާދުދިން ސްޓޮއިކޮފްވަނީ މީގެ ކުރިން ނިއުރޭޑިއަންޓުގެ އިތުރުން ރާއްޖޭގެ ޤައުމީ ޓީމަށްވެސް އިރުޝާދުދީފައެވެ.ނިއުރޭޑިއަންޓަށް މިވަގުތު ކުޅުންތެރިން ބޭނުންވެފައިވާ މުހިންމު ޑިޕާޓްމެންޓްތަކަކީ ޑިފެންސާއި، މިޑްފީލްޑްކަމަށް ނިޔާޒު ބުންޏެވެ. އަދި އޭގެ އިތުރުން ކީޕަރެއްގެ ބޭނުންވެސް ނިއުރޭޑިއަންޓަށް މުހިންމުކަމަށް އޭނާ ބުންޏެވެ. ނިއުރޭޑިއަންޓުން މިހާރު ޝޯޓްލިސްޓްކޮށްފައިވާ ކުޅުންތެރިންނަކީ ފެންވަރު ރަނގަޅުވާނެ ކުޅުންތެރިންނަށް ވާނޭކަމަށް އޭނާ ގަބޫލްކުރެއެވެ. ނިއުރޭޑިއަންޓް މި ސީޒަނުގައި ކުޅެން ޖެހޭ ފުރަތަމަ މުބާރާތަކީ އަންނަ މަހު ފަށާ އޭ.އެފް.ސީ ކަޕެވެ. އެ މުބާރާތުގައި ނިއުރޭޑިއަންޓް އަންނަ މަހުގެ 23 ގައި ކުޅޭ ފުރަތަމަ މެޗުގައި ބައްދަލްކުރަން ޖެހޭނީ ސިންގަޕޫރުގެ ބަލެސްޓިއާ ކަލްސާ ފުޓްބޯޅަ ކްލަބާއެވެ. ނިއުރޭޑިއަންޓް ހިމެނޭ ގްރޫޕް އެފްގައި ދެން ހިމެނެނީ ހޮން ކޮންގެ ކިޗީއާއި، ފިލިޕީންސްގެ ކާޔާ އެފްސީއެވެ.