ސައިންސާއި ޓެކްނޮލޮޖީ އަދި ޖައްވީ މަސައްކަތްތަކަށް އިންވެސްޓްކުރާ އެމެރިކާގެ މަޝްހޫރު ބިލިއަަނަރު އިލާން މަސްކު، ސޯޝަލް މީޑިއާގެ އެންމެ މަޝްހޫރު އެއް ޕްލެޓްފޯމްކަމަށްވާ ޓްވިޓަރ ގަންނަން ހުށަހަޅައިފިއެވެ.
ޕަބްލިކް ކުންފުންޏެއްކަމަށްވާ ޓްވިޓަރ ގަންނަން އިލާން މަސްކު ހުށަހަޅާފައިވާއިރު، އޭނާއަކީ މިހާރުވެސް 9.2 އިންސައްތަ ހިއްސާއާއެކު ޓްވިޓަރގެ އެންމެ ބޮޑު ހިއްސާދާރެވެ.
ދުނިޔޭގެ އެންމެ މުއްސަނދި މީހާގެ ގޮތުގައި ހުރި އިލާން މަސްކު ހުށަހަޅާފައިވަނީ ހިއްސާއަކަށް 54.20 ޑޮލަރުގެ ރޭޓުން 40 ބިލިއަން ޑޮލަރަށް ޓްވިޓަރ ގަތުމަށެވެ. އަދި އޭނާ ހުށަހަޅާފައިވާ ހުށަހެޅުމާއި ދެކޮޅު ހަދާނަމަ ޓްވިޓަރގައި އޮތް އޭނާގެ 9.2 އިންސައްތަ ވިއްކާލުމާއި ގުޅޭގޮތުން ވިސްނާނެކަމަށް އިލާން ބުންޏެވެ.
އިލާން ބުނީ ޓްވީޓަރ ގަތުމަށް ހުށަހަޅާފައިވާ ހުށަހެޅުމާމެދު ކުންފުނީގެ ހިއްސާދާރުންގެ ލަފައެއް ނުހޯދައި، ކުންފުނީގެ ބޯޑުން އެ ހުށަހެޅުން ބަަލައިނުގަތުމަށް ނިންމައިފިނަމަ އެކަން ބަލައިނުގަނެވޭނެކަމަށެވެ.
"ހިއްސާދާރުން ކުންފުނީގެ ވެރިންނަކީ، ބޯޑު އޮފް ޑައިރެކްޓަރސްއެއް ނޫން" އިލާން ކުރި ޓްވީޓެއްގައި ބުންޏެވެ.
I made an offer https://t.co/VvreuPMeLu
— Elon Musk (@elonmusk) April 14, 2022
ޓްވިޓަރ ގަންނަން އިލާން ހުށަހެޅި ހުށަހެޅުމާއެކު ޓްވީޓަރގެ ހިއްސާގެ އަގުވަނީ 5.3 އިންސައްތަ އުފުލި، ހިއްސާއެއްގެ އަގު 48.32 ޑޮލަރަށް އަރާފައެވެ. ނަމަވެސް ފަހުން ވަނީ 46.20 ޑޮލަރަށް ވެއްޓިގައެވެ.
ޓްވީޓަރގެ އެންމެ ބޮޑު ހިއްސާދާރަކީ އިލާން މަސްކުކަމުގައި ވިޔަސް، ޓްވިޓަރ ޑިރެކްޓަރުންގެ ބޯޑުން އޭނާއަށް ދިން ޖާގަ ޤަބޫލުނުކުރުމަށް ވަނީ ނިންމާފައެވެ.
އިލާން ޤަބޫލުކުރާގޮތުގައި ޓްވިޓަރ މިހާރު ހިނގަމުންދާ ގޮތަށް ހިންގާނަމަ މާބޮޑު ކުރިއެރުމެއް ކުންފުންޏަށް ލިބޭކަށް ނެތެވެ. އަދި އެކުންފުންޏަށް ބޮޑެތި ކުރިއެރުންތަކެއް ހޯދެން އެބައޮތްކަމަށާއި، އެކަން ކުރެވެން އޮތީ ކުންފުނި ޕްރައިވެޓައިޒްކޮށްގެންކަމަށްވެސް އިލާން ބުނެފައިވެއެވެ.
އިލާންގެ ހުށަހެޅުމާއި ގުޅިގެން ޓްވިޓަރއިން ބުނީ، އެ ހުށަހެޅުން ވަރަށް ރަނގަޅަށް ދިރާސާކުރާނެކަމަށެވެ. އަދި އެކަމުގައި ގޮތެއް ނިންމާނީ ކުންފުންޏާއި ކުންފުނީގެ ހިއްސާދާރުންގެ މަސްލަހަތަށް ބަލައިގެންކަމަށްވެސް ޓްވިޓަރއިން ބުނެފައިވެއެވެ.
ފޯބްސްއިން ބުނާގޮތުން އިލެކްޓްރިކް ކާރު އުފައްދާ ޓެސްލާ އަދި ޖައްވީ މަސައްކަތްތައް ކުރާ ސްޕޭސް އެކްސްގެ ވެރިޔާ އިލާން މަސްކަކީ ދުނިޔޭގައި މިވަގުތު ހުރި އެންމެ މުއްސަނދި މީހާއެވެ. އޭނާގެ މިލްކިއްޔާތުގެ އަގު 273 ބިލިއަން ޑޮލަރަށް އަރާކަމަށް ފޯބްސްއިން ބުނެއެވެ.