ކުއިކްޕޭ މެދުވެރިކޮށް ހިޔާ ފްލެޓްތަކަށް ފައިސާ ދެއްކޭނެ އިންތިޒާމް ހަމަޖައްސައިފިއެވެ.
ހިޔާ މަޝްރޫއުގެ ދަށުން ދިރިއުޅުމަށް ދޫކޮށްފައިވާ ފްލެޓްތަކުގެ ގްރޭސް ޕީރިއަޑްގެ ގޮތުގައި ކަނޑައެޅިފައިވާ މުއްދަތު 3 ފަހަރެއްގެ މަތިން އިތުރުކުރުމަށްފަހު 1 އޭޕްރީލް 2022 ވަނަ ދުވަހުން ފެށިގެން އެޗް.ޑީ.ސީން ވަނީ ނަގަންފަށާފައެވެ.
އެއްބަސްވުމުގެ ދަށުން ހިޔާ ފްލެޓްތަކަށް ދައްކަންޖެހޭ އިންސްޓޯލްމަންޓް ފީ ބަލައިގަތުމަށް ހަމަޖެހިފައިވާގޮތަކީ އެޗް.ޑީ.ސީގެ މައިހުޅުމާލެ ޕޯޓަލް މެދުވެރިކޮށް އަދި އެޗް.ޑީ.ސީގެ ކަލެކްޝަން ކައުންޓަރ މެދުވެރިކޮށެވެ. މީގެ އިތުރުން، އިތުރު ލުއިފަސޭހަތަކެއް އާންމުންނަށް ފޯރުކޮށްދިނުމުގެ ގޮތުން ކުއިކްޕޭ މެދުވެރިކޮށް ފައިސާ ދެއްކުމުގެ އިންތިޒާމް އެޗް.ޑީ.ސީން މިހާރު ވަނީ ހަމަޖައްސާފައެވެ.
އެޗް.ޑީ.ސީން ވިދާޅުވީ، ކުއިކްޕޭ މެދުވެރިކޮށް ފްލެޓްގެ ވެރިފަރާތް ނޫން އެހެންފަރާތަކަށްވެސް އެ ފްލެޓެއްގެ އިންސްޓޯލްމަންޓް ފީ ދެއްކޭނެކަމަށެވެ. އަދި މިކަމުގެ ސަބަބުން ފްލެޓަށް ފައިސާ ދެއްކުމަށް އާންމުންނަށް ދިމާވެފައިވާ ދަތިތަކަށް ހައްލެއް ލިިބގެންދާނެކަމަށެވެ. ކުއިކްޕޭ މެދުވެރިކޮށް ހިޔާ ފްލެޓްތަކަށް ކުލި ދެއްކުމަށް payments.hdc.com.mv/Quickpay މި ލިންކް މެދުވެރިކޮށް އެކަން ކުރެވޭނެއެވެ.
ހިޔާ ފްލެޓްތަކަށް ފައިސާ ދެއްކުމަށް ކުއިކްޕޭ!
— HDC (@hdcmaldives) April 21, 2022
މިހާރު ފްލެޓްގެ އިންސްޓޯލްމަންޓް ފީ އެފްލެޓެއްގެ ވެރިފަރާތް ނޫން އެހެންފަރާތަކަށްވެސް ފަސޭހަކަމާއިއެކު ދައްކައިލެވޭނެ. #MageyHiya #MyHulhumale pic.twitter.com/1ZW2nc6XEE
ހިޔާ މަޝްރޫޢުގެ އެއްބަސްވުމުގެ 6 ވަނަ މާއްދާގެ ދަށުން ދައްކަންޖެހޭ އިންސްޓޯލްމަންޓާއި، މެނޭޖްމަންޓް ފީގެ ތެރެއިން އޭޕްރީލްމަހު ދައްކަންޖެހޭ ފައިސާ މިމަހުގެ 10 ވަނަ ދުވަހުގެ ކުރިން ދެއްކުމަށް ކަނޑައެޅިފައިވާ މުއްދަތު މިމަހުގެ 30 ވަނަ ދުވަހާއި ހަމައަށް އެޗް.ޑީ.ސީން ވަނީ އިތުރުކޮށްދީފައެވެ.
މި މުއްދަތުގެ ތެރޭގައި އެޗް.ޑީ.ސީގެ ޕޭމަންޓް ޕޯޓަލް އަދި ކައުންޓަރުން ފައިސާ ދެއްކުމުގެ އިތުރުން ކުއިކްޕޭ މެދުވެރިކޮށް ފައިސާ ދެއްކުމުގެ އިންތިޒާމް ހަމަޖެހިފައިވާއިރު، އެއްވެސް އިތުރު ޖޫރިމަނާއެއް ނާރާނެކަމަށް އެޗް.ޑީ.ސީން ވިދާޅުވިއެވެ.
އެހެންނަމަވެސް އަންނަ މެއިމަހުން ފެށިގެން ކޮންމެ މަހެއްގެވެސް ޖޫރިމަނާއަކާ ނުލާ ކުލި ދެއްކުމުގެ އެންމެ ފަހު ތާރީޚަކީ އެމަހެއްގެ 10 ވަނަ ދުވަސްކަމަށް އެ ކޯރޕަރޭޝަނުން ވަނީ ކަނޑައަޅާފައެވެ.