ވެލާނާ އިންޓަރނޭޝަނަލް އެއަރޕޯޓުގެ އައު ފިއުލް ފާމާއި، އައު ކާގޯ ޓަރމިނަލް ކޮމްޕްލެކްސްގެ މަސައްކަތް ނިންމާ މިއަހަރުގެ ތެރޭ އެ ދެ ތަން ބޭނުންކުރުމަށް ތައްޔާރުވަމުންދާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލުން ވިދާޅުވެއްޖެއެވެ.
ވީ.އައި.އޭ ތަރައްޤީކުރުމަށް ކުރިއަށްގެންދާ 1 ބިލިއަން ޑޮލަރުގެ ބިޔަ މަޝްރޫޢުގެ ދަށުން އެއަރޕޯޓުގެ ޖާގަ އިތުރުކޮށް، ތަނުގެ ވަޞީލަތްތައް ތަރައްޤީކުރުމުގެ މަސައްކަތް އަންނަނީ ކުރަމުންނެވެ. ފިޔަވަހިތަކަކަށް ބަހާލައިގެން ކުރިއަށްގެންދާ މި މަޝްރޫޢުގެ ދަށުން އައު ރަންވޭގެ މަސައްކަތާއި، ފިއުލްފާމާއި ކާގޯ ޓަރމިނަލް ކޮމްޕްލެކްސްގެ މަސައްކަތް ޙަވާލުކޮށްފައިވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއެވެ. މީގެ ތެރެއިން އައު ރަންވޭގެ މަސައްކަތް ނިމިފައިވާއިރު، ފިއުލް ފާމާއި، ކާގޯ ޓަރމިނަލް ކޮމްޕްލެކްސްގެ މަސައްކަތްވެސް މިހާރު ވަނީ ނިމުމަކާގާތްވެފައެވެ.
އެމް.އޭ.ސީ.އެލުން ވިދާޅުވީ، އައު ފިއުލް ފާމުގެ 95 އިންސައްތަ މަސައްކަތް ނިމިފައިވާކަމަށެވެ. އަދި މިހާރު ކުރިއަށްދަނީ އިލެކްޓްރިކަލް އަދި ފަޔަރ ފައިޓިންގ ސިސްޓަމްތަކާއި، ސެކިޔުރިޓީއާއި ސީސީޓީވީތައް ކޮމިޝަންކޮށް ޓެސްޓުކުރުމުގެ މަސައްކަތްކަމަށެވެ. މިއާއެކު ފިއުލް ސިސްޓަމްތައް ޓެސްޓްކޮށް ކޮމިޝަންކުރުމުގެ މަސައްކަތްތައް ކުރިއަށް ރޭވިފައިވާކަމަށް އެކުންފުނިން ވިދާޅުވެއެވެ.
މި މަޝްރޫއުގެ ދަށުން ޤާއިމްކުރި ލޭންޑްސައިޑް ފިއުލިންގް ސްޓޭޝަންގެ މަސައްކަތްތައް ނިމިފައިވާއިރު، ކަރަންޓް ޓެސްޓު ކުރުމާއި މީހުން ތަމްރީނުކުރުމުގެ މަސައްކަތް އަންނަނީ ކުރަމުންނެވެ. އަދި މި ހިނގާ މޭ މަހުގެ ނިޔަލަށް މި ސްޓޭޝަން ބޭނުންކުރަން ފެށޭނެކަމަށް އެމް.އޭ.ސީ.އެލުން ވިދާޅުވެއެވެ.
އަލަށް ތަރައްޤީކުރާ ފިއުލް ފާމަކީ މިހާރު ބޭނުންކުރާ ފިއުލް ފާމަށްވުރެ ޖާގައިގެ ގޮތުން 3 ގުނަ ބޮޑު ތަނެކެވެ. މިތަނުގައި 45 މިލިއަން ލީޓަރުގެ ޖެޓް A1 ފިއުލް، އެއް މިލިއަން ލީޓަރުގެ ޑީސަލް އަދި 0.1 މިލިއަން ލީޓަރުގެ ޕެޓްރޯލް ރައްކާކުރެވޭނެއެވެ. ފިއުލް ސްޓޯރޭޖްގެ އައު އެކްސްޕޭންޝަނާއެކު ވީ.އައި.އޭގައި ފިއުލް ހައިޑްރަންޓް ސިސްޓަމް ހަރުކޮށް، އެއަރލައިންތަކަށް ތެޔޮ އެޅުމަށް ހޭދަވާ ވަގުތު ކުރުވެގެންދާނެއެވެ. މިއީ އެއަރޕޯޓުގެ އޮޕަރޭޝަންތައްވެސް މިހާރަށްވުރެ އަވަސްކުރުމަށް ހުޅުވިގެންދާނެ ދޮރެއްކަމަށް އެމް.އޭ.ސީ.އެލުން ވިދާޅުވެއެވެ.
އެއަރޕޯޓުގެ އައު ކާގޯ ޓަރމިނަލް ކޮމްޕްލެކްސްގެ 93 އިންސައްތަ މަސައްކަތް މިހާރު ވަނީ ނިމިފައެވެ. ޓަރމިނަލުގެ އެތެރޭގެ ފެންސް ޖެހުމުގެ އިތުރުން، ފިނިޝިންގެ ބައެއް މަސައްކަތްތަކާއި މެޝިނަރީ އިންސްޓޯލްކުރުމާއެކު އައި.ސީ.ޓީ ނެޓްވަރކް ޤާއިމްކުރުމުގެ މަސައްކަތްތައް ކުރަމުންދާކަމަށް އެމް.އޭ.ސީ.އެލުން ވިދާޅުވެއެވެ.
މި ޓަރމިނަލް ފުރިހަމަކުރުމަށް ބޭނުންވާ ބައެއް ސާމާނު ލިބުމުގައި ހުރި ދަތިކަމާއެކުވެސް ސެޕްޓެންބަރުމަހުގެ މެދުތެރެއަށް ޓަރމިނަލް ޓެސްޓުކުރެވި ކޮމިޝަންކޮށް ނިންމާލެވޭނެކަމަށް އެމް.އޭ.ސީ.އެލުން ވިދާޅުވެއެވެ. ޓަރމިނަލާއި އިންވެގެން ތަރައްޤީކުރެވެމުންދާ ކާގޯ ހާބަރުގެ މަސައްކަތުގެ 98 އިންސައްތަ ،މިހާރު ނިމިފައިވާކަމަށްވެސް އެކުންފުނިން ވިދާޅުވެއެވެ.
ވީ.އައި.އޭގެ ހުޅަނގު ފަރާތުގައި ތަރައްޤީކުރާ އައު ކާގޯ ޓާމިނަލް ކޮމްޕްލެކްސްގައި ޒަމާނީ ވަސީލަތްތަކާއެކު ކާގޯ ލޯޑްކޮށް އަންލޯޑް ކުރުމަށް ބޭނުންކުރާނެ ވަޞީލަތްތައް ޤާއިމުކުރެވިގެންދާނެއެވެ.
އަހަރެއްގެ މައްޗަށް 120،000 ޓަނު ކާގޯ މިތަނުން ޕްރޮސެސް ކުރެވޭނެކަމަށް އަންދާޒާ ކުރެވެއެވެ. މިއީ މިހާރު ބޭނުންކުރާ ކާގޯ ޓާމިނަލްގެ 50 ޕަސެންޓަށް ވުރެ ބޮޑު އަދަދެކެވެ. 4 ބުރީގެ ޒަމާނީ ސީޕްލޭން ޓާމިނަލްއަކީ ވީވީއައިޕީ އަދި ޑެޑިކޭޓެޑް އެރައިވަލް ލޮބީ ފަދަ އާ ވަސީލަތްތައް ހިމެނޭ ޓާމިނަލެކެވެ. 28،000 އަކަމީޓަރުގެ މި ޓަރމިނަލުގައި ތަނަވަސް ލައުންޖްތަކާއި، އިތުރު ބޯޑިން ގޭޓްތައް ޤާއިމުކޮށްފައިވެއެވެ.