އެސްޓީއޯއަށް މިދިޔަ އަހަރު ލިބުނު ފައިދާއިން ހިއްސާއަކަށް 65 ރުފިޔާ ބަހަން ފާސްކޮށްފިއެވެ.
އެސްޓީއޯއިން މިގޮތަށް ފާސްކޮށްފައިވަނީ އެކުންފުނިން ބޭއްވި 2021 ވަނަ އަހަރުގެ އަހަރީ އާއްމު ޖަލްސާގައި ބައިވެރިވި ހިއްސާދާރުންގެ ވޯޓުންނެވެ. މިދިޔަ އަހަރު އެސްޓީއޯއިން ބަހާފައިވަނީ ހިއްސާއަކަށް 60 ރުފިޔާއެވެ. އެހެންކަމުން މިއަހަރުގެ އަދަދަކީ މިދިޔަ އަހަރާއި އަޅާބަލާއިރު 5 ރުފިޔާގެ އިތުރުވުމެކެވެ. 2020 ވަނަ އަހަރު ބަހާފައިވަނީ 58 ރުފިޔާއެވެ.
ފާއިތުވީ 2 އަހަރު ކޯވިޑާއި ގުޅިގެން އޮންލައިންކޮށް ބޭއްވުމަށްފަހު މިއަހަރު އެސްޓީއޯގެ އަހަރީ އާއްމު ޖަލްސާ ބާއްވާފައިވަނީ ކްރޮސް ރޮޑްސް މޯލްޑިވްސްގައެވެ.
މި ޖަލްސާއަކީ މިހާތަނަށް އެސްޓީއޯގެ އެންމެ ގިނަ ހިއްސާދާރުން ބައިވެރިވި ޖަލްސާކަމަށް އެކުންފުނިން ހާމަކުރެއެވެ. އެގޮތުން 782 ހިއްސާދާރުން މި ޖަލްސާގައި ބައިވެރިވެފައިވެއެވެ. އެއީ ޖަލްސާއަށް ހާޒިރުވެފައިވާ 157 ހިއްސާދާރުންނާއި، ޕްރޮކްސީ މެދުވެރިކޮށް ބައިވެރިވެފައިވާ 686 ހިއްސާދާރުންނެވެ. ބައެއް ހިއްސާ ދާރުން އޮންލައިންކޮށްވެސް މި ޖަލްސާގައި ބައިވެރިވެފައިވެއެވެ.
އަހަރީ އާއްމު ޖަލްސާގައި އެސްޓީއޯ އޮޑިޓް ކުރަން ޕްރައިސް ވޯޓާ ހައުސް ކޫޕާސް އައްޔަން ކުރަން ވަނީ ފާސްކޮށްފައެވެ. އަދި ކުންފުނީގެ އާންމު ހިއްސާދާރުންގެ ފަރާތުން ޑިރެކްޓަރުންގެ ބޯޑަށް 2 ފަރާތަކުން ވަނީ ކުރިމަތިލާފައެވެ. ހިއްސާދާރުންގެ ވޯޓާއެކު މި މަޤާމަށް ހޮވުނީ ވ. ޝެހެނާޒް މަންޒިލް، އަބްދުﷲ ސައީދެވެ. ކުރިން މި މަޤާމްގައި ހުންނެވީ، ހ. މޮސްކޯގެ، އައިމިނަތު ރުޝްމާއެވެ.
މިދިޔަ އަހަރަކީ އެސްޓީއޯ ގްރޫޕްއަށް މާލީގޮތުން ކާމިޔާބު އަހަރެކެވެ. އެގޮތުން އެކުންފުންޏަށް މިދިޔަ އަހަރު 11.24 ބިލިއަން ރުފިޔާގެ އާމްދަނީއެއް ވަނީ ލިބިފައެވެ. މިއީ އޭގެ ކުރީ އަހަރާއި އަޅާ ބަލާއިރު 32 އިންސައްތައިގެ ކުރިއެރުމެކެވެ. ޓެކްސްއަށް ކެނޑުމަށްފަހު ކުންފުނީގެ ސާފު ފައިދާއަކީ 487 މިލިއަން ރުފިޔާއެވެ. މިއީ އޭގެ ކުރީ އަހަރާއި އަޅާބަލާއިރު 35 އިންސައްތައިގެ ކުރިއެރުމެކެވެ. މީގެ މައިގަނޑު ސަބަބަކީ، ވިއްކި ތެލުގެ އަދަދު އިތުރުވުމާއިއެކު ކުންފުނިން ކުރަމުންގެންދިޔަ އެހެނިހެން ވިޔަފާރި ރަނގަޅުވުމެވެ.
އެސްޓީއޯއަކީ ރާއްޖޭގައި އެންމެ ފުޅާ ދާއިރާއެއްގައި ގިނަ ވިޔަފާރިތަކެއް ކުރާ ކުންފުންޏެކެވެ. އެގޮތުން ތެލާއި ބޭހާއި އަދި ކޮންސްޓްރަކްޝަން ސާމާނުގެ އިތުރުން ކެއިން ބުއިމުގެ ބާވަތްތަކުގެ ވިޔަފާރިވެސް އެކުންފުނިން ކުރެއެވެ. މިއާއެކު އެކުންފުންޏަކީ އަހަރުން އަހަރަށް ފައިދާވާ ކުންފުންޏެކެވެ.