ދިވެހިރާއްޖެ ދެމެހެއްޓެނިވި އިޤްތިޞާދަކާ ދިމާއަށް ދިއުމަށް ތިމާވެށީގެ ދާއިރާއިން އިތުރު ހޯދުންތައް ހޯދައި ދިރާސާތައް ކުރަންޖެހޭކަމަށް ސްޓޭޓް ޓްރޭޑިންގ އޯގަނައިޒޭޝަން، (އެސް.ޓީ.އޯ)ގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވެއްޖެއެވެ.
އަމްރު މިހެން ވިދާޅުވީ، އިންޓަރނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން، އައި.ޓީ.އެފް.ސީން އިންތިޒާމްކޮށްގެން ބޭއްވި "އައި.އެސް.ޑީ.ބީ ގްރޫޕް ޕްރައިވެޓް ސެކްޓަރ ފޯރަމް"ގައި ބައިވެރިވެވަޑައިގެން ވާހަކަދައްކަވަމުންނެވެ.
މި ފޯރަމް ޚާއްސަކޮށްފައިވަނީ ވިޔަފާރީއާއި އިޤްތިޞާދީ ދާއިރާ ފުޅާކުރުމުގައި ސަރަހައްދީ އެއްބާރުލުމާއި، ދެމެހެއްޓެނިވި ގޮތްތަކާއި، އެންމެންގެ ބައިވެރިވުން ހޯދުމުގެ މުހިންމުކަމުގެ މައްޗަށެވެ. މި ފޯރަމްގައި ސްޕީކަރއެއްގެގޮތުގައި ބައިވެރިވެވަޑައިގެން ވާހަކަދައްކަވަމުން އެސް.ޓީ.އޯގެ މެނޭޖިންގ ޑިރެކްޓަރ ހުސެއިން އަމްރު ވަނީ އައި.ޓީ.އެފް.ސީން އެސް.ޓީ.އޯއަށް ފޯރުކޮށްދޭ ފައިނޭންސިންގ ފެސިލިޓީ 175 މިލިއަން ޑޮލަރަށް ބޮޑުކޮށްދެއްވިކަމަށްޓަކާ ޝުކުރު އަދާކުރައްވާފައެވެ. އަދި މިއީ ރާއްޖޭގެ ބޭހާއި ކާނާއާއި ހަކަތައިގެ ޔަޤީންކަން ކަށަވަރުކުރުމަށް އެކުންފުނިން ކުރާ މަސައްކަތްތަކަށް ލިބިގެންދާ އިތުރު ބާރެއްކަމަށެވެ.
އަމްރު ވިދާޅުވީ، ރާއްޖޭގެ އިޤްތިޞާދު މައިގަނޑުގޮތެއްގައި ބިނާވެފައިވަނީ ފަތުރުވެރިކަމަށާއި މަސްވެރިކަމުގެ މައްޗަށް ކަމަށާއި، މި ދެ ދާއިރާއަކީވެސް ކަނޑުގެ ލޮނުގަނޑު އުފުލުމާއި، ފިނިހޫނު މިން މައްޗަށް ދިއުންފަދަ މޫސުމީ ބަދަލުތަކުގެ ނުރައްކާ ބޮޑު ދެ ދާއިރާކަމަށެވެ. އެގޮތުން ރަށްގިރުމާއި، މުރަކަ ހުދުވުންފަދަ މައްސަލަތަކުގެ ސަބަބުން މަސްވެރިކަމާއި ފަތުރުވެރިކަމަށް އެކަމުގެ ނުރަނގަޅު އަސަރުކުރާކަން އަމްރު ފާހަގަކުރެއްވިއެވެ.
މޫސުމީ ބަދަލުތަކާދެކޮޅަށް އަޑުއުފުލާ، މިފަދަ ބަދަލުތަކަށް ހޭނުމުގައި ރާއްޖެއަކީ ނަމޫނާ ޤައުމެއްކަން ފާހަގަކުރައްވައި، އަމްރު ވިދާޅުވީ، ތިމާވެއްޓާ ރައްޓެހި ކަންކަން ޕްރޮމޯޓްކުރުމަށް ރާއްޖޭގައި ބައެއް ރިސޯޓުތަކުންވެސް މަސައްކަތްކުރަމުންދާކަމަށެވެ. އެގޮތުން ބައެއް ރިސޯޓުތައް މިހާރު ހިންގަމުންދަނީ މުޅިން އިއާދަކުރަނިވި ހަކަތަ ބޭނުންކޮށްގެންކަމަށް އަމްރު ވިދާޅުވިއެވެ. އަދި ތަފާތު ގޮތްގޮތުންނާއި، ތަފާތު ފޯރަމްތައް މެދުވެރިކޮށް މިފަދަ ކަންކަމަށް ހޭލުންތެރިކުރުމަށް ރާއްޖެއިން ގިނަ މަސައްކަތްތަކެއް ކުރަމުންދާކަމަށް އަމްރު ވިދާޅުވިއެވެ.
އަމްރު ވިދާޅުވީ، ދުނިޔޭގެ ވެއްޓަށް އަންނަމުންދާ ބަދަލުތަކާއެކު، ދެމެހެއްޓިނިވި އިޤްތިޞާދަކަށް ވާސިލުވުމަށް ތިމާވެށީގެ ރޮނގުން އިތުރު ދިރާސާތަކާއި ހޯދުންތައް ހޯދަންޖެހޭކަމަށެވެ. އަދި ރާއްޖެއަކީ މިފަދަ ދިރާސާތައް ކުރުމަށް އެންމެ އެކަށީގެންވާ އެއް މަންޒިލްކަން ފާހަގަކުރައްވާ، ބައިނަލްއަޤްވާމީ ރިސަރޗް އިންސްޓިޓިއުޝަންތަކާއި، ޔުނިވަރސިޓީތަކަށް އެ ފުރުޞަތު އެބައޮތްކަމަށް އަމްރު ވިދާޅުވިއެވެ.
"ރާއްޖެއަކީ ތިމާވެށީގެގޮތުން ބަލާނަމަ އެންމެ ނާޒުކު އެއް ޤައުމު ކަމަށްވާތީ، މިތަނަކީ ކޭސް ސްޓަޑީޒްއާއި ރިސަރޗް ހެދުމަށް އެންމެ އެކަށީގެންވާ ތަން. އެހެންނަމަވެސް، ހިތާމައަކީ، އަޅުގަނޑުމެންގެ ތަޢުލީމީ ނިޒާމަކީ، އެހާ ކުރިއަރާފައިވާ ނިޒާމެއް ނޫން. އަޅުގަނޑަށް ހީވަނީ ބައިނަލްއަޤްވާމީ ރިސަރޗް އިންސްޓިޓިއުޝަންތަކަށާއި ޔުނިވަރސިޓީތަކަށް ސަރވޭތައްކޮށް، ރިސަރޗް ކުރުމުގެ ފުރުޞަތު އެބައޮތްހެން. ރިސަރޗްތައްކޮށް އެފޯޑަބަލް ޓެކްނޮލޮޖީތައް އެބަ ގެންނަންޖެހޭ" އަމްރު ވިދާޅުވިއެވެ.
އަމްރު ވިދާޅުވީ، ރާއްޖޭގައި ކާބޯތަކެއްޗާބޭހާއި ހަކަތައިގެ ޔަޤީންކަން ކަށަވަރުކުރުމުގައި އެސް.ޓީ.އޯއިން މުހިއްމު ދައުރެއް އަދާކުރާއިރު، އެސް.ޓީ.އޯއިން ހަރަކާތްތެރިވާ ދާއިރާތަކުގައިވެސް ތިމާވެއްޓާއި ރައްޓެހި އުޞޫލުތަކާއި ޓެކްނޮލޮޖީ ބޭނުންކުރުމަށް އިސްކަންދޭކަމަށެވެ. އެގޮތުން ރާއްޖޭގެ ރަށްރަށަށް ކަރަންޓު ފޯރުކޮށްދިނުމަށް ބޭނުންކުރާ ތެލުގެ ގޮތުގައި މީގެކުރިން އެތެރެކުރަމުން ދިޔައީ އިންސާނުންގެ ނޭވާލާ ނިޒާމަށް ގެއްލުންދޭ މާއްދާއެއްކަމަށްވާ ސަލްޕާ ކޮންޓެންޓް 2.5 އިންސައްތަ ހިމެނޭ ތެޔޮކަމަށާއި އެހެންނަމަވެސް މިހާރު އެކުންފުނިން ރާއްޖެ އެތެރެކުރަނީ ސަލްފާ ކޮންޓެންޓް %0.01 ހިމެނޭ ތެޔޮކަން އަމްރު ފާހަގަކުރެއްވިއެވެ. އަދި ރާއްޖެއަށް އެތެރެކުރާ ތެޔޮ ޓެސްޓުކުރެވޭނެ އިންތިޒާމުވެސް އެކުންފުނިން ޤާއިމުކޮށްފައިވާކަމަށް އަމްރު ވިދާޅުވިއެވެ.
މީގެ އިތުރުން މި ފޯރަމުގައި އަމްރު ވަނީ ދިވެހިރާއްޖެއިން 2030ގެ ނިޔަލަށް ނެޓް ޒީރޯ ޤައުމަކަށްވުމަށާއި، އެއްފަހަރު ބޭނުންކޮށްފައި އުކާލެވޭ ޕްލާސްޓިކާއި ދެކޮޅަށް ރާއްޖެއިން ކުރަމުންދާ މަސައްކަތްތަކާއި، ސަރުކާރުން އަޅަމުންދާ ހަރުދަނާ ފިޔަވަޅުތަކުގެ މަޢުލޫމާތުވެސް ހިއްސާކުރައްވާފައެވެ.