ހިޔާ ފްލެޓްތަކަށް ކުލި ނުދައްކާ ފަރާތްތަކުން، އަރާފައިވާ ޖޫރިމަނާއާއެކު އެ ފައިސާ ދެއްކުމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ވިދާޅުވެއްޖެއެވެ.
ހިޔާ ފްލެޓްތައް ލިބުނު ފަރާތްތަކާއެކު ވެފައިވާ އެއްބަސްވުމާއެއްގޮތަށް މި ފްލެޓްތަކުން އެޗް.ޑީ.ސީން ކުލި ނަގަން ފަށާފައިވަނީ މިދިޔަ އޭޕްރީލްމަހުން ފެށިގެންނެވެ. ހިޔާ ފްލެޓްތަކުން ކުލި ނަގަން ފަށާފައިވަނީ 3 ފަހަރެއްގެ މަތިން މުއްދަތު އިތުރު ކޮށްދިނުމަށްފަހުއެވެ.
ހިޔާ ފްލެޓްތަކުގެ އެގްރިމެންޓްގައި ފްލެޓްތަކުގެ ވެރިންނާއެކު ސޮއިކުރީ މިދިޔަ އަހަރުގެ ޖުލައި މަހުއެވެ. އޭރު ސަރުކާރުން ނިންމީ ފްލެޓްތަކުގެ ފިނިޝިން މަސައްކަތްތަކަށް 3 މަހުގެ މުއްދަތެއް ދިނުމަށްފަހު ކުލި ނަގަން ފެށުމަށެވެ. މިމުއްދަތު 2021 ވަނަ އަހަރުގެ އޮކްޓޯބަރު މަހުގެ ނިޔަލަށް ހަމަވުމުން ސަރުކާރުން ދެން މުއްދަތު ފަސްކުރީ، މިދިޔަ އަހަރުގެ ނިޔަލަށެވެ. ނަމަވެސް ގިނަ ފްލެޓްތަކެއްގެ މަސައްކަތް ނިމިފައި ނުވާތީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ނިންމެވީ، 2022 ވަނަ އަހަރުގެ މަރޗް މަހުގެ ނިޔަލަށް މިމުއްދަތު އިތުރުކޮށްދެއްވުމަށެވެ.
އެއްބަސްވުމާއި އެއްގޮތަށް ކުލި ނުދައްކާ ފަރާތްތަކެއް ހިޔާ ފްލެޓްތަކުގައި އުޅެމުންދާތީ، އެޗް.ޑީ.ސީން މިހާރު އަންނަނީ އެފަރާތްތަކަށް ފުރަތަމަ ޕޭމަންޓް އެޑްވައިސް ފޮނުވަމުންނެވެ. އެޗް.ޑީ.ސީގެ ލިޔުމުގައި ވާގޮތުން އެއްބަސްވުމާއި އެއްގޮތަށް މިހާތަނަށް ދައްކާފައިނުވާ ފައިސާ އެ ލިޔުން ހަވާލުކުރާތާ 30 ދުވަހުގެ ތެރޭގައި ދެއްކުމަށް ވަނީ އަންގާފައެވެ.
ހިޔާ ހައުސިން ޔުނިޓްތަކުގެ ކުލީގެ ގޮތުގައި ސަރުކާރުން ކަނޑައަޅާފައިވަނީ 7500 ރުފިޔާއެވެ. އަދި މެއިންޓަނަންސް ފީގެ ގޮތުގައި އިތުރު 1000 ރުފިޔާއާއެކު، ފްލެޓްތަކުގެ ވެރިން މަހަކު 8500 ރުފިޔާ އެޗް.ޑީ.ސީއަށް ދައްކަން ޖެހޭނެއެވެ.
ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ ހިޔާ ހައުސިން ޔުނިޓްތަކަށް މިހާރުވެސް ބޮޑު އާބާދީއެއް ވަނީ ދިރިއުޅުން ބަދަލުކޮށްފައެވެ. އެގޮތުން ހިޔާ ފްލެޓް ލިބުނު 6300 އަށްވުރެ ގިނަ ފަރާތަކާއެކު މިހާތަނަށް އެއްބަސްވުމުގައި ސޮއިކޮށްފައިވާއިރު، އޭގެ ތެރެއިން 4500 އަށްވުރެ ޔުނިޓަށް އާއިލާތަކުން މިހާރު ބަދަލުވެފައިވާކަމަށް އެޗް.ޑީ.ސީން ވިދާޅުވެއެވެ.