"މޯލްޑިވްސް ބްރޯޑްކާސްޓް އެވޯޑް 2022"އަށް ކުރިމަތިލުމަށް ހުޅުވާލި މުއްދަތު އިތުރުކޮށްފިއެވެ.
މިއެވޯޑަކީ ރާއްޖޭގައި ޚިޔާލުފާޅުކުރުމުގެ މިނިވަންކަމާއި ޑިމޮކްރަސީ އާލާކޮށް ދަމަހައްޓާ އަދި ޤައުމު ބިނާކުރުމާއި، އެކި ދާއިރާތަކުން ރައްޔިތުންގެ ހޭލުންތެރިކަން އިތުރުކޮށް މަޢުލޫމާތު މުއްސަނދި ކުރުމުގައި ބްރޯޑްކާސްޓިންގ ސިނާޢަތުގައި ހަރަކާތްތެރިވާ ފަރާތްތަކުން އަދާކުރާ ދައުރުގެ އަގުވަޒަންކޮށް، މި ސިނާޢަތުގެ ތަރައްޤީއަށް މަގުފަހިކޮށް ހިތްވަރުދިނުމުގެ ގޮތުން މޯލްޑިވްސް ބްރޯޑްކާސްޓިންގ ކޮމިޝަނުން ދިނުމަށް ނިންމާފައިވާ އެވޯޑެކެވެ.
ބްރޯޑްކޮމް އިން ވިދާޅުވީ، ބްރޯޑްކާސްޓް އެވޯޑްސް 2022"ގައި ހިމެނޭ ބައެއް ކެޓަގަރީތަކަށް ކަނޑައަޅާފައިވާ ޝަރުތުތަކުގެ ސަބަބުން ބައެއް ބްރޯޑްކާސްޓަރުންނަށް މި އެވޯޑްތަކަށް ކުރިމަތިލުމަށް ހުރަސްތަކެއް ހުރި ކަމަށް ކޮމިޝަނަށް ފާހަގަކުރެވިފައިވާކަމަށެވެ. އަދި ކޯވިޑް-19ގެ ޙާލަތާ ގުޅިގެން ބްރޯޑްކާސްޓަރުންނަށް މާލީގޮތުން ދަތިތަކެއް ކުރިމަތިވެފައިވާތީއާއި މިއީ ދިވެހިރާއްޖޭގައި މިފަދައިން ބޭއްވޭ އެންމެ ފުރަތަމަ އެވޯޑަށް ވާތީ، ވީހާވެސް ގިނަ ފަރާތްތަކަށް ބައިވެރިވުމުގެ ފުރުސަތު ތަނަވަސްކޮށްދިނުމުގެ ގޮތުން، އެވޯޑަށް ކުރިމަތިލުމުގެ ބައެއް ޝަރުތުތަކަށް މިއަހަރު ޢަމަލު ނުކުރުމަށް ކޮމިޝަނުންވަނީ ނިންމާފައެވެ.
އެގޮތުން "މޯލްޑިވްސް ބްރޯޑްކާސްޓިންގ އެވޯޑު ދިނުމުގެ އުޞޫލު"ގެ 7 ވަނަ މާއްދާގެ ދަށުން އެވޯޑް ނުދެވޭނެ ޙާލަތްތަކުގެ ތެރޭގައި ހިމެނޭ އަހަރީ ރިޕޯޓް ހުށަހަޅާފައި ނުވުން އަދި އަހަރީ ފީއާއި ޖޫރިމަނާ ދައްކާފައިނުވުން މި ބަޔަށް ޢަމަލު ނުކުރާގޮތަށް ބޮރޯޑްކޮމްއިން ވަނީ ނިންމާފައެވެ. އަދި އެވޯޑަށް ކުރިމަތިލުމަށް ހުޅުވާލާފައިވާ މުއްދަތު 16 ޖޫން 2022 ވާ ބުރާސްފަތި ދުވަހުގެ 14:00 އަށް ވަނީ އިތުރުކޮށްފައެވެ.
މި އެވޯޑް ދިނުމަށް ހަމަޖެހިފައިވަނީ މައިގަނޑު 3 ކެޓަގަރީއަކުންނެވެ. އެއީ ޕްރޮޑަކްޝަން އެވޯޑްތަކާއި، ނޫސްވެރިކަމުގެ އެވޯޑްތަކާއި، އިންޑަސްޓްރީ އެވޯޑްތަކެވެ. ޕްރޮޑަކްޝަން އެވޯޑްތަކުގެ ތެރޭގައި އެންމެ މޮޅު ޑޮކިއުމެންޓްރީ ޕްރޮގްރާމް، އެންމެ މޮޅު ކަރަންޓް އެފެއާޒް ޕްރޮގްރާމް، އެންމެ މޮޅު މުނިފޫހިފިލުވުމުގެ ޕްރޮގްރާމް، އެންމެ މޮޅު ކުޑަކުދިންގެ ޕްރޮގްރާމް، އެންމެ މޮޅު ޑޭޓައިމް ޕްރޮގްރާމް، އެންމެ މޮޅު ދީނީ ހޭލުންތެރިކުރުމުގެ ޕްރޮގްރާމް، އެންމެ މޮޅު ކުޅިވަރު ޕްރޮގްރާމް، އެންމެ މޮޅު ތިމާވެށި ޕްރޮގްރާމް، އެންމެ މޮޅު އުފެއްދުންތެރި ޕްރޮގްރާމް، އަހަރުގެ އިޖްތިމާޢީ ޕްރޮގްރާމް، އަދި އަހަރުގެ އެންމެ މޮޅު ކެމްޕެއިން ހޮވާނެއެވެ.
ނޫސްވެރިކަމުގެ އެވޯޑްތަކުގެ ތެރޭގައި، އެންމެ މޮޅު ނިއުސް އެންކަރ، އަހަރުގެ ނޫސްވެރިޔާ، އެންމެ މޮޅު ޕްރޮގްރާމް ޕްރެޒެންޓަރ، އެންމެ މޮޅު ކެމެރާ ޕަރސަން، އަދި އެންމެ އުއްމީދީ ނޫސްވެރިޔާ ހޮވުމަށް ވަނީ ހަމަޖެހިފައެވެ. އިންޑަސްޓްރީ އެވޯޑްތަކުގެ ގޮތުގައި ބެސްޓް ބްރޯޑްކާސްޓިންގ ޗެނަލް (ޓީވީ، ރޭޑިއޯ)، ބެސްޓް އިންކްލޫސިވް ބްރޯޑްކާސްޓަރ، އަދި އެންމެ އުފެއްދުންތެރި ޗެނަލް ހޮވާ އިނާމު ދިނުމަށް ހަމަޖެހިފައިވެއެވެ.
މި އިނާމު ދިނުމަށް ހަމަޖެހިފައިވާ ދާއިރާތަކުގެ ޝަރުތުތައް އެކުލެވޭ ތަފްޞީލާއި، އެޕްލިކޭޝް ފޯމް "މޯލްޑިވްސް ބްރޯޑްކާސްޓް އެވޯޑު ދިނުމުގެ އުޞޫލުގައި ބަޔާންކޮށްފައިވެއެވެ. މި އުޞޫލު ބްރޯޑްކާސްޓިން ކޮމިޝަންގެ ވެބްސައިޓް broadcom.org.mv އިން ލިބެން ހުންނާނެކަމަށް އެކޮމިޝަނުން ވިދާޅުވެއެވެ.