އައްޑޫ ސިޓީ ހިތަދޫ ޕޯޓުގެ މުވައްޒަފުންނަށް ޚާއްސަ ތަމްރީން ޕްރޮގްރާމެއް ފަށައިފިއެވެ.
ހިތަދޫ ޕޯޓު ލިމިޓެޑުގެ މައި އޮފީހުގައި ކުރިއަށްގެންދާ މި ތަމްރީން ޕްރޮގްރާމަކީ މުވައްޒަފުން މޯޓިވޭޓްކުރުމާއި ޕްރޮޑަކްޓިވިޓީ އިތުރުކޮށް މުވައްޒަފުންގެ ކޮންފިޑެންސް ލެވެލް އިތުރުކުރުމުގެ މަޤްޞަދުގައި ހިންގާ ޕްރޮގްރާމެއްކަމަށް އެމް.ޕީ.އެލުން ވިދާޅުވެއެވެ.
ދެ ދުވަހުގެ މުއްދަތަކަށް ކުރިއަށްގެންދާ މި ޕްރޮގްރާމުގައި މަސައްކަތުގެ މާހައުލުގައި ދިމާވާ އެކި ކަންކަމުގައި ގުޅިގެން ކުރިޔަށް ގެންދެވޭނެ އެކި ގޮތްގޮތާއި ބެހޭގޮތުން މަޢުލޫމާތުދެވިގެންދާނެއެވެ. އަދި ކުންފުނީގެ އޮޕަރޭޝަން ތަކުގައި ބޭނުންކުރާ އެކި އުޅަނދުތަކުގެ މައުލޫމާތުގެ އިތުރުން، "ޕޯޓް ޓާރމްސް" އާއި ބެހޭ ގޮތުންވެސް މައުލޫމާތު ދިނުމަށް ވަނީ ހަމަޖެހިފައެވެ.
އެމްޕީއެލްގެ ޕޯޓު ލާރނިންގ އެންޑް ޑިވެލޮޕްމަންޓް (ޕީޓީސީ)ން "ލީޑަރޝިޕް އެންޑް ޗޭންޖް މެނޭޖްމަންޓް ޕްރޮގްރާމު"ގެ ނަމުގައި ކުރިއަށްގެންދާ ޕްރޮގްރާމް ވަނީ މާލޭ ކޮމާރޝަލް ހާބަރުގައި މަސައްކަތްކުރާ މެނޭޖަރުންނާއި އަދި، ހުޅުމާލޭ އިންޓަރނޭޝަނަލް ޓަރމިނަލްގައި މަސައްކަތް ކުރާ މެނޭޖަރުންނަށްވެސް ކުރިއަށް ގެންގޮސްފައެވެ. އެމްޕީއެލްގެ ދަށުން މެނޭޖްކުރަމުން އަންނަ އައްޑޫ ސިޓީ ހިތަދޫ ޕޯޓުގައި މި ޕްރޮގްރާމް ކުރިއަށްގެންދަނީ ހުރިހާ މުވައްޒަފުންނަށް ހުޅުވާލައިގެންނެވެ. އެގޮތުން، އެޗް.ޕީ.އެލްގެ އެކި ޑިޕާޓްމަންޓްތަކުގައި މަސައްކަތް ކުރާ 40 މުވައްޒަފުން ވަނީ މި ޕްރޮގްރާމުގައި ބައިވެރިވެފައެވެ.
އައްޑޫ ސިޓީ ހިތަދޫ ޕޯޓުގައި ހިންގާ ޕްރޮގްރާމްގެ ލެކްޗަރާއެއްގެ ގޮތުގައި ހަރަކާތްތެރިވާ، އާދަމް ނަސީރަކީ ޖޯންސީ މެކްސްވެލް ސެޓިފައިޑް ކޯޗު، މާސްޓަރ ފެސިލިޓޭޓަރ އަދި އެން.އެލް.ޕީ ގެ މާރސްޓަރ ޕްރެކްޓިޝަނަރއެކެވެ. ނަސީރަކީ 20 އަހަރަށްވުރެން ގިނަ ދުވަހު ހިއުމަން ރިސޯސަސް އެންޑް އެމްޕްލޯއީ ޑިވެލޮޕްމަންޓްގެ ދާއިރާގައި މަސައްކަތް ކުރައްވާފައިވާ ބޭފުޅެކެވެ.