ޒުވާނުން ވިޔަފާރީގެ ދާއިރާއަށް ނެރުމަށް ކުރިއަށްގެންދިޔަ "ޕިޗްއަޕް ޔޫތު އެންޓްރޮޕްރޮނަރޝިޕް ޗެލެންޖު" ކާމިޔާބުކުރި ފަރާތްތަކަށް، ވިޔަފާރި ފަށައިގަތުމަށް ބޭނުންވާ މާލީ އެހީ ރަސްމީކޮށް ޙަވާލުކޮށްފިއެވެ.
މި މުބާރާތް ކާމިޔާބުކޮށް އަލަށް ފަށާ 24 ވިޔަފާރިއަކަށް 13.5 މިލިއަން ރުފިޔާ ހިލޭ އެހީގެގޮތުގައި މިނިސްޓްރީ އޮފް އިކޮނޮމިކް ޑިވެލޮޕްމަންޓުން ވަނީ ދޫކޮށްފައެވެ.
މި ވިޔަފާރިތަކަށް ގްރާންޓް އޮފަރ ދޫކޮށްފައިވަނީ އެކަމަށްޓަކާ އިކޮނޮމިކް މިނިސްޓްރީގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި އިކޮނޮމިކް މިނިސްޓްރީގެ ސްޓޭޓް މިނިސްޓަރ ނިޒާ ޢިމާދާއި، ޑެޕިއުޓީ މިނިސްޓަރ ރިޔާޒް މަންޞޫރާއި، އެ މިނިސްޓްރީގެ ސީނިއަރ ޕޮލިސީ ޑިރެކްޓަރ މަރިޔަމް މަނާރަތު ބައިވެރިވެވަޑައިގެންނެވިއެވެ.
"ޕިޗްއަޕް ޔޫތު އެންޓްރޮޕްރޮނަރޝިޕް ޗެލެންޖު"އަކީ މީރީ ޕްރޮޖެކްޓުގެ ފަރާތުން ޒުވާނުންނަށް ޚާއްސަކޮށްގެން އުފެއްދުންތެރި ވިޔަފާރީގެ ޚިޔާލެއް ހުށަހަޅައި، އެ ޚިޔާލަށް ދިރުން ގެނެސްދީ، ކާމިޔާބު ވިޔަފާރިއެއް އުފެއްދުމަށް ހިންގާ ޗެލެންޖެކެވެ. "ޕިޗްއަޕް" ފަރުމާކޮށްފައިވަނީ އައު ވިޔަފާރިއެއް ތަރައްޤީ ކުރާނެގޮތުގެ ޚިޔާލެއް ހުށަހަޅައިގެން، ފައިސާގެ އެހީއާއި، ތަމްރީނު އަދި ވިޔަފާރި ކުރިއެރުވުމަށް ބޭނުންވާ އެހެނިހެން އެހީތެރިކަން ފޯރުކޮށްދޭގޮތަށެވެ.
މީރީ ޕްރޮޖެކްޓަކީ ޒުވާނުންނަށް ވަޒީފާގެ ފުރުސަތު ތަނަވަސްކޮށްދީ، ބާރުވެރިކޮށް، ކާމިޔާބު ބަޔަކަށް ހެދުމަށް ވޯލްޑްބޭންކުގެ އެހީގައި މިނިސްޓްރީ އޮފް ހަޔަރ އެޑިއުކޭޝަނާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓް ގުޅިގެން ހިންގާ ޕްރޮޖެކްޓެކެވެ. މިއީ ވޯލްޑް ބޭންކުގެ އެހީގައި 5 އަހަރު ދުވަހުގެ މުއްދަތަކަށް ކުރިއަށްގެންދާ ޕްރޮގްރާމެކެވެ.
ޕިޗްއަޕް ޗެލެންޖް ފުރަތަމަ ހިންގާފައިވަނީ ހަޔަރ އެޑިއުކޭޝަން މިނިސްޓްރީގެ ޕްރޮޖެކްޓް މެނޭޖްމަންޓް ޔުނިޓުގެ ދަށުންނެވެ. 2021 ވަނަ އަހަރުގެ ޑިސެމްބަރުމަހު މި މުބާރާތް ކާމިޔާބުކުރި ފަރާތްތައް އިޢުލާންކޮށް މިއަހަރުގެ ޖެނުއަރީ 10 ގައި ވަނީ އިނާމު ދިނުމުގެ ރަސްމިއްޔާތު ބާއްވާފައެވެ. މި ޗެލެންޖްގެ ފަރާތްތައް ހޮވާފައިވަނީ 6 މަސްދުވަހުގެ މުއްދަތަކަށް ކުރިއަށްގެންދިޔަ ބިޒްނަސް ދާއިރާއިން ތަމްރީންކުރުމުގެ މަސައްކަތަކާއި، ބޫޓް ކޭމްޕެއް ބާއްވާ، ބިޒްނަސް ޕްރޮޕޯސަލް ހުށަހެޅުމާއި، ޖަޖުންނަށް ބިޒްނަސް އައިޑިއާ ޕްރެޒެންޓް/ޕިޗްކުރުމުގެ ޕްރޮސެސްއަށްފަހުގައެވެ.
މީރީ ޕްރޮޖެކްޓް ރީސްޓްރަކްޗަރކުރުމަށްފަހު ޕިޗްއަޕް އެންޓްރޮޕްރޮނަރޝިޕް ޗެލެންޖުގައި ކާމިޔާބުވީ ފަރާތްތައް ވަނީ އިކޮނޮމިކް ޑިވެލޮޕްމަންޓް ޕްރޮޖެކްޓް މެނޭޖްމަންޓް ޔުނިޓުގެ ދަށަށް ބަދަލުކޮށްފައެވެ. އަދި އިކޮނޮމިކް މިނިސްޓްރީން ވަނީ މިދިޔަ އޭޕްރީލްމަހު ޓެކްނިކަލް ޕެނަލެއް އެކުލަވާލާ، ޕިޗްއަޕް ކާމިޔާބުކުރި ފަރާތްތަކުން ހުށަހަޅާފައިވާ ބިޒްނަސް ޕްރޮޕޯސަލްތައް މުރާޖަޢާކޮށް އިވެލުއޭޓްކޮށް ނިންމާފައެވެ.
މި ރިވިއު ޕްރޮސެސްއަށްފަހު އަލަށް ފަށާ 24 ވިޔަފާރިއަކަށް ޓެކްނިކަލް ޕެނަލުން 13.5 މިލިއަން ރުފިޔާގެ ހިލޭ އެހީ ދިނުމަށް ވަނީ ހަމަޖެހިފައެވެ. މީގެ ތެރޭގައި ހިމެނެނީ ދަނޑުވެރިކަމާއި، އައި.ސީ.ޓީ، ޓޫރިޒަމް، އަދި ޓޫރިޒަމާގުޅުންހުރި ކޮންސްޓްރަކްޝަން ދާއިރާގެ ވިޔަފާރިތަކެވެ. އިކޮނޮމިކް މިނިސްޓްރީން ވިޔަފާރިތަކަށް ފަންނީ އެހީތެރިކަމާއި، ސަޕޯޓް ސަރވިސް ދިނުމަށް ހަމަޖެހިފައިވާއިރު، މި ވިޔަފާރިތައް ހިންގަމުންދާގޮތް ގާތުން ބަލަމުންދާނެކަމަށް އެ މިނިސްޓްރީން ވިދާޅުވެއެވެ.