ސްކޫލްތަކުގައި ދަރިވަރުން ނަމާދުކުރުމަކީ އެއީ ހަރުކަށި ފިކުރުގެ ޢަމަލެއްގެގޮތުގައި ދެކެވަޑައިނުގަންނަވާކަމަށް މިނިސްޓަރ އޮފް އެޑިޔުކޭޝަން ޑރ.ޢާއިޝަތު ޢަލީ ވިދާޅުވެއްޖެއެވެ.
އެޑިއުކޭޝަން މިނިސްޓަރ މިފަދައިން ވިދާޅުވީ، ރ.އުނގޫފާރުގައި ކުރިއަށްގެންދިޔަ ހަފްތާރެސް ޕްރޮގްރާމުގައި ކުރިއަށްގެންދިޔަ ސެޝަނެއްގައި ދަރިވަރުން ހަރިކަށި ފިކުރަށް ދާ ކަމުގެ އަލާމަތްތަކުގެ ގޮތުގައި ސްކޫލު ގަޑީގައި ނަމާދުކުރުން ހިމެނޭކަމަށް ބުނެ މަޢުލޫމާތު ފަތުރާފައިވާކަމަށް ސޯޝަލް މީޑިއާގައި ދައުރުވަމުންދާ ވާހަކަތަކާގުޅިގެން، އެކަމާގުޅޭގޮތުން ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުޙައްމަދު ސަޢީދު ކުރެއްވި ސުވާލަކަށް ޖަވާބު ދެއްވަމުންނެވެ.
މިނިސްޓަރ ޑރ.ޢާއިޝަތު ޢަލީ ވިދާޅުވީ، ރާއްޖޭގެ ޤައުމީ މަންޙަޖުގެވެސް އެންމެ މައިގަނޑު އެއް އަސާސަކީ އިސްލާމްދީނުގެ އުޞޫލުތަކާއި ރިވެތި އާދަތައް ދަރިވަރުންނަށް އުނގަންނައިދީ، ދިވެހި ޤައުމަށް ލޯބިކުރާ ހުނަރުވެރި ކުދިންތަކެއް ބިނާކުރުންކަމަށެވެ. އަދި ކޮންމެ ސްކޫލެއްގައިވެސް ސްކޫލް ތެރޭގައި ދަރިވަރުންނަށް ނަމާދުކުރެވޭނެ އިންތިޒާމް ހަމަޖެހިފައި ހުންނާނެކަމަށް މިނިސްޓަރ ވިދާޅުވިއެވެ.
"ސްކޫލްތެރޭގައި ނަމާދުކުރުން އެއީ ހަރުކަށިކަމެއްކަމަކަށް ނުބަލަން. އެއީ އިސްލާމްދީނުގެ ރުކުނެއް. އެހެންވީމަ ނަމާދުކުރަން ސްކޫލްތަކުން އެންކަރޭޖްކުރާނެ" މިނިސްޓަރ ޑރ.ޢާއިޝަތު ޢަލީ ވިދާޅުވިއެވެ.
ދާދިފަހުން ޖަމާލުއްދީން ސްކޫލުގެ ގޯތިތެރެއަށް މީހަކުވަދެ އިންޒާރު ދިން މައްސަލައާގުޅިގެން ސްކޫލްތަކުގެ ސަލާމަތީ ކަންކަމާގުޅޭގޮތުން ބައެއް މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވީ، ސްކޫލްތަކުގެ ސަލާމަތީ ކަންކަމަކީ ކަނޑައެޅިފައިވާ ވަކި އިންތިޒާމެއްގެ ތެރެއިން ރޭވުންތެރިކަމާއެކު ކުރަމުންދާ މަސައްކަތެއްކަމަށެވެ. އަދި ސްކޫލްތެރޭގައި ޙާދިސާއެއް ކުރިމަތިވެއްޖެނަމަ، ޢަމަލުކުރާނެގޮތްތަކާގުޅޭގޮތުން އެސް.އޯ.ޕީތައް އެކުލަވާލެވި ސްކޫލްތަކާއި އެކަންކަން ހިއްސާކޮށްފައިވާނެކަމަށެވެ.
ޖަމާލުއްދީން ސްކޫލުގެ ޙާދިސާއާގުޅިގެން މިނިސްޓަރ ވިދާޅުވީ، ސްކޫލްތަކުގެ ސެކިއުރިޓީ ކަންކަން މިހާރަށްވުރެއްވެސް ފުރިހަމައަށް ކުރިއަށްގެންދޭތޯ ކަށަވަރުކޮށް ބައެއް ޚާއްސަ ފިޔަވަޅުތައް އެޅުމަށް ސްކޫލްތަކަށް އަންގާފައިވާނެކަމަށެ ވިދާޅުވިއެވެ.
"އެއާގުޅިގެން އަޅުގަނޑުމެން ހަމަ ހުރިހާ ސްކޫލްތަކެއްގެ ގޭޓުތައް ތަޅުލެވިފައިވޭތޯ އަނެއްކާވެސް ކަށަވަރުކުރިން. ސްކޫލްތަކުގެ ހުރިހާ މުވައްޒަފުންނަށް އެސް.އޯ.ޕީތަކަށް ފޮލޯރކުރުމަށް މިނިސްޓްރީން އެންގިފައިވޭ. އަދި ހަމައެކަން ކުރޭތޯ އަޅުގަނޑުމެންގެ ޒޯން ކޯޑިނޭޓަރުންނާއި ސްކޫލްތަކުގެ ޕްރިންސިޕަލުން ބައްލަވަމުން އެބަގެންދަވާ. އަދިވެސް ސެކިއުރިޓީ ކޮމްޕްރޮމައިޒް ކުރެވޭގޮތަށް ކަމެއް ހުރިއްޔާ އެކަންކަންވެސް ހަރުދަނާކުރަން އަޅުގަނޑުމެން މިދަނީ މަސައްކަތް ކުރަމުން" މިނިސްޓަރ ވިދާޅުވިއެވެ.
ޖަމާލުއްދީން ސްކޫލަށް މީހަކު ވަދެ އިންޒާރު ދިން މައްސަލައާގުޅިގެން ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށް، ކިޔަވައިދޭ ވަގުތުގައި ސްކޫލްތަކުގެ ގޭޓްތައް ތަޅުލާފައި ބަހައްޓަން އެޑިއުކޭޝަން މިނިސްޓްރީން ހުރިހާ ސްކޫލްތަކަށް ވަނީ އަންގާފައެވެ. ސްކޫލު މާހައުލަކީ ދަރިވަރުންނާއި މުވައްޒަަފުންނަށް ހުރިހާ ގޮތަކުން ވެސް ރައްކާތެރި ތަނަކަށް ހެދުމަށް މިނިސްޓްރީން އަބަދުވެސް މަސައްކަތްކުރަމުން އަންނަ ކަމަށް އެ މިނިސްޓްރީން ވިދާޅުވެއެވެ.