"މުންކަރާތް ނަހީކުރުމުގެ ނަމުގައި ހިންގާފައިވާ ކަންތައްތަކަކީ ވަރަށް ނާތަހުޒީބު ޢަމަލުތަކެއް"
މުންކަރާތް ނަހީކުރުމުގެ ނަމުގައި ހިންގާފައިވާ ކަންތައްތަކަކީ ވަރަށް ނާތަހުޒީބު ދަށު ދަރަޖައިގެ ޢަމަލުތަކެއްކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
އިސްލާމިކް މިނިސްޓްރީން މިހެން ވިދާޅުވީ، ގަލޮޅު ރަސްމީ ދަނޑުގައި ދައުލަތުގެ އިސްވެރިންނާއި ރާއްޖޭގައި ތިއްބެވި ބޭރު ޤައުމުތަކުގެ ސަފީރުންނާއި ޑިޕްލޮމެޓުން ބައިވެރިވެވަޑައިގެން ކުރިއަށްގެންދިޔަ ހަރަކާތަށް ބަޔަކު ހުރަސް އަޅާ، ހަމަނުޖެހުން ހިންގާފައިވާތީ، އެކަމާގުޅިގެން ނެރުނު ބަޔާނެއްގައެވެ.
އިސްލާމްދީނަށް ނަސްރުދިނުމުގެ ނަމުގައި ހަރުކަށިކަން އިސްކޮށް އަނިޔާވެރިކަމަށް ގޮވާލާ، މީސްތަކުންގެ ހިތުގައި ބިރުވެރިކަން އުފެދޭގޮތަށް ހިންގާ މިފަދަ ޢަމަލުތަކަކީ އިސްލާމްދީން ދަސްކޮށްދެއްވި ރިވެތި އުޞޫލުތަކާއި މިންގަނޑުތަކުން ބޭރުން ހިންގާ ޢަމަލުތަކެއްކަމަށް އިސްލާމިކް މިނިސްޓްރީގެ ބަޔާނުގައި ވިދާޅުވެފައިވެއެވެ.
އިސްލާމިކް މިނިސްޓްރީން ވަނީ އެއްވެސް އިޚްލާސްތެރިކަމެއްނެތި، އިސްލާމްދީނާއި ލޮބުވެތި ނަބިއްޔާގެ ދިފާޢުގައި ކަމަށް ބުނެ ރާއްޖޭގެ ދާޚިލީ ހަމަޖެހުން ނަގާލެވޭ މޭރުމުން ބައެއް ފަރާތްތަކުން ސިޔާސީ މަންފާއަށްޓަކާ ހިންގާ ހަރަކާތްތަކުގެ މަޅީގައި ނުޖެހުމަށް ރައްޔިތުންނަށް ނަސޭޙަތްތެރިވެވަޑައިގެންފައެވެ. އަދި ބައެއް ފަރާތްތަކުން ދިވެހިންގެ ހިތްތަކުގައި އިސްލާމްދީނަށް އޮންނަ ލޯބި، ސިޔާސީ މަޤްޞަދެއްގައި ބޭނުންކޮށްގެން ރައްޔިތުންގެ މެދުގައި ނަފްރަތާއި ރުޅިވެރިކަން އުފައްދަމުންދާކަން މިނިސްޓްރީން ވަނީ ފާހަގަކުރައްވާފައެވެ.
އެހެންކަމުން މިފަދަ ކަންކަމާމެދު ދީނީ ޢިލްމުވެރިންނާއި މުއައްސަސާތަކުން އިތުރަށް ސަމާލުވެ، މުޖުތަމަޢުގެ މަސްލަހަތު އިސްކޮށް، ރައްޔިތުންނާ ވީހާވެސްގާތުން މަސައްކަތްކުރުމަށް އިސްލާމިކް މިނިސްޓްރީން އިލްތިމާސްކުރައްވާފައިވެއެވެ.