ޗައިނާއިން ފަށާފައިވާ ބެލްޓް އެންޑް ރޯޑް މަޝްރޫޢުއާ ވާދަކުރުމަށް އެންމެ ކުރިއަރާފައިވާ 7 ޤައުމު ހިމެނޭ، ޖީ7އިން 600 ބިލިއަން ޑޮލަރުގެ ޕްލޭނެއް ލޯންޗުކޮށްފިއެވެ.
ޕާޓްނަރޝިޕް ފޯރ ގްލޯބަލް އިންފްރާސްޓްރަކްޗަރ އެންޑް އިންވެސްޓްމަންޓް، ޕީޖީއައިއައިގެ ނަން ދެވިފައިވާ މި ޕްލޭނަކީ މިދިޔަ އަހަރު ބޭއްވި ޖީ ސެވަންގެ ބައްދަލުވުމުގައި ހާމަކުރި ޕްލޭނެކެވެ.
ޖަރުމަންވިލާތުގައި ކުރިއަށްދާ ދުނިޔޭގެ އެންމެ ކުރިއަރާފައިވާ 7 ޤައުމުގެ އެންމެ އިސްވެރިންގެ ބައްދަލުވުން ނުވަތަ ޖީ ސެވަންގެ ބައްދަލުވުމުގައި ވަނީ ޕާޓްނަރޝިޕް ފޯރ ގްލޯބަލް އިންފްރާސްޓްރަކްޗަރ އެންޑް އިންވެސްޓްމަންޓް، ޕީ.ޖީ.އައި.އައިއާ ގުޅޭގޮތުން ފުޅާ ދާއިރާއެއްގައި މަޝްވަރާކޮށްފައެވެ.
ޗައިނާގެ ބެލްޓް އެންޑް ރޯޑް އިނީޝިއޭޓިވްއަކީ ދަރަނީގެ ބުރަބޮޑު ޕްލޭނެއްކަމަށް ބައެއް ފަރާތްތަކުން ސިފަކުރަމުންދާއިރު، އެމެރިކާގެ ރައީސް ޖޯ ބައިޑަން ވިދާޅުވީ ޖީ ސެވަންއިން ތައާރަފްކުރާ ޕްލޭނަކީ ހުރިހާ ފަރާތަކަށްވެސް އޭގެ ސަބަބުން ފައިދާވާނެ އިންވެސްޓްމަންޓްތަކެއްކަމަށެވެ. އަދި ޑިމޮކްރެޓިކް ޤައުމުތަކާއެކު ގުޅުން ބަދަހިކޮށްގެން ވާނެ ފައިދާ މި ޕްލޭންގެ ތެރެއިން ޤައުމުތަކަށް ފެނިގެންދާނޭކަމަށްވެސް ބައިޑަން ވިދާޅުވިއެވެ.
މި ޕްލޭންގައި ކުދި އަދި މެދު ފަންތީގެ އާމްދަނީ ލިބޭ ޤައުމުތަކުގައި އިންފްރާސްޓްރަކްޗަރ މަޝްރޫޢުތައް ހިންގުމަށް ޖީ ސެވަންގެ ޤައުމުތަކުން 5 އަހަރު ދުވަހުގެ ތެރޭގައި 600 ބިލިއަން ޑޮލަރުގެ ފަންޑެއް އުފައްދަންޖެހޭނެއެވެ.
އެމެރިކާއިން އެ ފަންޑަށް 200 ބިލިއަން ޑޮލަރު ދޭނެކަމަށް ވައުދުވެފައިވާއިރު، އީޔޫއިން ވަނީ އެ ފަންޑަށް 300 ބިލިއަން ޑޮލަރު ދޭނެކަން އިއުލާންކޮށްފައެވެ.
ޖީ ސެވަންގެ ގައުމުތަކުން ތައާރަފްކުރާ ޕާޓްނަރޝިޕް ފޯރ ގްލޯބަލް އިންފްރާސްޓްރަކްޗަރ އެންޑް އިންވެސްޓްމަންޓް، ޕީ.ޖީ.އައި.އައިގެ ދަށުން ހިންގާ މަޝްރޫޢުތައް ބޮޑު އަމާޒުކުރާނީ ތިމާވެށީގެ މައްސަލަތައް ހައްލުރުމަށާއި، ސިއްހީ ހިދުމަތުގެ ފެންވަރު ރަނގަޅުކޮށް، ޑިޖިޓަލް އިންފްރާސްޓްރަކްޗަރ ތަރައްޤީކުރުމަށެވެ. މި ޕްލޭންގެ ދަށުން ބައެއް މަޝްރޫޢުތައް އިއުލާންކޮށްފައިވާއިރު، އޭގެތެރޭގައި އެންގޯލާގައި ކުރިއަށްގެންދާ ސޯލާ ޕަވަރ މަޝްރޫއަކާއި، ސެނެގަލްގައި ކުރިއަށްގެންދާ ވެކްސިން އުފައްދާ ފެސިލިޓީއާއި، އެފްރިކާގެ ތެރެއިން ސިންގަފޫރާއި ފްރާންސް ގުޅުވައިދޭ ސަބްމެރިން ކޭބަލް މަޝްރޫޢު ހިމެނެއެވެ.
ތަޖުރިބާކާރުން ޤަބޫލުކުރާގޮތުގައި ޖީ ސެވަންގެ ގައުމުތަކުން ތައާރަފްކޮށްފައިވާ ޕްލޭނަކީ ކުދި އަދި މެދު ފަންތީގެ ޤައުމުތައް ތަރައްޤީކުރުމަށް ޗައިނާގެ ރައީސް ޝީ ޖިންޕިން 2013 ވަނަ އަހަރު ލޯންޗުކުރި ބެލްޓް އެންޑް ރޯޑް އިނީޝިއޭޓިވްއާ ވާދަކުރުމަށް އެކުލަވާލި ޕްލޭނެކެވެ.