ޚިދުމަތުުގެ އަގު ހެޔޮކުރުމަށް ދުނިޔޭގެ އެންމެ މަގުބޫލު ސްޓްރީމިން ހިދުމަތްދޭ ދެ ކުންފުނި ކަމުގައިވާ ނެޓްފްލިކްސް އާއި ދުނިޔޭގެ އެންމެ ބޮޑު އެއް ޓެކް ކުންފުނި މައިކްރޯސޮފްޓް ގުޅިއްޖެއެވެ.
ނެޓްފްލިކްސް އިން ބުނި ގޮތުގައި މައިކްރޯސޮފްޓާ ގުޅިގެން ކުރަން ރާވާފައިވާ މައިގަނޑު މަސައްކަތަކީ މިހާރު ތައާރަފުކޮށްފައި ހުރި ސަބްކްރިޕްޝަން ޕްލޭންތަކުގެ ތެރެއިން އިޝްތިހާރު ނުހުންނަ ޕްލޭންތަކަށް އިޝްތިހާރު އިތުރުކޮށް، ޚިދުމަތް އަގު ހެޔޮކުރުމެވެ. އަދި މިއީ މިހާރު ދީފައިއޮތް ޚިދުމަތުގެ އިތުރުން އެމީހުން ދޭ ޚިދުމަތެއްކަމަށްވެސް ނެޓްފްލިކްސްއިން ބުނެއެވެ. މި ޚިދުމަތަށް ސަބްސްކްރައިބާސްގެ އަތުން ފީގެ ގޮތުގައި ނަގާނީ ކިހާވަރެއް ކަމެއް ނެޓްފްލިކްސްއިން ހާމައެއް ނުކުރެއެވެ.
ނެޓްފްލިކްސްއިން މިކަން އިއުލާންކުރީ މިއަހަރުގެ ފުރަތަމަ ކުއާޓަރުގައި ގިނަ އަދަދެއްގެ ސަބްސްކްރައިބަރުން ގެއްލި އަދި ނެޓްފްލިކްސް ބޭނުންކުރާ މީހުންގެ އަދަދު ވަރަށް ބޮޑަށް ދަށްވާނެ ލަފާކުރުމާއި ގުޅިގެންނެވެ. އަދި 100 އަށް ވުރެ ގިނަ ވަޒީފާވެސް ނެޓްފްލިކްސްއިން މިއަހަރުގެ ކުރީކޮޅު ވަނީ މަދުކޮށްފައެވެ.
ވިޔަފާރި ދެމަހެއްޓުމަށްޓަކައި ޚިދުމަތުގެ އަގަށް ހެޔޮ ބަދަލުތަކެއް ގެނައުމާއި އިތުރު އާ ޚިދުމަތްތައްވެސް ނެޓްފްލިކްސް އަންނަނީ ތައާރަފް ކުރަމުންނެވެ.
ރިޕޯޓްތައް ބުނާ ގޮތުން ނެޓްފްލިކްސް އިން އަންނަނީ ކޮންޓެންޓްތައް ވަރުގަދަކޮށް ޚިދުމަތުގެ ފެންވަރުގެ އިތުރަށް ރަނގަޅުކުރުމަށް ވޯނާ ބްރޯސް އާއި ޔުނިވާސަލް ޕިކްޗާސް އަދި ސޮނީ ޕިކްޗާސް ޓެލެވިޝަން ފަދަ ބޮޑެތި އެންޓައިންމަންޓް ކުންފުނިތަކާ އެކީވެސް މަޝްވަރާތައް ކުރަމުންނެވެ.
ސަބްސްކްރައިބަރުން މަދުވުމުގެ ސަބަބުން ނެޓްފްލިކްސްގެ މާކެޓް ވެލިޔު ވަނީ 50 ބިލިއަން އެމެރިކާ ޑޮލަރަށް ވެއްޓިފައެވެ. ނެޓްފްލިކްސް އިން ރަޝިއާގައި ދޭ ޚިދުމަތް މެދުކަނޑާލުމުން ކޯވިޑުގެ ބަލިމަޑުކަމުގެ ތެރޭގައި މިލިއަނުން ސަބްސްކްރައިބަރުން ލިބުނު ނެޓްފްލިކްސް އަށް ވަނީ 7 ލައްކަ ސަބްސްކްރައިބަރުން ގެއްލިފައެވެ.