މަސްތުވާތަކެއްޗާއި ދެކޮޅަށް މި ސަރުކާރުން ކުރާ މަސައްކަތްތަކުގެ ނަތީޖާ ފެންނަމުންދާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މޯލްޑިވްސް ކަސްޓަމްސް ސަރވިސްއަށް 132 އަހަރު ފުރުން ފާހަގަކުރުމަށް ދަރުބާރުގޭގައި ބޭއްވި ޚާއްސަ ޙަފްލާގައި ރައީސުލްޖުމްހޫރިއްޔާ ވިދާޅުވީ، މަސްތުވާތަކެތި ރާއްޖެ އެތެރެކުރުން ހުއްޓުވުމުގައި، ކަސްޓަމްސްގެ ދައުރު ކިތަންމެ ބޮޑު ނަމަވެސް، މުޅި މި މައްސަލަ ޙައްލުކުރެވޭނީ، ދައުލަތުގެ ކަމާގުޅޭ ހުރިހާ އިދާރާތަކެއް ގުޅިގެންކަމަށެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ކަސްޓަމްސްއަކީ، ރާއްޖޭގެ ބޯޑަރުތަކުގެ ފާރަވެރިޔާކަމަށާއި، ރާއްޖެއަށް އެތެރެކުރާ އަދި ރާއްޖެއިން ބޭރުކުރާ ކޮންމެ އެއްޗެއްގެ ޤާނޫނީ ޞައްޙަކަން ކަށަވަރުކުރުމުގެ ޒިންމާ އަދާކުރަނީ ކަސްޓަމުންކަމަށެވެ. މި މަސައްކަތުގައި ކަސްޓަމަށްވެސް ދިމާވެފައިވާ އެންމެ ބޮޑު ގޮންޖެހުމަކީ މަސްތުވާތަކެތީގެ މައްސަލަތައްކަން ރައީސް ފާހަގަކުރެއްވިއެވެ.
މަސްތުވާތަކެތި ރާއްޖެއަށް އެތެރެކުރުމާއި، އެފަދަ ތަކެތި ރާއްޖޭގައި ޓްރާންސިޓް ކުރުން ހުއްޓުވުމަކީ، ގޮންޖެހުން ބޮޑު މަސައްކަތެއްކަން ފާހަގަކުރައްވާ ރައީސް ވިދާޅުވީ، މަސްތުވާތަކެތީގެ ވިޔަފާރިކުރާ ބައިނަލްއަޤްވާމީ ވިއުގަތައް ފުޅާވެފައި އޮތީ ކަންބޮޑުވާހާ ބޮޑު މިންވަރަކަށްކަމަށެވެ. އަދި ރާއްޖޭގައި އޭގެ ވިޔަފާރިއާއި، އޭގެ ބޭނުންކުރުން ފުޅާވެފައި އޮތީވެސް އިންތިހާ ދަރަޖައަށްކަމަށާއި މި މައްސަލަ ޙައްލުކުރުމަށް، ދައުލަތުގެ މުއައްސަސާތަކަށް ބޭނުންވާ އެކަށޭނަ އާލާތްތަކާއި ވަސީލަތްތައް ލިބުމުގައިވެސް އެތައް ދަތިތަކެއް އެބަހުރިކަމަށެވެ.
ރައީސް ވިދާޅުވީ، މަސްތުވާތަކެތި ރާއްޖެ އެތެރެކުރުން ހުއްޓުވުމުގައި، ކަސްޓަމްސްގެ ދައުރު ކިތަންމެ ބޮޑު ނަމަވެސް، މުޅި މައްސަލަ ޙައްލުކުރެވޭނީ، ދައުލަތުގެ ކަމާގުޅޭ ހުރިހާ އިދާރާތަކެއް ގުޅިގެންކަމަށެވެ. އަދި މިކަން ޙައްލުކުރުމުގެ ގޮތުން އެކުލަވައިލި އެކްޝަން ޕްލޭން ތަންފީޒު ކުރުމަށް، ކަމާގުޅޭ އިދާރާތަކަށް 2021 ވަނަ އަހަރު ޚާއްޞަ ބަޖެޓެއް ހަމަޖައްސައިދެއްވިކަމަށެވެ.
އޭގެ އިތުރުން، މަސްތުވާތަކެއްޗާ ދެކޮޅަށް ކުރާ މަސައްކަތްތައް ހަރުދަނާ ކުރުމަށް، ކަސްޓަމްސްގެ ސަރަޙައްދީ އޮފީސްތަކަށް ބޭނުންވާ ވަސީލަތްތައް ހަމަކުރުމަށް، މި އަހަރުގެ ތެރޭގައި ސަރުކާރުން އެހީތެރިކަން ފޯރުކޮށްދީފައިވާކަމަށާއި، ކަސްޓަމަށް ބޭނުންވާ އިންސާނީ ވަސީލަތްތައް ހަމަކުރުމަށްވެސް ސަރުކާރުން އެހީތެރިކަން ފޯރުކޮށްދެމުންދާކަމަށް ރައީސް ވިދާޅުވިއެވެ. އަދި މިގޮތަށް ކުރެވޭ މަސައްކަތްތަކުގެ ނަތީޖާވެސް ފެންނަމުންދާކަމަށް ރައީސް ވިދާޅުވިއެވެ.
"މިކަންކަމުގެ ރަނގަޅު ނަތީޖާވެސް އަންނަނީ ފެންނަމުން. މަސްތުވާތަކެއްޗާ ދެކޮޅަށް މިކުރާ މަސައްކަތްތަކުގެ ތެރެއިން، ނޮވެންބަރު 2018 އިން ފެށިގެން މިހާތަނަށް، 182 ކިލޯއަށްވުރެ ގިނަ މަސްތުވާތަކެތި ކަސްޓަމުން ވަނީ އަތުލައިގަނެފައި. މިއީ އޭގެ ކުރީގެ 5 އަހަރާ އަޅައިބަލާއިރު، 32 އިންސައްތައަށްވުރެ އިތުރު ޢަދަދެއް" ރައީސް ވިދާޅުވިއެވެ.
ރައީސް ވިދާޅުވީ، ޒަމާނީ ޓެކްނޯލޮޖީއާއި ދަތުރުފަތުރުގެ ލުއިފަސޭހަތަކާއެކު، އެއް ޤައުމު އަނެއް ޤައުމާ ވަރަށް ބޮޑަށް ލާމެހިފައިވާކަމަށާއި، ބައިނަލްއަޤްވާމީ މުޖުތަމަޢުގައި ހިނގާ ކޮންމެ ރަނގަޅު ކަމަކާއި، ނުރަނގަޅު ކަމެއްގެ އަސަރު ސީދާ ގޮތުންނާއި ނުސީދާ ގޮތުން، ރާއްޖެއަށްވެސް ފޯރާކަމަށެވެ. އެގޮތުން މަނީ ލޯންޑަރިންގއަކީވެސް ބައިނަލްއަޤްވާމީ ޖިނާއީ ކުށްތަކުގެ ތެރެއިން، ރާއްޖެއިންވެސް އެކަމާ ދެކޮޅަށް ވަރުގަދަ މަސައްކަތްތަކެއް ކުރަން ޖެހިފައިވާ ކަމެއްކަން ރައީސް ފާހަގަކުރެއްވިއެވެ. އަދި ބޯޑަރުތައް ހުރަސްކޮށް، ދޭދޭ ޤައުމުތަކުގެ ވަކިވަކި ފަރުދުންނާއި ގުރޫޕްތަކުގެ މެދުގައި، ދުރާލައި ރާވައިގެން ހިންގާ ޖިނާއީ ކުށްތަކަކީވެސް، އެކަންކަމާމެދު ފާރަވެރިވާޖެހޭ މައްސަލަތަކެއްކަމަށް ރައީސް ވިދާޅުވިއެވެ.
"ރާއްޖޭގެ ބޯޑަރު ހުރަސްކޮށް، މިފަދަ އެއްވެސް ކަމެއް ހިނގާތޯ ބަލައި ފާރަވެރިވުމަކީ، ކަސްޓަމްސްގެ މަސްއޫލިއްޔަތުތަކުގެ ތެރޭގައި ހިމެނޭ ވަރަށް މުހިންމު ޒިންމާއެއް. މިފަދަ ޖަރީމާތައް ހުއްޓުވުމަށްޓަކައި، ކަސްޓަމްސްގެ ޤާބިލްކަން އިތުރުކުރުމަކީ އަބަދުވެސް ކުރަންޖެހޭ ކަމެއް. އެހެންކަމުން، ރާއްޖޭގެ ބޯޑަރުތަކުގައި ކަސްޓަމްސްގެ ކޮންޓްރޯލް ހަރުދަނާކުރުމަށްޓަކައި، ރާއްޖޭގެ ބަނދަރުތަކުގައި ހުރި ވަސީލަތްތަކާއި އިންފްރާސްޓްރަކްޗަރ އިތުރަށް ހަރުދަނާކުރުމަށް ސަރުކާރުން މި އަންނަނީ ގިނަ މަސައްކަތްތަކެއް ކުރަމުން" ރައީސް ވިދާޅުވިއެވެ.
ދިވެހިރާއްޖެއަކީ މާސިންގާ ކަނޑެއްގެ ތެރެއަށް ފެތުރިފައި އޮތް ޖަޒީރާ ރަށްތަކެއްގެ މައްޗަށް އެކުލެވޭ ޤައުމެއްކަމުން، ރާއްޖޭގެ ކަނޑުގެ ސަރަޙައްދުގައި ޙަރަކާތްތެރިވާ އުޅަނދުފަހަރު ދަތުރުކުރާ ގޮތް މޮނިޓަރ ކުރުމުގެ ޤާބިލުކަން އިތުރުކުރުމަކީވެސް ކޮންމެހެން ކުރަން ޖެހިފައިވާ ކަމެއްކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި އެ ޤާބިލުކަން އިތުރުކުރުމުން، މަސްތުވާތަކެތި އެތެރެކުރުމާއި، ޓެރަރިޒަމްގެ ހަރަކާތްތައް ހުއްޓުވުމުގެ ޤާބިލުކަން އިތުރުވެގެންދާނެކަމަށްވެސް އެމަނިކުފާނު ވިދާޅުވިއެވެ.
މި ޙަފްލާގައި ވާހަކަފުޅުދައްކަވަމުން ރައީސް ވިދާޅުވީ، ދައުލަތުގެ ފަރާތުން ރައްޔިތުންނަށް ދޭ ޚިދުމަތްތައް ލާމަރުކަޒު ކުރުމަކީ، ސަރުކާރުގެ ވަރަށް މުހިއްމު ސިޔާސަތެއްކަމަށާއި، މިކަމުގައިވެސް ކަސްޓަމްސްއަކީ ވަރަށް މުހިއްމު ދައުރެއް އަދާކުރަމުން އަންނަ މުއައްސަސާއެއްކަމަށެވެ. އަދި ރާއްޖޭގެ ސަރަޙައްދީ ބަނދަރުތައް އިތުރުކުރަމުންދާއިރު، އެއިން ކޮންމެ ތަނެއްގައިވެސް ފުރިހަމަ ޚިދުމަތްތައް ދިނުމުގައި ކަސްޓަމްސްގެ މުވައްޒަފުން މުހިންމު މަސައްކަތްތަކެއް ކުރަމުންދާކަމަށް އެމަނިކުފާނު ވިދާޅުވިއެވެ.
ސަރަޙައްދީ ބަނދަރުތަކުން ރާއްޖެއަށް އެތެރެކުރާ މުދަލުން ނަގާ އިމްޕޯޓް ޑިއުޓީ ކުޑަކުރުމަށް، ސަރުކާރުގެ ސިޔާސަތަށް 2020 ވަނަ އަހަރު ބަދަލުތަކެއް ގެނައިކަން ފާހަގަކުރައްވާ، ރައީސް ވިދާޅުވީ، މި ބަދަލުތަކާއެކު ސަރަޙައްދީ ބަނދަރުތަކުން އެތެރެކުރާ މުދަލުގެ ނިސްބަތް ވަރަށް ބޮޑަށް އިތުރުވެފައިވާކަމަށެވެ. އެގޮތުން މިދިޔަ 2021 ވަނަ އަހަރު ސަރަޙައްދީ ބަނދަރުތަކުން އެތެރެކުރި މުދަލުގެ އަގު 566 މިލިއަން ރުފިޔާއަށްވުރެ މަތިކަމަށް ރައީސް ވިދާޅުވިއެވެ. އަދި ސަރުކާރުގެ މިފަދަ ސިޔާސަތުތައް ކާމިޔާބުކަމާއެކު ތަންފީޒު މިކުރެވެނީ ކަސްޓަމްސްގެ މުވައްޒަފުންގެ އެއްބާރުލުމާއި، ހީވާގި މަސައްކަތްތަކުންކަން ރައީސްގެ ވާހަކަފުޅުގައި ފާހަގަކުރެއްވިއެވެ.