ރަޝިއާ ޔުކްރެއިން ހަނގުރާމައިގެ ސަބަބުން އިންޑޮނޭޝިއާގެ ބާލީގައި މިދިޔަ ހުކުރު ދުވަހު ފެށި ޖީ20 ޤައުމުތަކުގެ މާލީ ވަޒީރުންގެ ބައްދަލުވުން ކާމިޔާބު ނޫންކަމަށް ރިޕޯޓުތައް ބުނެފިއެވެ.
ދެ ދުވަހުގެ މުއްދަތަށް ބޭއްވި މި ބައްދަލުވުމުގައި ޤައުމުތައް ވަނީ ރަޝިއާ ޔުކްރެއިން ހަނގުރާމައިގެ ސަބަބުން ބައިބައިވެފައެވެ. މިއާއިއެކު ޖީ20 ޤައުމުތައް އެއްކޮށް ނެރޭ ބަޔާނެއްވެސް މި ފަހަރުގެ ބައްދަލުވުމަށްފަހު ނުނެރެއެވެ.
މިހާރު ދުނިޔެއަށް ކުރިމަތިވެފައިވާ އިޤްޠިޞާދީ ގޮންޖެހުންތައް ކަމަށްވާ ކާބޯތަކެތި ލިބުން ދަތިވުމާއި، ދަރަނި އިތުރުވުން އަދި ހަކަތައިގެ އަގު އުފުލުމާއި ބެހޭގޮތުން ވާހަކަތައް ވަނީ ދައްކާފައެވެ. ނަމަވެސް ބައްދަލުވުން ނިމުނުއިރު މި ވާހަކަތަކަށް އަމަލީގޮތުން މަސައްކަތްކުރުމަށް އެކުލަވާލާފައި ވަނީ މަދު އުސޫލެކެވެ.
ޤައުމުތައް އެކުވެގެން ނެރޭ ރަސްމީ ބަޔާނުގެ ބަދަލުގައި މިފަހަރު ނެރޭނީ އިންޑޮނޭޝިއާއިން ނެރޭ 14 ޕެރެގްރާފްގެ ބަޔާނެއްކަމަށް މި ބައްދަލުވުމުގެ ޗެއާރ އަދި އިންޑޮނޭޝިއާގެ މާލީ ވަޒީރު ސްރީ މުލްޔާނީ އިންދްރާވާތީ ވިދާޅުވިއެވެ.
މުލްޔާނީ ވިދާޅުވިގޮތުގައި ބައްދަލުވުމުގައި ވާހަކަތައް ދެއްކި ގިނަ ކަންތައްތަކަށް މެމްބަރުން ވަނީ އެއްބަސްވެފައެވެ. ނަމަވެސް ރަޝިއާ ޔުކްރެއިން ހަނގުރާމައަށް ނެރެން އުޅުނު ބަޔާނަށް ޤައުމުތަކުން އެއްގަލަކަށް ނޭރިކަމަށްވެސް މުލްޔާނީ ވިދާޅުވިއެވެ.