ސްޓެލްކޯއިން ކުރިއަށްގެންދާ ހައުސިންގ މަޝްރޫޢުގެ ތެރެއިން ފްލެޓް ލިބުނު ފަރާތްތަކަށް އަންނަމަހުގެ 6 ވަނަ ދުވަހު ފްލެޓްތައް ޙަވާލުކުރާނެކަމަށް އެކުންފުނީގެ މެނޭޖިންގ ޑިރެކްޓަރ އަޙްމަދު ޝަރީފު ވިދާޅުވެއްޖެއެވެ. ހިޔާ މަޝްރޫޢުގެ ތެރެއިން ސްޓެލްކޯއިން އަންނަނީ ހުޅުމާލޭ ދެވަނަ ފިޔަވަހީގައި 360 ފްލެޓް ތަރައްޤީކުރަމުންނެވެ.
ސްޓެލްކޯގެ ހިޔާ ފްލެޓްތައް ބެހިފައިވަނީ 15 ބުރީގެ 2 ޓަވަރަކަށެވެ. ޖުމްލަ 360 އެޕާޓްމަންޓް ހިމެނޭހެން ތަރައްޤީކުރާ މި މަޝްރޫޢުގެ ތެރޭގައި ހިމެނެނީ 1 ކޮޓަރީގެ 72 އެޕާޓްމަންޓާއި، އަދި 2 ކޮޓަރިއާއި މެއިޑް ރޫމް ހިމެނޭ 288 އެޕާޓްމަންޓެވެ. މި 2 ޓަވަރުގައިވެސް މިވަގުތު ކުރަމުންދަނީ ފިނިޝިންގގެ އެންމެފަހުގެ މަސައްކަތްތަކެވެ.
ސްޓެލްކޯގެ މެނޭޖްމަންޓުން އެކުންފުނީގެ މުވައްޒަފުންނާއެކު ރޭ ބޭއްވި ބައްދަލުވުމެއްގައި ކުންފުނީގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވީ، އެކުންފުނިން ތަރައްޤީކުރަމުންދާ 15 ބުރީގެ 2 ޓަވަރަށް ޖުމްލަ 640 މިލިއަން ރުފިޔާ މިހާތަނަށް ޚަރަދުކޮށްފައިވާކަމަށެވެ. އަދި މިއީ އެކުންފުނީގެ 360 މުވައްޒަފުންގެ އާއިލާތަކަށް ބޯހިޔާވަހިކަން ފޯރުކޮށްދިނުމަށް ކުރެވުނު މުހިއްމު އިންވެސްޓްމަންޓެއްކަމަށެވެ. ޓަވަރުތަކުގައި ބާކީ ކުރަން ހުރި ބައެއް ކުދި ކުދި މަސައްކަތްތަކާއެކު މުޅި ޖުމްލަ މި މަޝްރޫޢަށް ގާތްގަނޑަކަށް 700 މިލިއަން ރުފިޔާ ޚަރަދުވާނެކަމަށް ލަފާކުރެވޭކަމަށްވެސް ޝަރީފް ވިދާޅުވިއެވެ.
ޝަރީފް ވިދާޅުވީ، މަޝްރޫޢުގެ ކޮންޓްރެކްޓަރާއެކު ކުރެވުނު މަޝްވަރާތަކަށްފަހު، ސްޓެލްކޯގެ މުވައްޒަފުންނަށް ޔަޤީންކަމާއެކު ފްލެޓަށް ވަދެވޭނެ ތާރީޚު ކަނޑައެޅިފައިވާކަމަށެވެ. އެގޮތުން މިފެށޭ އޯގަސްޓްމަހުގެ 6 ވަނަ ދުވަހު ފްލެޓްތަކުގެ ތަޅުދަނޑި މުވައްޒަފުންނާއި ޙަވާލުކުރެވޭނެކަމަށް ޝަރީފް ވިދާޅުވިއެވެ.
"24 ޖުލައިގައި ފްލެޓްތަކަށް ވަންނަން އަޅުގަނޑުމެން ބޭނުންވީ. ހަޤީޤަތުގައި އަޅުގަނޑުމެން ޑޭޓެއް ކަނޑައަޅާފައި ޓާގެޓެއް ކަނޑައަޅާފައި އެ މަސައްކަތް އެ ޓާގެޓަށް ވާޞިލުވުމަށްޓަކާ ނުކުރިނަމަ އަދި މިއަށްވުރެއްވެސް ލަސްވެގެން ދިޔައީސް. އަޅުގަނޑުމެން އެތަނަށް ވަންނަ ތާރީޚަކީ 6 އޯގަސްޓު. އިރާދަކުރެއްވިއްޔާ 6 އޯގަސްޓު ވާ ހޮނިހިރު ދުވަހުގައި އަޅުގަނޑުމެންގެ ސްޓާފުންގެ ތެރެއިން ފްލެޓް ލިބިފައިވާ ބޭފުޅުން މެންދުރު ފަރިއްކުޅުވަންޖެހޭނީ ފްލެޓުގައި" ޝަރީފު ވިދާޅުވިއެވެ.
މި ބައްދަލުވުމުގައި ޝަރީފް ވަނީ ސްޓެލްކޯގެ ހިޔާ ފްލެޓްތަކަށް އެކުންފުނިން މަހު ކުލީގެގޮތުގައި ނަގާނެ މިންވަރުވެސް ހާމަކުރައްވާފައެވެ. އެގޮތުން 1 ކޮޓަރީގެ އެޕާޓްމަންޓަކަށް މަހު ކުލީގެ ގޮތުގައި ދައްކަންޖެހޭނީ 5622 ރުފިޔާއެވެ. އަދި އަދި 2 ކޮޓަރިއާއި މެއިޑް ރޫމް ހިމެނޭ ފްލެޓްތަކަށް ދައްކަންޖެހޭ މިންވަރު އުޅެނީ 10،356 ރުފިޔާއާއި 10،652 ރުފިޔާއާއި ދެމެދުގައެވެ. އަދި މެއިންޓެނެންސް ފީގެ ގޮތުގައި އިތުރު 1000 ރުފިޔާ ދައްކަންޖެހޭނެއެވެ. ސްޓެލްކޯގެ ހިޔާ ފްލެޓްތަކުން ކުލި ނެގުމަށް އެކުންފުނިން ނިންމާފައިވަނީ އަންނަ އަހަރުން ފެށިގެންނެވެ.
ޝަރީފް ވިދާޅުވީ، މި ފްލެޓްތައް ދިގު މުއްދަތަކަށް ރައްކާތެރިކަމާއެކު ބެލެހެއްޓެންއޮތީ މެއިންޓެނެންސް ފީއެއްވެސް ނަގައިގެންކަމަށެވެ. އެހެންނަމަވެސް މި ފީ ނަގާނީ މީހުން ދިރިއުޅެން ފަށާތާ 1 އަހަރު ފަހުންކަމަށާއި، ފުރަތަމަ އެއް އަހަރުގެ ތެރޭ ފްލެޓަށް ދިމާވާ ފެނާއި ނަރުދާގެ މައްސަލަތައް އެކުންފުނިން ޙައްލުކޮށްދޭނެކަމަށެވެ. އަދި ތަނުގެ ސެކިއުރިޓީގެ ކަންކަން މިހާރަށްވުރެ ވަރުގަދަކުރުމުގެ ގޮތުން ޓަވަރުތަކުގެ ވަށައިގެން ޖަހާފައިވާ ފެންސް މިހާރަށްވުރެ އުސްކުރުމަށް ނިންމާފައިވާކަމަށެވެ.
ސްޓެލްކޯގެ ހިޔާ ޓަވަރުތަކުގެ ވެލިއު އެޑްކުރޭވެނެ ނުވަތަ އަގު މައްޗަށް ޖެއްސޭނެގޮތްތައް ބަލަމުންދާކަމަށްވެސް ޝަރީފް ވިދާޅުވިއެވެ. އެގޮތުން އެތަނުގައި ސުވިމިންގ ޕޫލަކާއި ކުޑަކުދިން ކުޅޭ ސަރަޙައްދެއް ތަރައްޤީކުރުމުގެ ވިސްނުން ކުންފުނިން ގެންގުޅޭކަމަށް ޝަރީފް ވިދާޅުވިއެވެ. އެހެންނަމަވެސް މިކަންކަމަށް ހިނގާނެ ޚަރަދު ހަމަޖައްސާނީ މުވައްޒަފުން އަތުންތޯ ނުވަތަ ކުންފުންޏަށް ލިބޭ ފައިދާއިންތޯ ކަނޑައެޅުމަށްޓަކާ މެނޭޖްމަންޓުން މަޝްވަރާކުރާނެކަމަށްވެސް ޝަރީފް ވިދާޅުވިއެވެ.
ޝަރީފް ވިދާޅުވީ، ސްޓެލްކޯ ފްލެޓްތައް މުވައްޒުންނަށް ދީފައިވަނީ ބޯޑުން އެކަމަށް ކަނޑައަޅާފައިވާ އުޞޫލުގެ މަތިންކަމަށެވެ. އަދި ސްޓެލްކޯގެ ބޯޑުން އަމަލުކުރުމަށް ކަނޑައަޅާފައިވާ އުޞޫލާއި ޚިލާފަށް އެއްވެސް މުވައްޒަފަކަށް ފްލެޓެއް ދީފައިވާކަމަށްވާނަމަ، އެކަން ބަލާ، އަޅަންޖެހޭ ފިޔަވަޅެއް ކުންފުނިން އަޅާނެކަމަށްވެސް ޝަރީފް ވިދާޅުވިއެވެ.