އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަންގެ އޭވިއޭޝަން ސެކިއުރިޓީ ނެޝަނަލް އިންސްޕެކްޓަރ ކޯހުގައި ބައިވެރިވުމަށް މިނިސްޓްރީ އޮފް ޑިފެންސްގެ 4 މުވައްޒަފުން އިނގިރޭސިވިލާތަށް ދިޔުމަށް ފުރައިފިއެވެ.
މިއީ އިނގިރޭސިވިލާތުގެ ޑިޕާރޓްމަންޓް ފޮރ ޓްރާންސްޕޮރޓޭޝަންގެ ފަރާތުން 26 ޖުލައި އިން 03 އޮގަސްޓް 2022 އަށް އިނގިރޭސިވިލާތުގައި ކުރިއަށްގެންދާ ކޯހެކެވެ. ކޯހުގެ ހުރިހާ ހަރަދެއްވެސް ހަމަޖައްސާފައިވަނީ އިނގިރޭސިވިލާތުންނެވެ. މިކޯހަކީ މިނިސްޓްރީ އޮފް ޑިފެންސްގެ ޑައިރެކްޓްރޭޓް އޮފް އެވިއޭޝަން ސެކިޔުރިޓީ އެޑްމިނިސްޓްރޭޝަންގެ މުވައްޒަފުންގެ ހުނަރާއި ޤާބިލުކަން އިތުރުކޮށް، ވައިގެ ދަތުރު ފަތުރާއި ބެހޭ މައި ޖަމިއްޔާ ކަމުގައިވާ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަންގެ މިންގަނޑަށް މުވައްޒަފުން ތަމްރީން ކުރުމުގެ މަޤްސަދުގައި ކުރިޔަށް ގެންދެވޭ ތަމްރީން ކޯހެކެވެ.
މިކޯހަކީ ޤައުމުތަކުގެ ނެޝަނަލް ސިވިލް އޭވިއޭޝަން ސެކިޔުރިޓީ ޕްރޮގްރާމްގައި ކަނޑައަޅާފައިވާ ކަންކަން ތަންފީޒް ކުރުމަށް ޒިންމާ ކުރެވިފައިވާ މުވައްސަސާތަކުން އެއަރޕޯޓުތަކުގައި ދެމުންދާ ޚިދުމަތުގެ ތެރެއިން އޭވިއޭޝަން ސެކިޔުރިޓީ ހަރަކާތްތައް ތަންފީޒް ކުރަމުންދާ މިންވަރު ބަލާ، ކަންކަން އިސްލާހު ކުރުމުގައި އަމަލު ކުރާނެގޮތުގެ އިންޓަރނެޝަނަލް ބެސްޓް ޕްރެކްޓިސް ކޯހުގެ ބައިވެރިންނަށް ބުނެދެވޭނެގޮތަށް ފަރުމާކޮށްފައިވާ ތަމްރީން ޕްރޮގްރާމެކެވެ.
އިނގިރޭސިވިލާތުގެ ޑިޕާރޓްމަންޓް ފޮރ ޓްރާންސްޕޮރޓޭޝަންގެ ފަރާތުން 2012 ވަނަ އަހަރުން ފެށިގެން ރާއްޖޭގެ ވައިގެ ދަތުރު ފަތުރުގެ ރައްކާތެރިކަން ހަރުދަނާ ކުރުމަށް ތަފާތު އެހީތެރިކަން ފޯރޮކޮށް ދެމުން ގޮސްފައިވެއެވެ. މިގޮތުން މި މަސައްކަތުގައި ބޭނުން ކުރާނެ 10 އެކްސްޕްލޯސިވް ޓްރޭސް ޑިޓެކްޝަން މެޝިން ހަދިޔާ ކުރުމާއި، އެއަރޕޯޓުގެ ސަލާމަތީ ރައްކާތެރި ކުރުމުގެ މަސައްކަތް ތަންފީޒުކުރުމުގެ ޒިންމާ އަދާކުރާ އޭވިއޭޝަން ސެކިއުރިޓީ ކޮމާންޑުގެ މުވައްޒަފުންނަށް ބޭނުންވާ ތަމްރީން ފޯރުކޮށް ދިނުމުގެ އިތުރުން އެއަރޕޯޓު ހިންގާ ފަރާތުގެ ސެކިއުރިޓީ ކަންކަން ހަރުދަނާ ކުރުމަށް ބޭނުންވާ ފަންނީ ލަފާ ދެމުން ގެންދެއެވެ.
މިނިސްޓަރ އޮފް ޑިފެންސް އަލްއުސްތާޒާ މާރިޔާ އަހުމަދު ދީދީއާއި އިނގިރޭސިވިލާތުގެ ކަމާއި ގުޅުންހުރި އިދާރާތަކުގެ އިސް އޮފިޝަލުންގެ މެދުގައި 2022 ވަނަ އަހަރުގެ ފެބުރުއަރީ މަހު ބޭއްވުނު ބައްދަލުވުމަށްފަހު އިނގިރޭސިވިލާތާއި ރާއްޖެއާއި ދެމެދު ޤާއިމު ކުރެވިފައިވާ ގުޅުމުގެ ތެރެއިން 2023 އަދި 2024 ގައި ކުރުމަށް ކަނޑައަޅާފައިވާ ކަންތައް ހިމެނޭ ޖޮއިންޓް އެކްޝަން ޕްލޭން އެއް އެކުލަވާލުމުގެ މަސައްކަތް އަންނަނީ ކުރަމުންނެވެ. މި ޕްލޭން އެކުލަވާލަނީ މިނިސްޓްރީ އޮފް ޑިފެންސްގެ ޑައިރެކްޓްރޭޓް އޮފް އެވިއޭޝަން ސެކިއުރިޓީ އެޑްމިނިސްޓްރޭޝަންއާއި އިނގިރޭސިވިލާތުގެ ޑިޕާރޓްމަންޓް ފޮރ ޓްރާންސްޕޮރޓޭޝަން ގުޅިގެންނެވެ.