ދިވެހިރާއްޖޭގެ ފަޚުރުވެރި މިނިވަން ދުވަހުގެ މުނާސަބަތުގައި އެމް.އެން.ޑީ.އެފްއިން ބޭއްވި "މިލިޓަރީ ޕެރޭޑް އެންޑް ޕްރޮސެޝަން" ރައީސުލްޖުމްހޫރިއްޔާގެ ދެކަނބަލުން ބައްލަވާލައްވައިފިއެވެ. މި ޕެރޭޑް ފަށާފައިވަނީ ބޮޑުތަކުރުފާނުމަގުން ޢިއްޒުއްދީން ފާލަމުގެ ކުރިމަތިންނެވެ.
ޤައުމީ ދިފާޢީ ބާރުގެ މިލިޓަރީ ޕެރޭޑް އެންޑް ޕްރޮސެޝަން ޝަރަފުވެރިކޮށްދެއްވީ، ދިވެހިރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ އިބްރާހީމް މުޙައްމަދު ޞާލިޙާއި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ. ރައީސްގެ ދެކަނބަލުން ޖުމްޙޫރީ މައިދާނަށް ވަޑައިގެންނެވުމުން މަރުޚަބާ ދެންނެވީ މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއާއި، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް އަދި ކޮމިޝަނަރ އޮފް ޕޮލިސް މުޙައްމަދު ޙަމީދެވެ.
މި އަސްކަރީ ޕެރޭޑް ރަސްމީކޮށް ފެށިގެންދިޔައީ ރައީސުލްޖުމްހޫރީއްޔާއަށް ޚާއްސަކުރައްވާފައިވާ ޑައިސްކޮޅަށް އެމަނިކުފާނު އަރައިވަޑައިގެންނެވުމާއެކު ދިވެހި ޤައުމީ ދިފާޢީ ބާރުގެ ބޭންޕާޓީގައި ކުޅެވުނު ޤައުމީ ސަލާމުންނެވެ. އަދި ޕެރޭޑް ކުރިއަށްގެންދިއުމަށް ޕެރޭޑް ކޮމާންޑަރަށް ރައީސުލްޖުމްހޫރިއްޔާ ހުއްދަދެއްވުމާއެކު، ޤައުމީ ދިފާޢީ ބާރުގެ ބޭންޕާޓީން ވަނީ ބޮޑުބެރާއެކު ޤައުމީ ޖޯޝާއި ރޫޙު އާލާވާފަދަ ހިތްގައިމު ހުށަހެޅުމެއް ހުށަހަޅައިދީފައެވެ.
ޖުމްހޫރީ މައިދާން ސަރަޙައްދުން ފެށި މި ޕެރޭޑު ދަތުރުކޮށްފައިވަނީ އަމީރުއަޙްމަދު މަގުން އިރަށްގޮސް، ސޯސަންމަގަށް އަޅައިގެން ދެކުނަށްގޮސް، މަޖީދީމަގުން ހުޅަނގަށްގޮސް ރަސްފަންނު ކައިރިން ބޮޑުތަކުރުފާނު މަގުންގޮސް ކަޅުތުއްކަލާކޮށްޓަށެވެ. ޕެރޭޑުގެ ތެރެއިން މާލޭގެ ޖުމްލަ 5 ސަރަޙައްދެއްގައި ޤައުމީ ސިފައިންގެ ލަޝްކަރު މަޑުކޮށްފައިވެއެވެ.
އެގޮތުން ބޮޑުތަކުރުފާނުމަގު ޢިއްޒުއްދީން ފާލަން ކުރިމަތިންނާއި، ސޯސަންމަގު ދިވެހިބަހުގެ އެކަޑަމީ ކުރިމަތިންނާއި، މަޖީދީމަގާއި ޗާންދަނީމަގު ގުޅޭ ހަތަރު އަނގޮޅިންނާއި، މަޖީދީމަގު މިލިއަން ބުކްޝޮޕް ކައިރީގެ އިތުރުން ބޮޑުތަކުރުފާނުމަގު ކަޅުތުއްކަލާ ކޮށި ހުޅަނގު އުތުރު ކަންމަތީގައި ލަޝްކަރު މަޑުކޮށްފައިވެއެވެ. މިއިން ކޮންމެ ތަނެއްގައި މިލިޓަރީ ބޭންޑުގައި ޤައުމީ ލަވަތަކުގެ ރާގުތައް ވަނީ ކުޅެފައެވެ. މި ޕެރޭޑް ނިންމާލާފައިވަނީ ކަޅުތުއްކަލާކޮށްޓަށެވެ.
މި މިލިޓަރީ ޕެރޭޑްގައި، ސިފައިންގެ ކޯރތަކާއި ސަރވިސްތައް ރަމްޒުކޮށްދޭ ގޮތަށް ގެމަތައް ވަނީ އަތުރާލާފައެވެ. އޭގެތެރޭގައި އެމް.އެން.ޑީ.އެފްގެ ކޮމްބެޓް އެންޑް މެނޫވަރ ފޯސްތަކާއި، ސަޕޯޓް ސަރވިސް ކޯރތަކާއި، ފަންކްޝަނަލް ކޮމާންޑްތައް ފެނިގެންގޮސްފައިވެއެވެ. އަދި ސިފައިންގެ މިލިޓަރީ ބޭންޑާއި، އެމް.އެން.ޑީ.އެފް ޑްރިލް ސްކޮޑާއި، އަންހެން ސިފައިންގެ ގެމައަކާއި، އެމް.އެން.ޑީ.އެފުން ޝަރަފުވެރިކަމާއެކު ރިޓަޔަރ ކުރައްވާފައިވާ އިސް ޚިދުމަތްތެރިންގެ ޚާއްޞަ ގެމައެއް ވެސް ފެނިގެންދިޔައެވެ.
ޤައުމީ ދިފާޢީ ބާރުން ކުރިއަށްގެންދިޔަ މިލިޓަރީ ޕެރޭޑް އެންޑް ޕްރޮސެޝަންގައި ސިފައިންގެ ގެމަތަކާއެކު ސަރވިސް އުޅަނދުތަކާއި، އާމަޑް ޑީޓެއިލެއްވެސް ދައްކާލާފައިވެއެވެ. މާލޭގެ މަގުތަކުގައި ކުރިއަށްގެންދިޔަ މި ހަރަކާތް ބަލާލުމަށް ގިނަ އަދަދެއްގެ އާއްމުން މަގުތަކަށް އެއްވިކަން ފާހަގަކޮށްލެވެއެވެ.
ފަޚުރުވެރި މިނިވަން ދުވަސް ފާހަގަކުރުމަށް ޤައުމީ ދިފާޢީ ބާރުން މިފަދަ ހަރަކާތެއް ކުރިއަށްގެންގޮސްފައި މިވަނީ މުޅި ދުނިޔެއަށް ކުރިމަތިވި ކޯވިޑް-19ގެ ބަލިމަޑުކަމަށްފަހު، ގާތްގަނޑަކަށް 2 އަހަރު ދުވަހުގެ މެދުކެނޑުމަކަށްފަހުއެވެ.
މި ހަރަކާތް ބަލާލުމަށް މާލޭގެ މަގުތަކަށް ގިނަ ބަޔަކު ނިކުމެފައިވެއެވެ. ވަކިން ޚާއްސަކޮށް ގިނަ ޢަދަދެއްގެ ތުއްތުކުދިން މަގުތަކަށް ނިކުމެ، ވަނީ މި ހަރަކާތް ބަލާފައެވެ.