ހުޅުމާލޭގައި މިވަގުތު އިމާރާތްކުރަމުން އަންނަ ސްކޫލްތަކުގެ ތެރެއިން 4 ސްކޫލެއްގެ މަސައްކަތް އަންނަ އަހަރު ނިންމާލެވޭނެ ކަމަށް މިނިސްޓަރ އޮފް އެޑިއުކޭޝަން ޑރ.ޢާއިޝަތު އަލީ ވިދާޅުވެއްޖެއެވެ. މިވަގުތު ހުޅުމާލޭގައި ޖުމުލަ 6 ސްކޫލެއް އިމާރާތް ކުރުމުގެ މަސައްކަތް އަންނަނީ ކުރަމުންނެވެ.
ރާއްޖޭގެ ސްކޫލްތަކަށް ދިމާވެފައިވާ ޖާގައިގެ މައްސަލަ ހައްލުކުރުމަށްޓަކައި އެޑިއުކޭޝަން މިނިސްޓްރީން އަންނަނީ އެކި ސްކޫލްތަކުގައި އެކި މަޝްރޫޢުތައް ކުރިއަށް ގެންދަމުންނެވެ. ޚާއްސަގޮތެއްގައި މިމަޝްރޫޢުތައް ކުރިއަށް ގެންދަނީ އެއް ދަންފަޅިއަށް ސްކޫލްތައް ބަދަލުކުރުމުގެ އަމާޒާއެކުގައެވެ. އެގޮތުން މިހާރުވެސް 208 މަޝްރޫއެއް އެޑިއުކޭޝަން މިނިސްޓްރީން އަންނަނީ ހިންގަމުންނެވެ. މީގެ ތެރޭގައި 1150 ކްލާސްރޫމްއާއި 79 މަލްޓިޕަރޕަސް ހޯލްގެ މަސައްކަތާއި، ސްކޫލްތަކަށް ބޭނުންވާ އެހެނިހެން ތަންތަނުގެ 261 މަޝްރޫއެއް އަންނަނީ ހިންގަމުންނެވެ.
ސްކޫލްތަކުގައި ކުރިއަށްގެންދާ މަޝްރޫއުތަކުގެ މަޢުލޫމާތުތައް ހިއްސާކުރައްވަމުން މިނިސްޓަރ އޮފް އެޑިއުކޭޝަން ޑރ.ޢާއިޝަތު އަލީ ވިދާޅުވީ ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގައި ކުރިއަށްދާ މަސައްކަތްތައް ނިންމުމަށް މަސައްކަތް ކުރައްވަމުން އަންނަކަމަށެވެ. އެގޮތުން ދެވަނަ ފިޔަވަހީގައި އަޅާ ސްކޫލްތަކުގެ ތެރޭގައި ކާމިލް ދީދީ ޕްރީ ސްކޫލްގެ މަސައްކަތް އަންނަމަހު ނިންމާލެވޭނެކަމަށެވެ. އަދި ޕްރައިމަރީ ސްކޫލްގެ މަސައްކަތްވެސް އޮކްޓޫބަރު މަހަށް ނިންމާލެވޭނެކަމަށެވެ. މީގެ އިތުރުން ދެވަނަ ފިޔަވަހީގައި ތަރައްޤީ ކުރާ ޞަލާޙުއްދީން ސްކޫލްގެ މަސައްކަތް އަންނަ އަހަރުގެ ޖެނުއަރީ މަހު ނިންމާ ބޭނުންކުރަން ފެށޭނެކަން މިނިސްޓަރ ފާހަގަކުރެއްވިއެވެ. މިސްކޫލަކީ އެލްކޭޖީން ފެށިގެން ގްރޭޑް 10 އަކަށް ކިޔަވައިދެވޭނެ ސްކޫލެކެވެ. އަދި މިތަން ދެ ދަންފަޅިއަށް ހިންގާނަމަ 3000 އެއްހާ ދަރިވަރުންނަށް ޖާގަ ލިބިގެންދާނެކަން މިނިސްޓަރ ފާހަގަކުރެއްވިއެވެ. މީގެ އިތުރުން ދެވަނަ ފިޔަވަހީގައި އަޅަމުން އަންނަ 4 ވަނަ ސްކޫލްގެ މަސައްކަތްވެސް އަންނަ އަހަރު ނިންމުމަށްފަހު އޯގަސްޓް މަހު ފަށާ ދިރާސީ އަހަރުގެ ކިޔެވުމާއެކު ބޭނުންކުރަން ފެށޭނެކަމަށް މިނިސްޓަރ ވިދާޅުވިއެވެ.
އެޑިއުކޭޝަން މިނިސްޓަރ ވިދާޅުވީ އަންނަ އަހަރުގެ މާރޗްމަހުގެ ތެރޭގައި ހުޅުމާލެ ފުރަތަމަ ފިޔަވަހީގައި އަޅާ ސީއެޗްއެސްސީގެ އައު އިމާރާތުގެ މަސައްކަތްވެސް ނިންމާލެވޭނެކަމަށެވެ. އަދި އަލްޖެރީއިން އަޅާ ސްކޫލްގެ މަސައްކަތް ޖުލައިމަހަށް ނިންމާލެވޭނެކަމަށް މިނިސްޓަރ ވިދާޅުވިއެވެ.
އެއްދަންފަޅިއަށް ސްކޫލްތައް ބަދަލުކުރުމަށް ކުރާ މަސައްކަތުގެ ތެރެއިން މިއަހަރުގެ ބަޖެޓުގައި ވަނީ މާލެ ސަރަޙައްދުގައި އިތުރު 4 ސްކޫލެއް އެޅުމަށް ބަޖެޓްކޮށްފައެވެ.
އެޑިއުކޭޝަން މިނިސްޓްރީން ހިއްސާކުރެއްވި ތަފާސްހިސާބަށް ބަލާއިރު މިހާރު ކުރިއަށްދާ މަޝްރޫޢުތަކުގެ ތެރެއިން 39 މަޝްރޫޢެއްގެ މަސައްކަތް ވަނީ ނިންމާލާފައެވެ. އަދި 84 މަޝްރޫޢެއްގެ މަސައްކަތް ކުރިއަށްދާއިރު 7 މަޝްރޫއެއް ހިންގުމަށް ވަނީ ކޮންޓްރެކްޓްކޮށްފައެވެ. އަދި 2 މަޝްރޫޢެއް އެވޯޑް ކޮށްފައިވާއިރު 26 މަޝްރޫޢެއް އޮތީ ޓެންޑަރިންގައެވެ. 7 މަޝްރޫޢެއް ޕްރީޓެންޑަރިންގައި އޮތް އިރު 43 މަޝްރޫޢެއް ހިންގުމަށްވަނީ ޕްލޭންކޮށްފައެވެ.