ޤަތަރު ފައުންޑޭޝަނާއި، އެ ޤައުމުގެ ތިމާވެއްޓާއި ބެހޭ ވަޒީރާއި ޓެކްނޯލޮޖީއާއި ބެހޭ ވަޒީރާއި މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ ބައްދަލުކުރައްވައިފިއެވެ.
މި ބައްދަލުކުރެއްވުންތައް ބާއްވާފައިވަނީ އުރީދޫގެ ޗެއަރޕާސަން ފާތިމާ އަލް ކައުވްރީގެ ދެއްވި ދަޢުވަތަކަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާއާއި، މިނިސްޓަރ އޮފް އެޑިއުކޭޝަން ޑރ. ޢާއިޝަތު ޢަލީއާއި، މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް، ޔުމްނާ މައުމޫން ޤަތަރަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
މި ދަތުރުފުޅަކީ ގަތަރާއި ރާއްޖެއާއި ދެމެދު އޮންނަ ގާތްގުޅުން އިތުރަށް ބަދަހި ކުރުމުގެ ގޮތުން އިންތިޒާމް ކުރެވިގެންދިޔަ ދަތުރެކެވެ.
އެކި ސިނާއަތްތަކުގައި ހަރަކާތްތެރިވާ ފަރާތްތަކުގެ ދިރިއުޅުމުގެ ފެންވަރު، ޑިޖިޓަލް ޓްރާންސްފޯމޭޝަންގެ އެހީގައި މުއްސަނދިކުރުމަށް ޤައުމީ ފެންވަރުގައި ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ޤަތަރުގެ މުހިންމު މުއައްސަސާތަކާއެކު ބައްދަލުކުރެއްވުންތަކެއް މި ދަތުރުފުޅުގައި ވަނީ ބާއްވާފައެވެ. އެގޮތުން، ޤަތަރު ފައުންޑޭޝަނާއި، އެ ޤައުމުގެ ތިމާވެއްޓާއި ބެހޭ ވަޒީރާއި، ޓެކްނޯލޮޖީއާއި ބެހޭ ވަޒީރާއި ބައްދަލުކުރައްވާ، އެ ދާއިރާތަކުން ގުޅިގެން މަސައްކަތް ކުރެވޭނެގޮތްތަކާއި ބެހޭގޮތުން މަޝްވަރާ ކުރެއްވިއެވެ.
މި ބައްދަލުކުރެއްވުންތަކުގެ އިތުރުން، ޤަތަރުގެ ޤައުމީ ކުތުބުހާނާގެ މަސައްކަތްތަކާއި އިންތިޒާމްތައް ރާއްޖޭގެ ފަރާތުން ޤަތަރަށް ވަޑައިގެންނެވި ވަފްދުން ބައްލަވާލެއްވިއެވެ.